Gikan sa Among mga Magbabasa

Dinosaur Akong nakita ang Pebrero 8, 1990, nga gula bahin sa mga dinosaur nga makaiikag. Tin-aw nga pagpahubit, maayong pangatarongan, masabtan sa may-kahibalo ug walay alamag, kining mga artikuloha makawiwili. Akong giisip ang akong kaugalingon nga daghan-kaayog nahibaloan bahin sa mga dinosaur apan karon nakaamgo nga ang akong kahibalo maoy kasagaran ra.

U. A., Pederal nga Republika sa Alemanya

Dugay na akong nahibulong kon unsay nahitabo sa mga dinosaur. Bisag anaa na ako sa ikaupat nga ang-ang sa hayskol, wala pa gayod ako makadungog ug sama ka realistiko ug katuohan nga tubag.

S. S., Tinipong Bansa

Ang akong anak nga lalaki, nga kuwatro anyos pa lamang, nalingaw kaayo sa mga ilustrasyon, sanglit maikagon kaayo siya niining dagko kaayong mga dinosaur. Nalingaw ako sa inyong kahibulongan nga mga artikulo sukad sa Nobyembre, sa nagsugod ako sa pagtuon sa Bibliya. Pagkaanugon nga daghan kaayo ang akong nasipyatan!

M. G., Mexico

Bawtismo Mapasalamaton ako alang sa artikulong “Mga Batan-on Nangutana . . . Magpabawtismo ba Ako?” (Marso 22, 1990) Ang eksperyensiya ni Susana sa sinugdan sa artikulo nagtugob sa akong kasingkasing sa emosyon. Nagpahinungod ako sa Diyos samtang siksto grado pa ako diha tunghaang elementarya, ug kini nakatabang kanako sa pagpabiling malig-on sa pagtuo. Dili ba katingalahan kon ang tanang Kristohanong mga batan-on magpakita ug samang debosyon sama sa Etiopianhong eunoko ug nangutana, “Unsay nakaulang sa akong pagpabawtismo?”​—Buhat 8:36.

M. A., Hapon

Greenhouse Effect Ako 15-anyos nga estudyante sa hayskol ug buot mopahayag sa akong apresasyon alang sa Enero 22, 1989, nga artikulo bahin sa ozone layer ug sa Septiyembre 8, 1989, nga mga artikulo bahin sa greenhouse effect. Pinaagi sa paggamit sa impormasyon niining mga artikuloha, ako nakasulat ug artikulo bahin sa topikong konserbasyon, nga niini gihatagan ako ug dako nga grado.

J. B., Australia

Mga Karera sa Pagmodel Salamat kaayo kaninyo alang sa inyong artikulo bahin sa mga karera sa pagmodel. (Enero 8, 1990) Ang akong anak nga babaye maoy bata nga model sa wala pa kami magsugod sa pagtuon sa Bibliya. Among gihisgotan ang artikulo. Tinuod kaayo kadto; ang epekto sa pagmodel diha sa akong anak nga babaye sa mao nga edad nagpabati kaniya nga siya ang numero uno, labing maayo kay sa uban. Kaming duha nagpasalamat kaninyo alang sa artikulo. Ang akong anak nga babaye dili na model, ug si Jehova nga Diyos mao ang numero uno sa iyang kinabuhi​—imbes ang iyang kaugalingon.

N. J., Canada

Dyipni Ako tigbasa ug Pagmata! sa napulo na ka tuig. Wala nay lain pang ikatandi nga basahon kon bahin na sa pagpilig materyal, mga hulagway, ug katukma sa pagkapresentar. Gusto kong isulti kini sa dugay nang panahon, apan human nakabasa sa Nobyembre 22, 1989, nga artikulong “Dyipni​—Ang Sakyanan sa mga Tawo sa Pilipinas,” dili na ako makapugong pa. Makaiikag kaayo ang pagkasayod kon sa unsang paagi ang mga tawo sa ubang bahin sa kalibotan nagakinabuhi. Ang realistikong paagi sa pagpresentar sa Pagmata! sa materyal dili lamang naghatag impormasyon kanato kondili nagadala kanato ngadto niining mga dapita!

E. P. S., Brazil

Operasyon sa Utok Dili ako makapugong sa mga luha sa nagbasa sa eksperyensiya ni Bethel sa Abril 22, 1990, nga gula. Nagpasalamat ako kang Jehova nga siya nabuhi sa iyang operasyon sa utok. Ang batan-ong babaye nga may ingon ka taas nga espirituwal nga mga tumong ug lig-ong pagtuo atubangan sa kamatayon takos sa atong pagdayeg. Sama ako ug edad ni Bethel ug adunay samang mga tumong. Ug bisan pa nga nanghinaot ako nga dili ako makaagom sa samang situwasyon, naglaom ako nga ang akong pagtuo makaatubang sa pagsulay nga may samang malipayong mga sangpotanan.

T. V., Italya