Gikan sa Among mga Magbabasa

Pagbaligyag Dugo Buot kong ipahayag ang apresasyon alang sa mga artikulo bahin sa pagbaligya ug paggamit sa dugo ug mga produkto sa dugo. (Oktubre 22, 1990) Wala akoy ideya nga kini dako kaayong industriya. Nakapalalom kaayo kini sa atong apresasyon sa atong Maglalalang, kinsa nagapanalipod sa iyang katawhan pinaagi sa pagdili sa paggamit sa dugo!

R. L., Tinipong Bansa

Mga Ginikanan Nagbulag Ang artikulong “Mga Batan-on Nangutana . . . Magbulag ang Akong mga Ginikanan​—Unsay Akong Buhaton?” (Agosto 22, 1990) naghisgot sa usa ka kahimtang nga susama sa usang akong giagian mga unom ka tuig kanhi ingong usa ka ginikanan. Ang bahin nga nagpahayag nga “ang paghambin sa suko ug mapanimalosnong espiritu makadaot sa imong personalidad” puntiriya kanamo. Ang maong mga pagbati nagpadayon diha sa akong tulo ka anak sulod sa miaging unom ka tuig. Mao nga gipadad-an ko silag usa ka kopya niining artikuloha, ingon man usa ka sulat nga nagpatin-aw nga gimahal ko sila pag-ayo. Masaligon ako nga mahimong mapuslanon ang sangpotanan.

E. B., Tinipong Bansa

Kon Kanus-a Isekreto ang Kanser Buot kong sultihan kamo nga ako nadasig kaayo sa estorya ni Rie Kinoshita. (Oktubre 22, 1990) Ang iyang determinasyon sa pag-alagad sa Diyos uban sa tanan niyang nabiling kusog labing nakapadasig kanako. Sanglit ako may maayo kaayong lawas, kana nagdasig nako sa pagpahimulos sa mas maayo sa akong mga Sabado ug mga gabii alang sa buluhatong pagsangyaw. Sa dihang mobati ako nga gikapoy kaayo, ako mahinumdom kang Rie​—ug ako mogula!

T. F., Canada

Ang mga luha nanaligdig sa akong mga aping samtang akong gibasa ang hugot nga mga pagtuo ni Rie. Ako nakadayeg kaayo sa iyang masadyaong tinamdan ug iyang paglahutay sa bug-os-panahong ministeryo, bisan pag siya may grabeng sakit.

M. H., Hapon

Espirituwal nga Pag-uswag Salamat kaayo sa artikulong “Mga Batan-on Nangutana . . . Sa Unsang Paagi Mouswag Ako sa Espirituwal?” (Septiyembre 22, 1990) May daghan kaayong maayong sugyot kini nga akong ikapadapat. Kaduha na nako kini mabasa. Nagbuhat usab akog listahan sa akong espirituwal nga mga tumong (sumala sa inyong gisugyot), ug ako kining itaod sa akong bungbong.

G. K., Tinipong Bansa

Salamat sa inyong artikulo, karon ako naningkamot sa pagbasa sa Bibliya 15 minutos sa usa ka adlaw. Kasagarang akong gugolon ang mas daghang panahon. Daghan kaayo ang akong nakat-onan; kini katingalahan!

T. L. P., Canada

Daghan Kaayong Basura Nagustohan ko pag-ayo ang artikulong “Daghan Kaayong Basura​—Ilubong ba Kaha Kita Niini?” (Septiyembre 22, 1990) Diyutay rang tawo ang nakaila sa gidaghanon sa basura nga ipatungha kada adlaw ug unsa ka peligroso kini alang sa planeta. Salamat sa katin-aw sa inyong artikulo.

B. S., Brazil

Kon Nganong Gitugotan sa Diyos ang Pagkadaotan Inyong gihisgotan kining ulohana sa daghang paagi ug sa daghang beses sa nangagi. Bisan pa niana, ang artikulo sa Oktubre 8, 1990, isyu maoy usa ka obra maestra. Ang tanan, gikan sa buhat sa arte ngadto sa introduksiyon, maoy matahom!

G. H., Tinipong Bansa

Ang artikulo nakatabang nako sa paglig-on sa akong mga pagtuo mahitungod sa mga hinungdan sa pagkadaotan ug sa paglaom nga akong nabatonan alang sa umaabot. Sa baylo, ang akong relasyon uban kang Jehova napalig-on.

J. H., Tinipong Bansa

Jaguar Ako 14 anyos, ug ako nagasulat sa pag-ingon nga gipabilhan ko pag-ayo ang artikulong “Ang Maikyasong Iring sa Lasang.” (Agosto 22, 1990) Sa kanunay maoy akong pangandoy nga makakitag jaguar. Gitabangan ninyo ako sa paghimo niana. Gihimo ninyong buhi ang ulohan, ug gibati ko nga daw ako aktuwal nga didto.

M. C., Pransiya