Mga Batang Walay Balay—Aduna Bay Solusyon?
ANG mga tawo nga tinuod matinagdanon sa ilang isigkatawo dili buot mosurender nga daw wala nay mahimo alang sa mga batang walay balay. Nakaamgo sila nga ang mga bata sa kadalanan nagkinahanglan dili lamang sa atop ibabaw sa ilang mga ulo. Ang mga bata molambo kon sila may kalinaw sa hunahuna, kahimut-anang trabaho, maayong lawas, ug pagsalig-sa-kaugalingon. Ang matinabangong kalalakin-an ug kababayen-an nagatanyag sa ilang kaugalingon nga kinabubut-on sa kaayohan sa mga walay-balay, ug kana dalayegon. Apan bisan pa sa ilang paningkamot, ang suliran sa mga bata sa kadalanan nagapadayon.
Ang hinungdan mao nga ang presenteng sistema nga nagapatunhay sa mga kahimtang nga nagapatunghag mga batang walay balay dili maayom-ayom. Kini nahisamag gubaong sakyanan nga dili na mahimong ayohon. Sa matinud-anong paagi, dili ba pagailhon nato nga ang pagkamamugnaon sa tawo lamang dili makapatunghag makiangayong tawhanong katilingban?
Ikalipay, hinuon, posible ang kausaban—apan dili pinaagi sa gahom sa tawo. Ang Diyos nga Labing Gamhanan mao lamang ang may katakos ug kaalam sa pagwagtang sa bug-os kon unsay makadaot sa yuta. Ang iyang Pulong, ang Bibliya, nagasugid kanato mahitungod sa administrasyon pinaagi sa iyang langitnong Gingharian ug kon sa unsang paagi ipatuman niini ang tinguha sa tawo alang sa matarong nga mga kahimtang dinhi mismo sa yuta.—Daniel 2:44.
Ang Diyos Nagatagad
Sa imong hunahuna posible ba nga wagtangon sa Diyos ang presenteng sistema ug ipasulod ang usa ka bag-ong paagi sa kinabuhi? Kon mao, hinumdomi nga dili lamang ang kaluwasan sa tawo apan, labaw sa tanan, ang ngalan ni Jehova nga Diyos nalangkit. Kay mao ang Maglalalang, ang kinalabwang panig-ingnan sa kahapsay ug katukma-sa-panahon, siya nagapasalig kanato nga siya molihok sa iyang nahaigong panahon ug paagi, ug kini pinaagi sa iyang Gingharian. Sa pagkamatuod, kanang maong Gingharian dili kay butang nga dili tino ug lubog kondili maoy usa ka langitnong kagamhanan, nga makataganag pagdumala ug progresibong instruksiyon sa pag-atubang sa tinuod nga mga panginahanglan sa tawo.—Isaias 48:17, 18.
Ang usa ka batang walay balay makabutang sa kasingkasing sa mga pulong ni David sa Salmo 27:10: “Kon ugaling biyaan ako sa akong amahan ug akong inahan, si Jehova mismo magadawat kanako.” Makapadasig usab ang pagkahibalo nga ang kabos nga kahimtang sa kalibotan dili magdiskuwalipikar sa usa nga makakat-on sa kabubut-on sa Diyos. Ang Proverbio 22:2 nagaingon: “Ang dato ug ang kabos nagtagbo. Ang Magbubuhat nilang tanan mao si Jehova.” Oo, ang mga timawa, kon sinsero, makatino nga si Jehova nga Diyos andam motabang kanila.—Salmo 10:14, 17.
Si Jehova interesado sa atong kaayohan ug nasayod kon unsaon pagtagana sa atong angayang mga tinguha. Kas-a nangutana siya sa mga Israelinhon pinaagi sa propetang si Isaias: “Dili ba kini ang puasa nga akong gipili? . . . Dili ba ang pagpakigbahin sa imong tinapay uban sa gigutom, ug nga imong pasudlon sa imong balay ang sinakit, walay-balay nga mga tawo? Nga, kon ugaling ikaw makakitag hubo, siya imong tampian?” (Isaias 58:6, 7) Kini mao ang panag-angay ug hustisya nga ipatungha sa Diyos pinaagi sa iyang Ginghariang kagamhanan. Walay mausa ang dili panumbalingon o tratahon nga daw siya wala diha. Busa, ang Salmo 145:19 nagapahibalo kanato: “Pagatagbawon niya ang tinguha niadtong nahadlok kaniya, ug pagapatalinghogan niya ang ilang pagtuwaw alang sa tabang, ug sila pagaluwason niya.” Ang gugma sa Diyos ug isigkatawo mao ang pangunang puwersa sa paghiusa sa tawhanong pamilya. Ingong sangpotanan, ang suliran sa mga batang walay balay masulbad. Walay mausa ang pasagdang mag-inusara!
Ang Pagkadili-Hingpit sa Tawo Mobabag ba sa Katuyoan sa Diyos?
Dili, ang daotang mga kiling sa tawo dili tugotang mobabag sa katuyoan ni Jehova nga himoon ang yuta nga usa ka paraisong kahimut-anan. Kadtong makapribilehiyo sa pagpuyo sa bag-ong kalibotan sa Diyos, tungod kaha kay makalabang-buhi sila sa gubat sa Armageddon, sumala sa gibatbat diha sa Bibliya, o tungod kay sila mabanhaw gikan sa mga patay aron mabuhi pag-usab sa yuta, madasig sa pagbuhat sa ilang labing maarangan.—Juan 5:28, 29; Pinadayag 16:14, 16.
Walay mausa nga mosanong ang makakaplag nga kawang ang iyang buhat. Ang iyang buhat pagagantihan. Matikdi, palihog, ang saad sa Diyos: “Dili sila magatukod ug lain ang magapuyo; dili sila magatanom ug lain ang magakaon. Kay sama sa mga adlaw sa usa ka kahoy mao ang mga adlaw unya sa akong katawhan; ug ang buhat sa ilang kaugalingong mga kamot pagapahimuslan sa bug-os sa akong mga pinili. Sila dili magahago sa walay kapuslanan, ni sila manganak alang sa kagul-anan; tungod kay sila mao ang mga kaliwat nga binulahan ni Jehova, ug ang ilang mga anak magauban kanila.” (Isaias 65:22, 23) Dili ba ikaw ug ang imong pamilya buot makakita sa katumanan nianang mga pulonga? Ug makapalipay gayod nga unya dili ka na makakita sa bisan diin sa kagutmanan, kakabos, kawalay-trabaho, o mga batang walay balay!
Sa walay pagduhaduha, kadtong sa pagkakaron nagaantos sa mga kawalad-on, sama sa mga batang walay balay, mopabili nga bug-os pa sa mga panalangin sa usa ka malipayong pamilya ug sa hamugaway nga balay. Sumala sa atong mabasa sa Isaias 65:17: “Ang unang mga butang dili na pagahinumdoman, ni motungha sa kasingkasing.” Ang mga tawong makapribilehiyo nga mabuhi unya makakaplag nga ang daotang mga kahimtang mawala sa walay kataposan ug ang katawhan sa tanang nasod, mga pinulongan, ug mga rasa magabuhat nga nagkahiusa sa mahigugmaong pag-igsoonay. Ang mga pamilya nga mabuhi hangtod nianang panahona pihong mopadayon sa paghimaya sa Diyos. Ang Salmo 37:11 nagaingon bahin nianang yutan-ong Paraiso: “Ang mga maaghop magapanunod sa yuta, ug sila makakaplag sa ilang tumang kalipay sa kadagaya sa pakigdait.”
Sa Unsang Paagi Makapangandam Ka Alang sa Umaabot?
Bisan karon, posible ang pagkabatog mohatag-kinabuhi nga kahibalo ug pag-ugmad sa tilinguhaong mga hiyas, sama sa gugma ug kalulot. Sa unsang paagi? Gihigugma ni Jehova ang tawhanong pamilya, ug pinaagi sa iyang Anak, si Jesu-Kristo, Siya ‘nagakabig sa mga tawo kang Kristo’ pinaagi sa pagsusi sa Iyang Pulong ug sa Iyang katawhan. (Juan 6:44) Siya may organisasyon usab sa yuta nga may programa sa pagtudlo nga makatabang nimo sa pagbuhat sa kabubut-on sa Diyos mao nga makapanglantaw ka sa usa ka malipayon ug makahuloganong kinabuhi sa walay kataposan. Busa, ang maayong balita sa Gingharian sa Diyos ginawali ngadto niadtong nagkinahanglan. (Mateo 24:14) Ang Pulong sa Diyos nagaingon: “Ang usang nagatamay sa iyang isigkatawo nagapakasala, apan malipayon siya nga nagapakitag kaluoy sa mga sinakit.” (Proverbio 14:21) Makapadasig ang pagkahibalo nga bisan ang mga ubos ug kahimtang makaduol sa Diyos kon matarong ang ilang motibo. Ang salmista misulat: “Apan ako sinakit ug kabos. Oh Diyos, lihok sa madali alang kanako. Ikaw mao ang akong panabang ug ang Magtataganag kaikyasan alang kanako. Oh Jehova, ayaw paglangan.”—Salmo 70:5.
Oo, ang Pulong sa Diyos makahatag nimog tinuod nga paglaom alang sa umaabot. Bisan pa niana, ang kasagarang paggamit sa pulong “paglaom” wala magpasabot sa kanunay sa kapiho. Sa Brazil ang usa kasagaran makadungog sa pamulong: “A esperança é a última que morre” (susama sa Ingles nga “Hope springs eternal”). Ang ideya mao ang pagpabiling malaomon bisan pag daw walay pasikaranan alang niana. Sa kasukwahi, ang Kasulatan nagataganag lig-ong mga katarongan sa paghupot ug lig-ong pagtuo sa Diyos ug paglaom sa iyang mga saad. Atong mabasa sa Roma 10:11: “Walay mausa nga nagasandig sa iyang pagtuo diha kaniya ang mahiubos.” Ang maong paglaom nga gipasukad sa Bibliya dili mosangpot sa kapakyasan. Maingon nga ang mga kahibulongan sa atong yuta maoy tinuod, nga nagapamatuod sa kaalam ug gugma ni Jehova, ang katumanan usab sa mga tagna sa Bibliya nagatugot nimo sa pagbatog positibong panglantaw, usa ka tinuod nga paglaom alang sa umaabot.—Roma 15:13.
Ang Gingharian sa Diyos mao ang tinuod nga solusyon sa mga batang walay balay, oo, alang sa tanan nga nahigugma kon unsay matarong. Ang pagbatog tukmang kahibalo sa Bibliya karon mopaarang nimo sa pagtagamtam sa kalipay ug kinabuhing walay kataposan sa bag-ong kalibotan sa Diyos. Ang pagdahom sa maong mga saad dili bunga sa handurawan. Sumala sa ginapahayag sa Proverbio 11:19: “Ang lig-ong nagabarog dapig sa pagkamatarong nahalinya alang sa kinabuhi.”
[Kahon sa panid 11]
Usa ka Temporaryong Solusyon?
Ang usa ka kamot nga gibuklad sa batang minghoy ug dagway makatandog sa kasingkasing. Apan ang mahunahunaong mga tawo dili mahibalo kon unsaon pagtabang ang batang walay balay. Aron dili kaayo mobatig sala, ang pila ka tawo mohulog ug pila ka sentabos sa kamot sa bata ug dayon molakaw. Bisan pa niana, gamay kaayo ang purohan nga ang gilimos gastohon alang sa pagkaon o puy-anan. Hinunoa, basin kana mosangpot nga gigamit sa pagpalit sa mga droga o maisog nga ilimnon. Busa, ang pila ka mahunahunaon-sa-lungsod nga hamtong nagahatag sa ilang pagtagad ug salapi ngadto sa mga programang gipasiugda sa lokal nga gobyerno nga gibati nila motabang sa mga batang walay balay. Ang ubang tawo nagtuo nga ang mas praktikal nga paagi sa pagsulbad mao ang pagtudlo sa batang walay balay ngadto sa tukmang ahensiya alang sa hinabang. Niining paagiha, ang mahunahunaong mga lungsoranon mobati nga sila nagasulay sa paghimo sa ila mismong komunidad nga mas makitawhanon.
[Hulagway sa panid 9]
“Sila dili magatanom ug lain ang magakaon.”—Isaias 65:22
[Credit Line]
Letrato sa FAO
[Hulagway sa panid 10]
“Kay sama sa mga adlaw sa usa ka kahoy mao ang mga adlaw sa akong katawhan.”—Isaias 65:22