Gikan sa Among mga Magbabasa
Pubertad Walay artikulo nga labing gikinahanglan sa among pamilya kay sa “Mga Batan-on Nangutana . . . Unsay Nagakahitabo sa Akong Lawas?” (Enero 22, 1990) Ang akong anak nga babaye nagasinatig kausaban sa iyang lawas nga akong gibati nga ako kulang ug impormasyon aron makapatin-aw. Kining artikuloha nakatabang kanako sa paglingkod nga haruhay uban sa akong anak nga babaye ug sa pagbasa niini uban kaniya. Kini nagbukas kaniya sa libreng pagpahayag sa iyang mga kabalaka. Salamat kaninyo sa paghimo sa akong buluhaton nga mas masayon.
J. K., Tinipong Bansa
Mga Kombensiyon sa Polandiya Ako ug ang akong pamilya nakapribilehiyo sa pagtambong niadtong mga kombensiyona [sa mga Saksi ni Jehova]. (Disyembre 22, 1989) Ang libreng pakig-uban sa mga igsoon gikan sa Unyong Sobyet ug sa Czechoslovakia, diin ang kadaghanan kanila mibiyahe uban ang dakong personal nga pagsakripisyo, makalipay kaayo. Ang pagkakita ug mga Russo ug Amerikanong mga igsoon nga naghalogay sa usag usa maoy hilom nga pamatuod kon diin nagalihok ang espiritu sa Diyos karong adlawa.
I. L. Pederal nga Republika sa Alemanya
Panglimbong Diha sa Siyensiya Ang inyong artikulo bahin sa panglimbong diha sa siyensiya (Enero 22, 1990) mopatim-aw nga nagabutangbutang halos sa tanang mga siyentipiko. Ingong propesyonal nga kemista, ako nahibalo ug nagtunglo sa panglimbong. Apan ang inyong mga artikulo maisip nga bahin sa inyong kusganong gihukman. Ang inyong unang artikulo nasudlan ug dili orihinal nga teksto (Panundog ba Kini?) kondili nagbutang ug “pinili” nga mga ulohan. Wala hisgoti sa ikaduhang artikulo ang bahin sa kadaghanang mga siyentipiko nga wala manglimbong. Dili ba propaganda kini? Kining matanga sa pagtaho nagadaot sa inyong pagkakatuohan.
W. M., Tinipong Bansa
Among giapresyar kining prangka nga mga pahayag. Kami walay tinguha sa pagdaot sa mga siyentipiko ingong usa ka grupo. Among gipadayag sa sinugdan nga ang “dayag nga panglimbong hayan talagsa ra.” Ug kami mouyon nga ang dakong bahin sa mga siyentipiko mga matinud-anon. Apan, ang kadaot nga nahimo sa pipila ka limbongan dako kaayo diin ang paghukom sa siyentipikanhong panglimbong sa labing ugdang nga mga pinulongan daw nahiangay. Kami nagtuo usab nga ang pagpresentar sa teoriya sa ebolusyon ingong kamatuoran maoy usa ka porma sa panglimbong sa labing dako nga sukod—usa ka panglimbong diin ang kadaghanan sa siyentipikanhong komunidad nakigbahin. Bisan unsa pa man, ang ulohang mga artikulo nga gikutlo dinhi dili linimbong tungod kay ang ilang mga tuboran dayag man nga gipaila. Ang mga pangutlo maoy gikan sa iladong mga tuboran ug nagsilbi sa pag-ilustrar sa sukod sa problema sa siyentipikanhong panglimbong.—ED.
Glaucoma Human nabasa ang artikulo bahin sa glaucoma (May 8, 1988), nagpasusi ang akong bana sa iyang mga mata, ug nakakaplag nga ang mga simtoma nga iyang gibati dili glaucoma kondili usa ka butang nga mas seryoso pa. Tungod sa pagbasa sa artikulo, kami nakahimog mga plano alang sa umaabot ug sa pagpalakaw sa iyang umaabot nga pagretiro.
E. D., Tinipong Bansa
Mga Sagbot sa Dagat Salamat sa inyong artikulo bahin sa sagbot sa dagat. (Enero 22, 1990) Sa wala pa makabasa niini, wala gayod sa akong handurawan ang tanang mga hiyas nianang dili-makataronganon—sama sa akong naamgohan karon—nga pagtawag niana nga “danlogon, makapikal.” Akong gipakigbahin kining impormasyona diha sa uban.
G. S., France
Mga Umagad-Ugangan Salamat kaayo kaninyo sa inyong artikulo bahin sa suliran uban sa mga ugangan-umagad. (Pebrero 22, 1990) Ang akong bana ug ako nag-ipon ug puyo uban sa iyang inahan sa usa ka tuig. Kada adlaw, ang tago nga pag-indigay nakamugna ug dakong mga kasakit. Sa dihang naglain kami ug puyo, ang situwasyon miuswag. Nakadangat ako sa dugang ug dugang nga pag-apresyar karon sa iyang tambag. Apan ang iyang pag-awhag sa pagtanyag ug pagtultol nagpabiling hinungdan sa kasuko. Pagkadako sa pagsabot ug lalom nga pagbati ang gipahayag niining artikuloha! Gilaoman nga daghang mga bana, mga asawa, ug mga ugangan-umagad makabaton ug kaayohan gikan sa maayo kaayong tambag niini.
A. T. G., Netherlands