Unsay Imong Mahimo sa mga Alayohon sa Balay?

ANG usa ka tawong maalamon sa karaang mga panahon miingon: “Adunay tinudlong panahon alang sa tanang butang.” (Ecclesiastes 3:1) Kon bahin sa pagmintenar sa balay, kini tinuod kaayo! Kon dili dayon atimanon, ang mga alayohon sa imong balay mas modako ug gasto ug dakong panahon ang magugol. Ang solusyon?

Paghimog iskedyol alang sa pagmintenar batok sa pagkaguba, ug tumana ang “tinudlong panahon” sa pagbuhat niana. Tingali gusto nimong markahan ang mga adlaw alang sa maong trabaho diha sa imong kalendaryo. Kini mopabantay sa ubang mga sakop sa imong pamilya sa pagpalibre sa ilang panahon aron makatabang sumala sa gikinahanglan.

Adunay duha ka bulawanong lagda alang sa hustong pagmintenar sa balay. Una, santaa ang daghang problema kutob sa imong mahimo sa dili pa sila magsugod. Ug ikaduha, atimana dayon kon posible ang mga problema nga motungha. Susiha pag-ayo ang imong balay sa tingpamulak o sa tinghunlak, hatagig pagtagad ang atop. Dili lamang ang mga tulo makadaot sa sulod sa imong balay kondili kini usab makadaot sa mga bungbong ug dagway sa balay sa gawas.

Abagi ang imong tinuig nga pagsusi sa atop uban ang dugang pagsusi human sa kusog nga bagyo. Bisag ikaw makahimog ginagmayng mga pag-ayo sa patag nga atop, ang usa ka kasaligang kontraktor maoy labing nasangkapan sa paggarantiya ug malungtarong solusyon sa mga problema sa atop.

Kon ang imong balay napalibotan ug mga kahoy, nan ang problema nga motungha sa tinghunlak mao ang nangahulog nga mga dahon nga maipon diha sa mga sandayong, nga makaali sa pag-agos sa tubig sa ulan. Busa, susiha ang mga sandayong ug ang mga tubo sa sandayong. Buliti ang tanang mga liki-liki pinaagi sa dili-masuphag tubig nga masilya. Ang pagpahid ug bagang topcoat gloss nga pintal makahatag proteksiyon sa lata nga mga sandayong.

Ang mga bungbong sa imong balay usab nagkinahanglag regular nga inspeksiyon. Tan-awa ang mga liki, kaumog, ug nangatangtang nga mortar o sementong gibulit diha sa mga tisa. Ang epekto sa hangin, ulan, ug yamog makatangtang sa semento o ubang mga igbubulit nga mohimo sa imong bungbong nga dili malapsan ug tubig. Kon kini nangatangtang, kinahanglang maghimo kag gikinahanglang mga pag-ayo.

Sa regular, susiha pag-ayo ang kahoy sa imong balay. Tusloka ang ubos nga mga bahin sa pultahan, ang ilang mga hamba ug ang mga pasamano sa pagtino kon sila gabok na. Kon ang nagabok nga bahin dako, gabsa kini ug pulihig lig-ong kahoy. Mahimo nga butangan ang gamay nagabok nga bahin ug preserbatibo sa kahoy nga dunay fungicide o pamatay sa agup-op.

Ang bukbok motunga diha sa umogon, kulag hangin nga mga dapit sulod sa balay. Kini may katakos nga mokanat, bisan sa igbubulit, semento, ug tisa. Ang pagwagtang sa bukbok nagkinahanglag dihadiha, eksperto nga pag-atiman. Labi pang maayo, proteksiyoni kini gikan sa bukbok pinaagi sa maayong bentilasyon sa tibuok nimong balay.

Aron mahanas sa pagmintenar sa balay, magmapaniiron. Regular nga susiha ang imong balay, sa gawas ug sa sulod. Himoa ang gikinahanglang mga pag-ayo dihadiha. Buhata ang imong mahimo, apan kon gikinahanglan, ayaw pagpanuko sa pagtawag ug mga eksperto sa pagtabang.

[Kahon/Mga hulagway sa panid 15]

PAG-AYO SA SANDAYONG UG SA MGA TUBO SA TUBIG

Paghinlo sa Sandayong

◼ Sa dili pa kuhaon ang balas ug mga sagbotsagbot, takpi ang lungag sa tubo sa sandayong ug baga nga noog aron ang mga sagbotsagbot dili makasulod sa tubo sa sandayong.

◼ Kahiga ang hugaw diha sa usa ka sa balde nga nagbitay diha sa imong hagdanan.

◼ Kuhaa ang noog, ug buboig tubig ang tubo sa sandayong. Kon dili kusog moagos ang tubig, nan duna pay nakababag sa tubo sa sandayong.

Paghinlo sa Nasap-ongang mga Tubo sa Sandayong

◼ Kon may mga awasanan diha sa ubos sa tubo sa sandayong, butangi kinig sudlanan aron ang mga sagbotsagbot dili makabara kanila.

◼ Gikan sa ubos, dugkala pinaagi sa gahing alambre ang itaas nga tubo sa sandayong aron matangtang ang bisan unsang nakasap-ong sa ubos.

◼ Gikan sa itaas sa tubo sa sandayong, isulod ang may kaw-it gahing alambre diha sa tubo sa sandayong aron makuha ang bisan unsang nabara sa ibabaw.

[Kahon/Mga hulagway sa panid 15]

PAG-AYO SA MGA BUNGBONG NGA TISA O SEMENTO

Pagbulit Pag-usab (Pag-ayo sa Gitakdoan sa mga Igbubulit)

◼ Gamita ang tigib ug martilyo aron makuha ang ang nangatangtang nga igbubulit sa giladmong 1 ka sentimetro.

◼ Kuskusi ang luna nga bulitan pag-usab pinaagi sa gahi nga brotsang alambre aron matangtang ang mga tipik sa igbubulit ug abog.

◼ Pagmiksla ug igbubulit nga igo ra nga gamiton sa dili pa kini kaabtan ug pagbagtok.

◼ Bas-a ang mga tisa ug ang hanig nga igbubulit ug tubig.

◼ Iduot ang igbubulit diha sa mga liki sa tunga sa mga tisa ug talinis nga paleta.

◼ Inigkauga sa igbubulit, sa dili pa kini bug-os nga mobagtok, pinaagi sa gahi nga brotsa, tangtanga ang tanang namilit nga igbubulit diha sa tisa.

Pagpalitada-pag-usab

◼ Tangtanga ang naliki o nangaukang nga igbubulit o semento.

◼ Bas-a ang bungbong.

◼ Ikatap ang bag-ong igbubulit diha sa bungbong pinaagig paleta.

◼ Pagahiag diyutay ang pangbulit.

◼ Badlisbadlisi ang ibabaw aron motapot ang kataposang haklap sa igbubulit.

◼ Ibutang ang kataposang haklap sa pangbulit.

◼ Aron mapatag ang ibabaw, sudlaya ang basa nga miksla sa igbubulit pinaagi sa kahoyng paleta.