Gikan sa Among mga Magbabasa

Hubak Kinasingkasing nga pasalamat alang sa artikulo bahin sa hubak. (Marso 22, 1990) Milampos gayod kamo sa pagbatbat niining komplikadong sakit diha sa yano, masabtang mga paagi. Karon giubanan ko ang akong anak nga lalaki diha sa klinika diin siya nailalom sa mga pag-eksamin alang sa iyang hubak. Ang iyang hubak daw nalangkit sa alerdiyik sa pagkaon, abog, ug mga bunhok. Ang tanan nga among nakat-onan nagkatukma sa artikulo.

M. S., Pederal nga Republika sa Alemanya

Bawtismo Salamat kaayo kaninyo sa artikulong “Mga Batan-on Nangutana . . . Magpabawtismo ba Ako?” (Marso 22, 1990) Sa gabii sa wala pa nako madawat ang maong gula, miampo ako ug panabang aron mahibalo kon andam na ba akong magpabawtismo. Ang artikulo nagpahayag sa akong gibati mismo. Nagalantaw ako sa unahan sa akong bawtismo.

A. S., Tinipong Bansa

Diha sa inyong artikulo “Mga Batan-on Nangutana . . . Andam Na ba Akong Magpabawtismo?” (Abril 8, 1990), kamo nag-ingon nga ‘tingali ang labing kritikal nga pangutana nagalangkit sa imong relasyon uban sa Diyos.’ Wala nay molabaw pa sa pagkatinuod niana! Sa gibawtismohan ako sa edad 14, ako walay suod nga personal nga relasyon uban kang Jehova. Karon nahibalo na ako kon unsay kahulogan sa pagkabaton ug suod nga relasyon uban sa Diyos. Kana sa pagkamatuod mao ang yawi.

J. R., Tinipong Bansa

Ang artikulo maoy usa ka dakong tabang kanako; tungod niana magpabawtismo ako sa sunod nga sirkitong asembliya sa mga Saksi ni Jehova. Pagkamaayo gayod sa inyong pagpakita sa mga butang diha sa kabahin sa mga batan-on.

K. M., Pederal nga Republika sa Alemanya

Lupus Dili ako usa sa mga Saksi ni Jehova, apan pahalipayan ko kamo sa inyong Mayo 8, 1990, nga gula nga may mga artikulo bahin sa polusyon ug sa hinungdanong sugilanon bahin sa lupus. Ako nag-antos sa lupus sulod sa 14 ka tuig. Ang pagbasa sa sugilanon ni Robin nahisamang gibuhi ang akong kinabuhi. Mihimo siya ug positibong paagi, usa ka butang nga angay sulayan sa mga may sakit nga lupus.

Y. M. B., Inglaterra

Nadasig kaayo akong nagbasa bahin sa daghang Kristohanong mga brader ug sister si kinsa, sa adlaw ug sa gabii, nagasalig kang Jehova aron makalahutay sa ilang mga sakit. Dili pa dugay, nagsakit ang akong mga batiis (osteoarthritis sa bat-ang) ug dili makatindog ug dugay nga kapin sa usa ka oras. Apan tungod sa kaluoy ni Jehova, ako nakapadayon sa pag-alagad ingong bug-os panahong ministro. Ang sugilanon ni Robin nagpakita sa pagtagad ni Jehova sa mga panginahanglan sa matag usa kanato.

H. A., Japan

Nag-awayay nga mga Ginikanan Diha sa inyong artikulo “Mga Batan-on Nangutana . . . Unsay Akong Buhaton Kon Mag-away ang Akong mga Ginikanan?” (Disyembre 8, 1989), kamo nagsugyot nga ang batan-on yanong makapanabi ug moadto sa iyang kuwarto kon mag-away ang mga ginikanan. Nakita ko kining delikado ug peligroso. Kon mopahawa ako sa esena sa panagbingkil, mahimong mapatay sa akong agresibong amahan ang akong inahan! Busa akong nakita nga maayo nga anaa ako kanunay aron sa pag-ulang kanila kon sila mag-away.

P. M. E., Nigeria

Ang potnot diha sa artikulo nag-ingon: “Wala kami magtumong sa mga kahimtang diin ang usa ka mapasipad-anong amahan magbahad sa mga sakop sa pamilya.” Ang mga sirkumstansiya nagkalainlain, ug ang batan-on tingali makataronganong mabalaka sa kaluwasan sa iyang mga ginikanan. Busa ang potnot midugang: “Sa maong mga kaso, ang mga sakop sa pamilya basin mapugos sa pagpakitabang sa gawas aron mapanalipdan sila gikan sa lawasnong kadaot.”​—ED.