Gikan sa Among mga Magbabasa
Pagkagiyan sa Crack Daghang salamat sa inyong Hulyo 22, 1990, nga artikulong “Pagkagiyan sa Crack—Ang Kahimtang sa Batang Wala pa Matawo.” Kami nagkinahanglag dugang kahibalo sa publiko ug publikong edukasyon niining ulohana. Ako nasayod tungod kay ako nagatrabaho diha sa usa ka programa nga nagtambal sa mabdos nga naggiyan sa mga droga.
D. P., Tinipong Bansa
Mga Paghikog Daghang salamat alang sa artikulong “Mga Paghikog—May Pagkabanhaw?” (Septiyembre 8, 1990) Kini nagtabang kanako nga magpabili sa pagkadako sa pagtagad ni Jehova kanato ug nga angay kitang motahod sa kinabuhi nga iyang gihatag kanato. Kini nagtudlo usab kanako nga dili-pakamenosan ang gahom sa dili-takos nga kalulot.
M. R., Tinipong Bansa
Ang akong inahan naghikog sa dihang ako 14 anyos lamang. Ang dakong bahin kanako namatay uban kaniya. Apan karon ako 26 anyos na ug usa ka dedikadong alagad sa Diyos. Ang inyong artikulo, naghatag ebidensiya nga ang akong inahan malagmit nga mabanhaw, nagtug-an kanako nga ang bahin nako nga akong nawala mabatonan pag-usab sa dihang makita ko siya pag-usab.
L. R., Tinipong Bansa
Librong “Mga Batan-on Nangutana” Gibasa ko nga may dakong kaikag ang artikulong “Sanong sa Magbabasa sa librong Mga Batan-on Nangutana.” (Septiyembre 8, 1990) Dili pa dugay una pa gidawat kining isyuha, gihatag ko ang libro ngadto sa usa ka edarang estudyante sa Bibliya, nagsugyot nga iyang ihatag kini ngadto sa iyang apo. Apan, sa sunod nga panahong giduaw ko siya, ang edarang babaye mismo ang naghuman sa pagbasa sa libro. Akong gipakita niya ang bahin diha sa artikulo nga naghisgot sa usa ka babayeng “74 anyos” kinsa nakabatog kaayohan gikan sa pagbasa niana. Sa dihang iyang gibasa kini, siya miingon: ‘Ako mouyon. Ako nagtuo nga angayng mahibaloan ko ang unod sa libro una pa ihatag kini ngadto sa akong apo, apan wala magdugay ako bug-os nga nainteres sa pagbasa niana.’ Wala damha, siya 80 anyos na ang “panuigon”!
K. H., Hapon
Kabatan-onan—Ang Hagit sa Katuigang 1990 Niining hapona nadawat ko ang isyu sa Septiyembre 8, 1990, nga naghisgot sa mga batan-on. Gibasa ko kana dihadiha ug nalipay sa matag artikulo. Sa dili pa dugay gibati ko nga walay nakasabot kanako. Apan human nga nabasa ang magasin, naamgohan ko nga ako dakong sayop. Daghang salamat sa pagtagad kanamong mga batan-on.
B. P., Tinipong Bansa
Mga Artikulo sa Kinaiyahan Ang isyu sa Mayo 22, 1990, nakaikag kanako. Kini naundan sa artikulong Punta Lobos, usa ka tinuod kahibulongang dapit alang sa mga hayop ug sa mga mahigugmaon sa kinaiyahan. Kamo nagtabang usab kanamo nga madiskobrehan ang Haida, usa ka grupo sa mga tawong nagkinabuhi sa halayong amihanan sa Pasipiko. Siyempre, dili tanan ang makaadto didto. Apan uban sa diyutay nga imahinasyon, usa ka maayong bahin sa biyahe ang nagapanangpit pinaagi sa pagbasa sa materyal ug sa pagtan-aw sa mga hulagway. Salamat alang niining maayong pagkapresentar nga mga artikulo.
R. F., Pransiya
Lupus Ang taho bahin sa lupus diha sa Pagmata! sa Mayo 8, 1990, nagpakurat kanako. Samtang gitapos kini sa pagbasa, gilinyahan ko kadtong mga pulong nga naghubit sa akong kaugalingong kahimtang. Unya, dala ang usa ka kopya sa Pagmata!, miduaw ako sa akong doktor. Iyang gibasa ang taho ug dihadiha gimando ang mga pag-eksamin sa dugo. Karon ako gitambalan alang sa akong sistema sa imyunidad, dili alang sa akong reyuma.
C. K., Pederal nga Republika sa Alemanya
Pagmabdos samtang Tin-edyer Daghan kaayong salamat alang sa artikulong “Pagmabdos samtang Tin-edyer—Unsay Pagabuhaton sa Usa ka Dalagita?” (Mayo 8, 1990) Sa Agosto 16, 1989, ako gitugahan uban sa usa ka matahom batang babaye. Sa ako mabdos pa, wala ko masayod kon unsay buhaton. Ako naglibog bahin sa kaminyoon ug pagpasagop apan wala gayod hinoon isipa ang aborsiyon. Sa dihang mitungha ang artikulo, ako nasayod nga gihimo ko ang hustong desisyon. Ako magtambongan na karon sa Kristohanong mga tigom uban sa akong anak nga babaye ug naglaom nga mahimong dedikadong Saksi sa dili madugay.
D. A., Tinipong Bansa