Kon Kanus-a nga ang AIDS Dili Hulga

Sa gabii sa Oktubre 3, 1984, ang bata nga si Kyle Bork gipanganak nga pito ka bulan nga sayo. Ang iyang gamay nga mga baga atas pa aron moobra sa husto, busa siya gibalhin sa 56 ka kilometros nga gilay-ong Children’s Hospital sa Orange County, diin ang mga gamit mabatonan sa pag-atiman alang sa mga bata nga grabe ug sakit.

Ang doktor nagpatin-aw nga ang dugo ni Kyle kinahanglan nga hulipan pinaagi sa pagdugang ug dugo; kay kondili seguradong mamatay siya. Bisan pag lisod kaayo kadto sa mga ginikanan, sila mibarog nga malig-on sa ilang binase-sa-Bibliya nga desisyon sa dili pagtugot nga dugangan ug dugo ang ilang anak. (Genesis 9:4, 5; Levitico 17:10-14; Buhat 15:28, 29) Ang doktor masinabtanon ug mapaluyohon. Apan, siya miingon, kon ang situwasyon mahimong kritikal kaayo, siya mokuhag mando sa korte ug mohimog pagdugang sa dugo.

Talagsaon, si Kyle anam-anam nga miarang-arang, ug sa sa adlawng ikasiyam, siya gikuha gikan sa respirator. Sa milabay ang duha ka adlaw gidala na siya sa mga ginikanan sa balay, ug siya mitubo nga usa ka malipayon, himsog nga bata, sumala sa imong makita sa hulagway. Apan dili kana ang kataposan sa sugilanon.

Sa miaging tuig usa ka balita sa telebisyon sa Los Angeles nagtaho nga ubay-ubayng mga bata nga naospital sa Children’s Hospital of Orange County sa panahon nga si Kyle didto natakdan ug AIDS gikan sa mga pagdugang sa hugaw nga dugo. Ang hospital naningkamot sa pagkontak sa mga pamilya sa gibanabanang 3,000 ka bata aron nga sila masusi alang sa virus sa AIDS.

Dihadiha, ang mga ginikanan ni Kyle mitawag sa ospital aron sa pagtino nga siya wala kadugangig dugo nga wala sila mahibalo. Wala magdugay, ang ospital mitubag kanila sa pagpasalig nga siya wala dugangi ug bisan unsang dugo busa walay kapeligrohan nga matakdan sa AIDS. “Kami miluhod ug mipasalamat kang Jehova,” miasoy ang mga ginikanan, “sa paghatag kanamo sa iyang matarong nga mga kasugoan ug kalig-on sa pagpabilin diha sa among integridad atubangan sa maong pagsulay.”