Usa ka Karera sa Pag-awit nga Nagadalag Mohangtod nga Kalipay
SAYO sa akong kinabuhi, akong gidedikar ang akong kaugalingon sa usa ka karera sa pag-awit. Sa igong panahon naestablisar nako ang reputasyon sa pagkamag-aawit sa fado. Kini ang linain, mamingawong matang sa musika sa Portugal. Sa wala madugay nagkanta na ako sa ubang mga siyudad sa Portugal ug sa pangunang estasyon sa radyo sa Portugal, ang Emissora Nacional.
Dayon gihikay sa impresario o tagdumala nako sa awit ang usa ka paglibot sa Espanya, nga naglakip sa mga siyudad sama sa Madrid, Barcelona, Zaragoza, ug Bilbao. Human sa usa ka pasundayag sa Pransiya, gigugol ko ang kapig duha ka tuig sa Angola, Aprika. Didto ako mikanta sa sunodsunod nga siyudad, ug niadtong 1972, ako napiling “Hara sa Fado.”
Bisan pa niana, kay soprano man, ang klasikal nga musika maoy akong pangunang hilig. Busa sa pagbalik sa Lisbon, gisugdan ko ang musikal nga mga pagtuon niining matanga sa musika. Ugaling, bisan pag gibug-os ang akong pagtagad diha sa karera sa pag-awit, ako dili tinuod nga malipayon. Sa akong kahiladman may kahaw-ang sa espirituwal. Gitinguha ko nga mobati sa kasuod uban sa Diyos, apan wala ako mahibalo kon unsaon sa pagduol kaniya.
Niadtong 1973 didto ako sa Brazil sa usa ka paglibot sa pag-awit. Usa ka gabii, human sa usa ka presentasyon sa TV, kaming nagpasundayag giimbitar sa usa ka parti. Sa wala madugay ang asawa sa akong Brazilianong tagdumala sa awit nagpapahayag sa among mga hunahuna bahin sa makaguol sosyal nga mga kahimtang ug mga panghitabo sa kalibotan. Ako nakadayeg sa iyang pagkaprangka sa masaligong pagsugyot nga ang Diyos mahimong may tubag nga angay sa among pagtagad. Ako nagpahibalo nga ako nagtuog Diyos. Sa wala pa matapos ang gabii, maluluton siyang mitanyag kanako sa usa ka libro nga nag-ulohang Ang Kamatuoran nga Motultol sa Kinabuhing Dayon. Sa ulahi lamang nako hiamgohi nga siya usa sa mga Saksi ni Jehova.
Ang Kataposan Kong Rekord
Wala madugay human niadto, ako mibalik sa Portugal sa paggama sa akong ikatulong rekord, uban ang bug-os nga tuyo nga mobalik sa Brazil aron ipadayon ang akong paglibot. Wala ako makaamgo niadto nga kadto na ang kataposan kong rekord.
Samtang didto ako sa Lisbon, ang usa ka batan-ong babaye miduaw sa akong balay ug misugod sa paghisgot sa mga panalangin nga ipatungha sa pagmando sa Gingharian sa Diyos niining yutaa. Ako namati pag-ayo samtang iyang gibasa gikan sa Bibliya ang labing makaiikag ug kahinangpang kausaban nga gisaad sa Diyos niadtong nangandoy sa pagkamatarong.
Ang akong gipamatian dako kaayog epekto diha kanako. Ako nangandoy sa mga kahimtang mismo nga iyang gibatbat gikan sa Bibliya. Kadto nakahupay kaayo kanako kay bisan pag batan-on, ako diborsiada na, kay ang akong bana nakigtaban sa laing babaye.
Mahanduraw nimo ang akong katingala sa dihang sunod gitanyagan ako niining bayhana sa samang libro nga akong nadawat sa Brazil! Ang mga kabildohay nga misunod mipukaw diha kanako sa kaamgohan nga may butang labi pang bililhon kay sa kabantogan o bahandi. Determinado ako nga makakat-on ug dugang bahin sa kahibulongang mga saad nga hikaplagan diha sa Bibliya.
Usa ka Dakong Desisyon
Ang akong senemanang pagtuon sa Bibliya maoy labing makapalipay nga kasinatian. Sa madali akong nasugdan pag-ugmad ang suod personal nga relasyon uban sa akong Maglalalang, si Jehova nga Diyos.
Tinuod, may lisod nga mga gutlo human ako mohukom nga biyaan ang akong dakog-sapi nga karera ingong propesyonal nga mag-aawit. Naagoman ko ang dakong pagpiit nga mobalik sa Brazil. Dayon gitanyagan akog kontrata sa pagpasundayag sa Porto sa amihanang Portugal. Ang ideya mao nga pinaagi sa pagpahilayo nako sa Lisbon, basin mausab ang akong hunahuna ug magpadayon sa akong karera sa pag-awit.
Ugaling, nahimo na ang akong desisyon. Mihukom ako nga moadto sa Pransiya aron mopuyo sa minyo kong igsoong babaye aron ako bug-os mahigawas sa mga panghaylo nga mobalik ako sa kalibotan sa kalingawan. Apan sumala sa misangpot, siya ug ang iyang bana grabeng misupak sa akong bag-ong-kaplag nga pagtuo. Dili gani sila motugot nga ako magbaton sa akong senemanang pagtuon sa Bibliya diha sa ilang balay. Nga wala mahadlok, gibiyahe nako ang 30 kilometros idabuwelta aron dili nako malaktawan ang akong pagtuon. Sa kataposan, gihangyo nila ako sa pagpahawa sa ilang balay.
Kay nagkinaugalingon na niadto, nakakaplag akog trabaho uban sa usa ka babayeng dato. Nagplano siyag tulo-ka-bulang bakasyon sa iyang gipanag-iyang Gregong isla, ug gidapit ako nga mokuyog niya. Apan nakita ko ang lagmit nga mga kapeligrohan nga mahilayo sa katawhan ni Jehova, busa mihukom ako nga dili modayon sa biyahe.
Sa kapulihay, niadtong ting-inita mitambong ako sa Portuges nga mga sesyon sa 1974 distritong kombensiyon sa mga Saksi ni Jehova sa Toulouse, Pransiya. Kapin sa 12,000 ang mitambong. Didto, ako nabawtismohan sa pagpasimbolo sa akong pahinungod kang Jehova nga Diyos. Kadto ang una kong kombensiyon, ug makaiikag, kadto ang kataposang kombensiyon nga gitambongan sa Portuges nga mga Saksi kay sa nangagi ang ilang dagkong mga kombensiyon gidili man sa Portugal. Human niadtong tuiga gitugotan sila sa pagbaton sa ilang mga kombensiyon sa Portugal.
Usa ka Bag-ong Karera
Ang una-kombensiyon nga kalihokan sa usa ka bulan sa Toulouse dakog epekto diha kanako. Pagkatalagsaong pribilehiyo nga sa matag adlaw makapahimulos sa pagpakigsuod sa maisogong Kristohanong mga igsoong lalaki ug mga babaye nga naghupot sa ilang integridad sa daghang katuigan ilalom sa diktador nga pagmando ni Salazar sa Portugal!
Ang sangpotanan sa suod nga pakig-uban niadtong diha sa bug-os-panahong ministeryo mimugna diha kanako sa dakong tinguha nga mahimong bug-os-panahong ministro sama kanila. Busa, unom ka bulan human ako mabawtismohi, gisugdan ko ang maong ministeryo sa Portugal. Wala madugay human niadto, ako gidapit sa pag-alagad sa usa ka espesyal nga asaynment. Ug kinsa ba ang mahimo nakong paris? Si Maria Eulalia da Luz, ang Saksi mismo nga nagtanyag nako sa librong Kamatuoran sa Lisbon!
Rebolusyonaryong Teritoryo
Ang habagatang Portugal mao ang among unang espesyal nga asaynment. Kadto usa ka rehiyon nga gigamhan sa Komunistang Partido tapos sa 1974 nga rebolusyon. Kanat ang espiritu sa pagkanerbiyoso sa gagmayng mga lungsod diin kami nagsangyaw sa Baixo Alentejo nga Probinsiya. Sa wala madugay kami mao ang tumong sa pintas nga pagsupak.
Sa pagsingkamot sa pagpaluya kanamo, kanunayng batohon sa mga lalaki ang giabangan namong balay, nga misangpot sa daghang gabii nga walay tulog. Sunod, ang usa ka bomba mibuto, nga miguba sa kandado sa pangunang pultahan. Dili katuohan, usa ka lalaki nga sa nangagi nagsupak sa among buluhaton sa maong panahon nagpaabang kanamo sa maarang-arang nga balay, kay nakaamgong peligroso nga kami atua sa hilit kaayo. Usa ka adlaw ang mga magsusupak nanuktok sa atubangan nga pultahan samtang kami wala diha. Tiaw na ang among katingala sa dihang sa among pagkauli among nakit-ang ang among bag-ong tag-iya sa balay maoy nagbantay sa balay! Gipasalamatan namo si Jehova alang sa Iyang panalipod.—Salmo 145:18, 19.
Bisan pa sa maong pagsupak, ang among buluhaton didto nagmabungahon kaayo. Sa pagbiya namo sa lugar, nalipay kami sa pagkakitang naporma ang duha ka bag-ong kongregasyon sa mga Saksi ni Jehova, nga ang matag usa may nindot nga Kingdom Hall.
Usa ka Dakong Hagit
Niadtong 1977 ang among asaynment gibalhin ngadto sa Madeira nga Kaislahan. Bisan pag ang talan-awon matahom kaayo niining semi-tropikal nga nasod, nadiskobrehan namo nga nag-atubang kamig kabukiran nga hago sa lawasnon.
Sa maong asaynment kami makatagbo ug mga tawo nga bug-os katugbang niadtong didto sa among miaging asaynment. Ang relihiyosong pagdeboto nasentro sa “mga santos.” Daghan ang walay kabangkaagan sa pagbasa, ug ang patuotuo dakog impluwensiya sa mga kinabuhi sa mga tawo. Kami aktuwal nga nakakita sa mga epekto sa espirituwal nga “bug-at nga mga lulan” nga gipapas-an sa mga lider sa bakak nga relihiyon diha sa mga tawo. Kadto nagmugna diha kanamo sa gamhanang matukmorong puwersa sa pagdalag espirituwal nga kahayahay, bisag unsay mahitabo, ngadto niadtong “nabudlayan ug nabug-atang” mga kalag.—Mateo 11:28, 29; 23:4.
Kasagarang kami makadungog nga ang mga tawo moingon nga kay sila Katoliko man, wala sila magkinahanglag bisan unsa gikan kanamo. Ako mangutana kon sila nagapangadye pa sa talagsaong pag-ampo nga “Amahan Namo.” Kon motubag silag oo, ako mohisgot nga dako gayod ang atong pangandoy nga matuman na unta ang kabubut-on sa Diyos dinhi sa yuta, sanglit ang tawo walay ginabuhat nga dakong kaayohan karong mga adlawa. Sa dihang mouyon sila, ako mangutana kon naghunahuna ba sila kon unsa ang kabubut-on sa Diyos alang kanato. Kasagaran nga kining metodoha makabaton sa mapatalinghogong igdulongog, ug mahimo ang mahigalaong kabildohay.
Usa ka adlaw ako nakigsulti sa usa ka babaye nga nagpakitag interes sa mensahe sa Gingharian sa dihang sa kalit ako nakurat tungod sa pagpakapaka sa mga kuwitis sa akong palibot. Ang lalaking nag-atake kanako mao ang lainon ug buot nga anak lalaki sa babayeng interesado. Nga masuk-anon, iyang gilabay kanako ang usa ka libro, nga naigo ang akong mga batiis. Nga nagbakyaw sa usa ka sanggot nga gigamit sa pag-abis ug saging, mibahad siya sa pagpatay kanako, nga nagbakyaw sa sanggot ibabaw sa akong ulo. Sa kalit, gikan sa kasagingan mitungha ang laing lalaki, ang bugtong tawo nga iyang gitahod ug gikahadlokan. Siya misinggit sa awtoritatibong tingog: “Unsay imong ginabuhat?” ug nagpugong sa lalaking mangtas sa pag-atake kanako.
Sa duha pa ka higayon diha sa maong asaynment, ang akong kinabuhi nameligro, ug sa matag panahon akong nakita ang mapanalipdanong kamot ni Jehova ibabaw nako. (Salmo 68:19, 20) Sa aktuwal, ang maong teritoryo masanongon sa maayong balita sa Gingharian sa Diyos, ug sa pagbiya namo, may daghan pa nga mitambong sa among mga tigom.
Sa laing lugar sa Madeira nga Kaislahan, akong gisugdan ang pagtuon sa Bibliya uban sa usa ka babaye kansang bana dili uyon kanamo. Apan siya dakog pagtahod sa Bibliya. Siya usa ka panadero nga nagtrabaho sa mga gabii, ug wala namo hisayri, sa pagkamata, siya sekretong mamati sa among senemanang pagtuon. Ang iyang interes misamot sa matag pagtuon, apan siya nalibog bahin sa ngalan sa Diyos nga mao ang Jehova.
Mihukom siya sa pagsusi sa maong butang sa iyang kaugalingon diha sa iyang kaugalingong Bibliya apan wala siya makakaplag sa Bibliya. Gusto niyang masusi ang kamatuoran bahin sa ngalan sa Diyos ug mabalak-ong nagtinguha nga makaplagan ang iyang “daan, tinuod nga Bibliya” sa paghusay niana. Wala madugay, panahon sa bug-os nga paglimpiyo sa panaderiya, ang iyang bililhong Bibliya nakaplagan. Maikagon niyang gitan-aw ang ubay-ubayng reperensiya, ug kadto didto. Nga tino, ang personal nga ngalan sa Diyos mao gayod ang Jehova! (Salmo 83:18) Sa mubong panahon, siya mihimog dakong pag-uswag ug nabawtismohan. Karong adlawa siya matinumanong nagaalagad diha sa kongregasyon.
Kinaulahiang Asaynment
Sa pagkakaron, ako nagaalagad sa amihanang Portugal sa siyudad sa Braga. Sa daghang katuigan kini maoy usa ka relihiyosong sentro nga may iladong Katolikong halaran ug unibersidad. Apan kinsay makahanduraw nga moabot ang adlaw sa dihang madiskobrehan sa daghang simbahan nga nagaus-os ang ilang mga membro? Bisan pa niana, kini karon nagakahitabo.
Mahibalag namo ang daghang tawo nga nagtuo sa ebolusyon ug daling moangkon nga sila mga agnostiko. Ang basahong Life—How Did It Get Here? By Evolution or by Creation? uban sa mga kamatuoran niini nga nagapaluyo sa paglalang maoy gamhanang galamiton sa “pagbalit-ad sa mga pangatarongan ug matag hataas nga butang gipatindog batok sa kahibalo sa Diyos.”—2 Corinto 10:5.
Ang Labing Maayong Karera
Sa paglingi sa miaging 15 ka tuig, ako wala magduhaduha nga gipili ko ang labing maayong karera, ang paggamit sa akong tingog dili sa paglingaw kondili sa pagpakigsulti sa uban mahitungod sa kahibulongang mga saad sa Diyos. Ang madasigong pagdapit sa paggamit sa tingog sa usa sa pagpahayag sa “maayong balita” nagagikan kang Jehova mismo ug bukas sa tanan nga modawat niini.—Mateo 24:14; Roma 10:13-15.
Pagkatalagsaong higayon ang gihatag kanamo sa pagsulay sa pag-abot sa mga kasingkasing niadtong nagabudlay ug nabug-atan, nga nagadasig nila nga ‘umari kamo ug inom sa tubig sa kinabuhi nga walay bayad’! (Pinadayag 22:17) Kini usa ka mensahe mismo gikan sa Pulong sa Diyos nga makatandog sa sensitibong kuwerdas sa mga kasingkasing sa mapaubsanong katawhan. Ang akong paris sa bug-os-panahong ministeryo ug ako mibating bulahan nga makapadayon sa paggamit sa among mga tingog, dili alang sa kabantogan o bahandi, kondili sa pagdayeg sa Diyos ug pagdalag mga panalangin nga dayon alang sa uban.
Gibati ko nga ang karera sa “pag-awit” nga akong nabatonan karon labaw pa kaayo sa akong kanhing karera sa pag-awit, kay ako nagabuhat sumala sa giingon sa salmista: “Manag-awit kang Jehova, dayega ang iyang ngalan. Sa adlaw-adlaw imantala ang maayong balita sa iyang kaluwasan.” (Salmo 96:2)—Sumala sa gisugid ni Madalena Ferraz Martins.
[Hulagway sa panid 24]
Si Madalena Ferraz Martins ug iyang paris sa bug-os-panahong ministeryo, si Maria Eulalia da Luz