Gubat—Pagsagubang sa Sangpotanan

SA UNSANG paagi nakasagubang ang mga tawong nadaot sa gubat? Aron matugkad kini nga ulohan, ang Pagmata! nag-interbiyo sa pila ka biktima sa gubat.

Si Bob Honis naapil sa tinagpulo ka libong U.S. Marines nga nakigbugno sa ikaduhang gubat sa kalibotan sa bugno sa Iwo Jima sa kasadpang Pasipiko. Gipatik ang iyang estorya dili sa pagpakurat kondili sa pagpakita nga posible sa pipila nga maulian sa bisan labing daotang mga kasinatian.

Ang Kasakit

“Misugod kami sa among pagpaduol sa Iwo Jima sa 8:30 s.b. sa Pebrero 19, 1945. Ang dagkong mga kanyon sa bapor de guerra nga Tennessee nangahilom sa among luyo, ug dayon ang among sakayang igdudunggo nauyog sa mga pagpamomba gikan sa artileriya sa baybay sa kaaway. Ako, kay nangisog kaayo, nga andam sa kombati sa unahan, misinggit taliwala sa kalangas, ‘Binli kamig pipila!’ samtang misunod kami sa unang mga sundalong midasdas.

“Sa didto na kami sa baybay, ang ako lang nasimhotan mao ang ngil-ad nga baho sa polbora, bolkanikong abo, ug nasunog nga kasangkapan. Naigo ang among sakayang igdudunggo. Namatay dihadiha ang nagmaneho, ug naguba ang tanan namong kasangkapan.

“Dili gayod ako mahikalimot sa talan-awon sa ubang patayng mga marino. Ang nawong sa usa naumod sa balas. Ang iyang botas sa gubat, nga wala nay lapalapa, naliston pa abot sa iyang mga tuhod, sa mga bilin sa nangagi batan-on, lig-ong mga batiis. Sa pagtan-aw sa akong tuo samtang ako mihupo sa gidali pagkalot nga foxhole, nakita ko ang laing marino nga nagdungo nga naghalog sa iyang pusil sa iyang dughan, nga wala nay ulo. Nagkatag ang patayng mga marino sa baybayon, nga daghan naputlan sa mga kamot ug tiil nga dili ikabatbat. Kadto sinugdanan lamang.

“Sa adlawng ikaduha ako gisugo sa pagsusi sa usa sa among mga posisyon. Pagkangil-ad sa talan-awon nga misugat kanako! Ang mibutong bala nagpalupad sa mga batiis ug mga bukton gikan sa unang marino nga akong nakita. Ang iyang helmet ug strap sa sulang napahimutang pa gihapon. Nagbuklat ang iyang mga mata, nga nagtan-aw sa unahan nga daw namalandong nga lalom. Nga nasabwag samag buak nga mga dulaan, ang ubang membro sa pundok nga tigpusil mao lamay mga hiwa sa unod nga nakatag sa humok, itom bolkanikong abo.

“Ang pagpatyanay nagpadayon sa tibuok nga adlawng ikatulo. Dayon ang mga patay misugod sa pagkadunot nga dali. Ang baho dili maantos. Kadto nahadiindiin. Walay kaikyasan niana.

“Tapos sa upat ka adlaw sa mabangis nga bugno, sa Pebrero 23 diha ang karon bantog nga pagpataas sa Amerikanhong bandera sa Bukid Suribachi. Inay malipay, ang gibati ko lang mao ang kasubo. Ang mga patay nahadiindiin. Ang kinabuhi mipatim-awng barato. Ang mabangisong bugno nagpadayon hangtod sa Marso 26, dihang sa kataposan nabihag ang Iwo Jima, tapos sa mga semana sa wayhunong nga patyanay. Pagkadakong pag-ulag dugo—ang total nga 26,000 ka Amerikano ug Hapones namatay sa usa ka isla nga 20 kilometro kuwadrado lang ang gidak-on!

Ang Sangpotanan

“Angay unta nga kadto panahon sa dakong kalipay sa dihang ako gipagawas sa Marines ug nahauban na usab sa akong pamilya. Inay hinuon, ang natigom sa akong kahiladman karon mipaibabaw—ang makahadlok nga pagbati sa kahaw-ang ug kakawangan.

“Ang mga pangutana nagpadayon sa paghasol kanako. Kon barato kaayo ang kinabuhi, unsay kapuslanan sa pagkabuhi? Aduna ba kahay tinuod matinagdanon nga Diyos? Pagahasolon ba ako sa akong mga kasinatian sa tibuok kong kinabuhi? Bisan tapos sa pagminyo ko sa akong asawa, si Mary, ang paghasol nagpadayon. Wala ako makakitag kalaoman sa malungtaron, malipayong kaugmaon, gubat lamang ug dugang binuang nga pagpamatay hangtod, sa kataposan, ang paglaglag sa yuta ug sa tanang kinabuhi niini.

Pagpangitag Solusyon

“Wala madugay tapos sa among pagkaminyo, ang akong asawa ug ako giduaw sa duha sa mga Saksi ni Jehova. Kadto mihatag kanakog higayon nga mangutanag pila ka matugkarong mga pangutana bahin sa gubat, pag-antos, ug katuyoan sa kinabuhi. Ang mga tubag sa akong mga pangutana daling miabot gikan sa Bibliya.

“Oo, adunay usa ka mahigugmaong Diyos nga nagatagad ug sa dili madugay magtambal sa tanan natong kasakit ug kasubo. (Salmo 83:18; Pinadayag 21:1-4) Dili, ang Diyos dili mouyon sa mga gubat sa pagpangagpas sa tawhanon politikanhong mga tumong. (Salmo 46:9; Isaias 2:4; Juan 18:36) Dili, ang yuta dili malaglag diha sa nukleyar nga kalaglagan. Kini magpabilin sa walay kataposan, ingong paraisong puy-anan sa tanan nga makakab-ot sa mga kinahanglanon sa Diyos.—Salmo 37:29; Isaias 45:18; Pinadayag 11:17, 18.

“Samtang nagpadayon ang akong pagtuon sa makalipayng mga saad sa Bibliya, ang kahaw-ang sa akong kahiladman inanayng nahanaw. Ako nagmasaligon nga ang Gingharian sa Diyos mao ang bugtong matinud-anong paagi sa pagpatunghag pakigdait ug kasegurohan sa yuta. Ang gubat sa Diyos sa Armageddon sa kataposan maghanaw sa tanang kadaotan sa yuta.—Daniel 2:21, 22; Mateo 6:10; Pinadayag 16:14-16.”

Ugmara ang Paglaom sa mga Saad sa Diyos

Ang uban nagauyon nga ang pagkakat-on sa kamatuoran bahin sa katuyoan sa Diyos alang sa yuta ug ang Iyang mga katarongan sa temporaryong pagtugot sa pagkadaotan mao ang labing gamhanang butang sa pagtabang nila sa pagsagubang sa nabiling mga kasakit sa gubat.

Dili kini pagpaila nga ang propesyonal medikal nga tabang basin dili na kinahanglan usahay. Apan ang tinuod nga paglaom, nga gipasukad sa kasaligang mga saad sa Diyos diha sa Bibliya, nagahatag ug kusog sa kahiladman sa pag-antos sa seryosong mga suliran.

Bisan pa niana, tingali sa personal ikaw dili apektado sa kasakit sa gubat. Apan tingali may nailhan ka nga apektado. Unsay mahimo nimo sa pagtabang? “Mahimong masinabtanon ug makapalig-on niadtong nagaantos niining paagiha,” matud sa usa ka biktima sa kasakit sa gubat, si Mary C   . “Tabangi kana sila sa paglantaw sa umaabot, sa pagpalandong sa mga saad sa Diyos, dili sa mga trahedya sa kagahapon,” siya mitambag. Oo, mahimong mapailobon ug maluluy-on. Paghatag konsiderasyon. Ug sulayi ang pagtabang kanila nga magmalaomon sa umaabot.

‘Apan,’ basin moingon ka, ‘sa unsang paagi maingon nga alang niadtong nag-antos sa kasakitan sa gubat, ang laing gubat, ang Armageddon, mao ang solusyon?’ Ang Armageddon, ang gubat sa Diyos batok sa tanang pagkadaotan, mao unyay usa ka gubat nga walay inosenteng mga biktima. Dili kana molapas sa mga prinsipyo sa hustisya ug pagkamaayo. Kana ‘pagahimoon diha sa pagkamatarong,’ nga niana ang mga daotan lamang ang mamatay.—Pinadayag 19:11; Proverbio 2:20-22.

Ang Armageddon wala unyay makalilisang nga sangpotanan, walay magbalikbalik nga mga daman o ubang mga samad sa kaisipan. Ang bag-ong kalibotan sa Diyos magatuman sa matagnaong hulagway nga gikulit sa Isaias 65:17-19: “Ang unang mga butang dili na pagahinumdoman, . . . ug dili na madungog . . . ang tingog sa paghilak o ang tingog sa pagbakho.”

Ang tanang nangaging biktima sa makapatay nga gubat ug kapintasan, bisan ang mga patay, makabatog kaayohan gikan niining gubata. (Salmo 72:4, 12-14; Juan 5:28, 29) Hunahunaa kini—pagpasig-uli sa Paraiso sa kalinaw nga maoy katuyoan sa Diyos sa sinugdan.

“Kining paglaom nga ginahatag sa Bibliya,” matud ni Bob Honis, “mao ang yawi sa pagsagubang sa sangpotanan sa gubat. Ang tanan nga nadaot sa kasakit sa gubat makabatog kaayohan sa maong paglaom. Kining matanga sa paglaom maoy, sumala sa ginaingon sa Bibliya, ‘usa ka angkla sa kalag.’”—Hebreohanon 6:19.

[Blurb sa panid 8]

“Ang natigom sa akong kahiladman karon mipaibabaw—makalisang nga pagbati sa kahaw-ang ug kakawangan”

[Letrato sa panid 7]

“Sa pagpaingon sa Iwo Jima, gitun-an namo ang mga modelo sa isla

Si Honis anaa sa tuo sa ibabaw

[Tinubdan]

U.S. Marine Corps

[Letrato sa panid 9]

Si Bob ug Mary Honis karong adlawa