Panglimbong Diha sa Siyensiya—Kini Nahimong Ulohan sa mga Balita
Ang larawan sa mga siyentipiko nga dedikado sa kamatuoran nadaot, sama sa makita sa mosunod nga mga ulohan sa balita.
“Etika Diha sa Siyensiya”
“Nagkainit ang pag-awayay diha sa Balay sa mga Representante sa T.B. bahin sa panglimbong, daotang-gawi, ug panagbangi sa interes sa siyensiya.”—Science, Hulyo 7, 1989.
“Ang mga Siyentipiko Manglimbong Ba?”
“Human sa unang pag-usisa niining [kongresyonal] nga komite bahin niining ulohana, ang komite adunay nagdakong katarongan sa pagtuo nga kita nagpakakita lamang sa tumoy sa usa ka alaot kaayo, peligroso, ug importenteng dakong yelo.”—Sibya sa NOVA diha sa PBS (Public Broadcasting Service) sa Oktubre 25, 1988.
“Duha ka Bag-ong Pagtuon Nangutana Nganong Manglimbong ang mga Siyentipiko”
“Usa kadto ka pangutana nga walay daotang tuyo: unsay paggawi sa mga siyentipiko kon walay magtan-aw? Apan kini nakamugnag makapasilaob nga tubag: dili kaayo maayo, matud pa sa mantalaan niining bulana diha sa Britanikong basahong Nature.”—Newsweek, Pebrero 2, 1987.
“Nasod ba Kini sa mga Bakakon? Gipalsipikar sa mga Siyentipiko ang Panukiduki”
“Giakusar sa usa ka pagtuon nga gipatik sa miaging bulan ang 47 ka siyentipiko sa mga tunghaan sa medisina sa Harvard ug Emory University sa pagpagawas ug sayop nga mga sinulat.”—U.S.News & World Report, Pebrero 23, 1987.
“Ang NIH Nakakitag Pagpanundog Diha sa Basahong Vision”
“Ang grupo sa mga eksperto nag-ingon nga gikuha sa tigdukiduki ang impormasyon gikan sa sinulat sa iyang kauban nga iyang gisubli ug gigamit kini alang sa iyang kaugalingong panukiduki; . . . ang NIH [National Institute of Health] misugyot ug mga husay aron siya mapahawa.”—Science, Hulyo 14, 1989.
“‘Mapinatuyangong Gawi’ Nagpasanay ug Panglimbong Diha sa Laboratoryo”
“Ang mga siyentipiko sa biomedika sa Amerika naghimog dinanghag ug usahay linimbong nga panukiduki sa pagpaningkamot sa pagpatik ug dugang mga basahon ug sa pagkakitag dugang kuwarta.”—New Scientist, Pebrero 25, 1989.
“Gibalik sa mga Tigdukiduki ang Natad sa Panglimbong”
“Ang siyentipikanhong panglimbong ug kadanghag taliwala sa mga tigdukiduki hayan kaylap, nagpasidaan ang usa ka pagtuon sa miaging isyu sa Nature.”—New Scientist, Enero 22, 1987.
“Ang Tigdukiduki nga Giakusar nga Nanundog Miretiro”
“Ang biokemista nga giakusar sa pagsundog sa report sa National Academy of Sciences alang sa usa ka libro bahin sa nutrisyon ug kanser miretiro sa iyang posisyon sa Cleveland Clinic Foundation.”—Science, Septiyembre 4, 1987.
“Ang Pildoras: Ang mga Pagsulay sa Propesor sa Pagkaluwas sa Peligro Dili Tinuod”
“Ang iyang panglimbong nakapaduhaduha sa pagkaluwas sa peligro bahin sa mga pildoras nga ginatomar sa 2 m[ilyones] ka babaye sa Britanya ug 10 m[ilyones] sa tibuok-kalibotan.”—The Sunday Times, Septiyembre 28, 1986.
“Ang Senyor nga Tigdukiduki sa mga Droga Miretiro sa Kaulaw”
“Siya miretiro sa miaging semana human nga natukian sa usa ka independenteng komite sa imbestigasyon nga sad-an siya sa siyentipikanhong panglimbong.”—New Scientist, Nobyembre 12, 1988.”
“Ang NIMH Nakakaplag ug Kaso nga ‘Seryosong Daotang Gawi’”
“Sa katingalahan usa ka dugay na, dayag ug tinuyo nga kaso sa siyentipikanhong panglimbong sumala sa pasiunang report bahin sa usa ka imbestigasyon ang gihimo alang sa National Institute of Health.”—Science, Marso 27, 1987.
“Gihiloan ang Ivy League sa ‘Panglimbong’ sa Panukiduki”
“Usa ka prominenteng sikyatrista nga taga Boston miretiro ingong pangulo sa usa ka ospital sa mga buang nga konektado sa Harvard University, human sa mga sumbong sa pagpanundog.”—New Scientist, Disyembre 10, 1988.
“Ang Kaso sa ‘Nasalaag’ nga Fossils”
“Nasusi sa usa ka prominenteng Australiano nga siyentipiko ang duha ka dekadang panukiduki bahin sa karaang geolohiya sa Himalaya ug nag-ingon nga kini mao tingali ang labing dakong paleontolohikal nga panglimbong sa tanang panahon.”—Science, Abril 21, 1989.
“Turno na Usab Karon sa mga Basahon nga Maatake”
“[Maoy iyang gihisgotan] ang dili maayong pagdumala sa mga basahon sa [siyensiya] bahin sa siyentipikanhong panglimbong. . . . Ang mao gihapong mensahe nga gipadala na ngadto sa ubang mga sakop sa siyentipikanhong komunidad karon gitumong sa mga basahon: pagtarong kamo kay kon dili inyong makaplagan ang mga magbabalaod nga moutingkay niana.”—The AAAS Observer, Hulyo 7, 1989.