Mahinlong Yuta—Gikinahanglan Nato Kini
Sinulat sa koresponsal sa Pagmata! sa Britanya
NASAYOD ba ka nga ang mga drayber ug taksi sa London giobligar sa balaod sa paghupot sa ilang mga taksi nga mahinlo? Ang pagkapakyas sa pagbuhat niini mahimong mosangpot nga sila dili padaganon sa kadalanan sa siyudad sa usa ka yugto sa panahon. Bisan pag daot ang karsada ug ang kadaghanang kotse mahugaw sa daghan nga adlaw, ang taksi sa London mahinlo kaayo. Ang nag-idlak nga lawas sa sakyanan nagapatungha sa mga pagbati sa garbo ug kalipay diha sa drayber ug sa iyang mga pasahero.
Sa susama, sa diha nga hinlo ang atong balay, atong sinina, ug atong mga butang, kana mopausbaw diha kanato sa maayong pagbati. Alaot ang batang lalaki kansang inahan makakita nga siya mosulod sa balay ug magbilig agi sa lapok sa alpombra gikan sa iyang hugawng botas!
Sa pagkamatuod, ang maayong panglawas nagadependeg dako sa kahinlo sa lawas. Ang atong lawas nagkinahanglag regular nga pag-atiman ug panghinlo aron mawagtang ang hugaw nga mahimong sukaran sa sakit. Ang komersiyal nga mga kompaniya dako kaayog masapi sa pagbaligyag mga cleanser, deterhente, mga pasinaw, mga sabon, shampoo, ug pamatay sa kagaw nga atong gigamit aron kita ug ang atong palibot magmahinlo. Sa pagkamatuod, ang kadaghanang tawo mahunahunaon sa panginahanglan sa kahinlo. Apan kon nagapuyo ka sa siyudad, nasayod ka nga kini dili mao ang tibuok nga estorya.
Kapeligrohan—Polusyon
Ang mga nagapuyo sa siyudad nasayod pag-ayo sa polusyon ug sa nahugawang palibot. Ila kining makita diha sa wala-mahipos nga basura, sa sagbot nga sa kadanghag gibiyaan sa mga karsada, ug sa ngil-ad nga sulatsulat diha sa publikong mga tinukod. Mabahoan nila kini sa makalisod-sa-gininhawang binuga gikan sa daghan kaayong sakyanan ug sa halang nga anuos nga nagasakit sa pipila ka siyudad.
Tingali kana ang hinungdang daghang nagpuyo sa mga siyudad maningkamot usahay nga magpalabay sa panahon diha sa banika. Mahimuot sila sa pagpuno sa ilang mga baga sa hinlong hangin, tingali sa pag-inom pag tin-aw sama sa kristal nga tubig gikan sa usa ka sapa sa bukid. Ang uban gustong moadto sa baybayon ug maghigdahigda sa balas o magpabugnaw pinaagi sa kahimut-anang pagtuslob sa dagat.
Apan, hulat sa makadiyut! Ang hugaw ug polusyon nagapahipi usab didto. ‘Sa unsang paagi maingon?’ tingali mosukna ka. ‘Hinlo kaayo kining tan-awon.’ Aw, sud-ongon nato pag-ayo kanang “hinlong” hangin ug “tin-awng” tubig.