Ang mga Klipspringer—Usa ka Debotadong Parisan

HIMAMATA ang mga klipspringer gikan sa Habagatang Aprika, nga mga sakop sa pamilyang antelope sa Aprika.

“Usa sa labing makapahigugmang mga bahin sa kinaiya sa klipspringer,” nagtaho si Peter Norton diha sa magasing African Wildlife, “mao ang pagporma sa lig-on kaayo ug magdugay nga panagparis nga molungtad sa ubay-ubayng katuigan hangtod mamatay ang usa kanila. Ang parisan magpabiling dug-ol sa halos tanang panahon—nga ginapakita sa akong mga nahipos nga kasayoran nga sila nagagugol sa 97 porsiento sa ilang panahon sulod sa 15 metros sa usag usa ug 77 porsiento sulod sa lima ka metros. Kon magpahulay o makugang, sila halos kanunay nga anaa sa duol nga makahikap sa usag usa.”

Ang usa sa parisang klipspringer kasagarang magturnoturno, nga ang usa manibsib samtang ang lain nagabantay nga nagatungtong sa usa ka bato samag magbalantay. Unya mag-ilis sila sa mga posisyon. Miingon si Norton: “Ang laki mogugol ug mas daghang panahon nga magbantay sa mga tumutukob kay sa baye, nga kinahanglang manibsib ug mas daghan sa pagpakaon sa anak sa tiyan, o pagtaganag gatas alang sa iyang nati.”

Kon itandi sa ubang mga antelope, ang mga kuko sa klipspringer maoy linain ug makapaarang niini sa pagkatkat sa titip, hamis nga bato. Gikan sa luwas, batoong mga bakilid, kini magpasidaan sa mga tumutukob pinaagi sa samag-trompetang mihi. Ang tawag sa pasidaan kasagarang usa ka dueto, uban sa mihi sa baye nga mogawas sa tipik sa segundo sunod sa iya sa laki. Sila tinong nagabantayay sa usag usa. Tinuod nga debotadong parisan.