Kahibulongang May Kolor Rosas

Langgam nga flaminggo! Mao kanay paghubit sa karaang Grego sa phoenix, usa ka langgam sa sugilambong nga namatay diha sa kalayo ug sa ulahi mitungha gikan sa mga abo. Sa mga kasiglohan kanhi, ang ngalang phoenix gibalhin diha sa usa ka tinuod nga langgam, ang flaminggo [Phoenicopteridae]. Kini nagkinabuhi sa ngalan nga mas maayo kay sa sugilambong. Ang panon sa mga langgam nga naglupad maoy usa ka talan-awon nga dili-hitupngan ang katahom​—nga naghugong, nagbudyong, nga “unos sa kalayo” nga kolor rosas, itom, ug lutong pagkapula nga mitabon sa panganod.

Ug ang usa ka flaminggo maoy katingad-anan sa desinyo, gikan sa ulo hangtod sa tiil. Tan-awa ang sungo, usa ka linginon, may tabon nga kahon, nga bawog ang tumoy modapat sa yuta sa ilalom sa tubig samtang ang iyang ulo mongadto-nganhi nga nagapangitag pagkaon diha sa mabaw nga tubig. Sa sulod, ang sungo adunay mga balokag nga nagaali sa dagkong mga butang nga mosulod samtang nagsala sa gagmay, makaon nga mga lumot-lumot ug uban pa, samtang ginabomba sa dila ang tubig pasulod ug pagawas. Ang mga balyena lamang ang nagakaon nga sama niini, nagasala sa gagmayng mga pasayan pinaagi sa ilang baleen.

Ang liog ug mga tiil sa flaminggo, maayong pagkaangay, ang labing taas ug tiil taliwala sa mga langgam. Ang gitas-on sa flaminggo mokapin usahay sa 1.8 ka metros. Ang samag tukon nga mga tiil niini nahiangay kaayo sa kinabuhi diha sa mabaw, paratong mga lanaw. Mopahulay gani kini samtang magtindog diha sa tubig, luwas gikan sa mga manunukob, ug diha sa bakikaw nga posisyon​—nagbarog sa usa ka tiil! Ang mga eksperto nag-ingon nga ang katuyoan sa pagbarog sa flaminggo sa usa ka tiil maoy sa pagpapahulay sa pikas tiil. Ang linain nga ugat nakahimo sa langgam sa pag-akob sa batiis nga hugot, samag tukon. Ang maayo kaayong panimbang nakatabang usab.

Naglisod ang mga ebolusyonista sa pagtuki sa sinugdanan sa flaminggo. Alang kanila, kini sa usa ka paagi samag gangsa, sa uban samag talabong, ug sa uban pa samag tikling. Mahimong atong idugang nga kini mokaon sama sa balyena ug matulog samag nagbarog nga lampara. Apan dili angay libogon nato ang atong kaugalingon kon diin kini gikan. Usa ka intelehenti lamang nga Tigdesinyo ang makahimo ug ingon niini nga kahibulongan.