Gikan sa Among mga Magbabasa
Pag-ampo Diha sa mga Dula Salamat sa “Ang Hunahuna sa Bibliya: Pag-ampo Diha sa mga Dula—Mamati ba ang Diyos?” (Mayo 8, 1990) Ako tig-ampo nga mainiton sa Diyos una pa sa dulang handball. Panahon sa pangunang mga dula, ako tig-ampo nga makabatog kusog aron makadaog. (Kami wala gayod makadaog sa bisan usa sa maong mga dula.) Karon nasayran ko na nga ang maong mga pag-ampo wala mahiuyon sa kabubut-on sa Diyos.
M. A. L. S., Brazil
Kabatan-onan—Hagit sa Katuigang 1990 Gibasa nako ang librong Mga Pangutanang Gisukna sa mga Batan-on—Mga Tubag nga Mosaler sa dihang unang nadawat ko kini. Ang inyong mga artikulo bahin sa kabatan-onan (Septiyembre 8, 1990) nagdasig kanako sa pagbasa niana pag-usab. Ug magaingon ako, gikahimut-an ko kining labaw pa sa ikaduhang beses!
B. B., Tinipong Bansa
Ako 13-anyos nga batang babaye, ug buot kong sultihan ko kamo nga nahimuot kaayo ako sa mga artikulo bahin sa mga batan-on. Ako may suskrisyon sa Pagmata! Apan inigkadawat ko sa mga magasin sa koreyo, ako kanang hiposan. Kining usa nakadani sa akong mata, mao nga akong gibasa kini ug nahimuot ako kaayo niana. Gipagawas ko ang akong ubang kopya sa Pagmata! ug gibasa ang pipila sa mga artikulo. Karon gihangyo ko ang akong mama sa pagtuon sa Bibliya uban nako.
A. P., Tinipong Bansa
Paghikog Ang akong inahan, usa ka matinumanong alagad sa Diyos, naghikog tapos sa usa ka bulan sa halalom nga depresyon. Ang iyang kamatayon nagbilin ug dili-ikabatbat nga kabug-at ug kaguol alang namong tanan nga nahigugma kaniya. Ang hunahuna nga dili na gayod namo siya igkita pag-usab naghimo sa kasakit sa iyang pagkamatay nga lisod antoson. Ang inyong artikulo (“Ang Hunahuna sa Bibliya: Mga Paghikog—May Pagkabanhaw Ba?” Septiyembre 8, 1990) mipabati kanako nga mas “normal” ug malipayon sa kahiladman, kay nahibalo nga ako makahambin sa paglaom sa iyang pagkabanhaw.
T. M., Tinipong Bansa
Ang artikulo maluluy-on. Apan dili ba kaha nga ang mga magul-anon mag-isip sa maong kaluoy ingong katarongan sa pagsubay sa “sayon nga lutsanan”?
N. G., Tinipong Bansa
Ang mga pagbati sa walay-hunong nga kawalay-paglaom basin mohimo sa kamatayon nga daw madanihon alang sa usa ka magul-anon kaayo. (Itandi ang Job 10:1.) Apan sanglit ang paghikog maoy pagpatay sa kaugalingon, kini usa ka paglapas sa balaod sa Diyos ug dili-dalawatong kapaingnan alang sa usa ka Kristohanon. Kon ang mga hunahuna sa paghikog motakboy sa usa ka tawo, angay nga dili niya abusohan ang kaluoy sa Diyos apan angay nga tinguhaon niya ang panabang sa pagsukol sa mga agda sa pagpatay sa kaugalingon. (Santiago 1:14, 15) Siya basin maghunahuna sa masakit nga kahaw-ang nga ibilin sa iyang kamatayon diha sa mga kinabuhi sa mga minahal. Angay niyang hinumdoman nga si Jehova “haduol niadtong nagun-ob ang kasingkasing” ug itugyan ang iyang mga palas-anon diha Kaniya. (Salmo 34:8; 55:22) Angay nga ipahibalo usab niya sa isigka-Kristohanon ang iyang kaguol ug dawaton ang ilang pagpaluyo. Bisan pa niana, kon ang usa ka tawo dag-on sa mga pagbati sa paghikog, ang mga nagbalata mahimong magkalipay sa pagkahibalo nga ang umaabot sa ilang minahal anaa sa mga kamot sa usa ka mahigugmaong Diyos.—ED.
Pagsagubang sa Paralisis Human sa pagbasa sa “Gihimo ang Tanan sa Pagtabang sa Uban” (Septiyembre 22, 1990), buot ko lang magpasalamat kaninyo tungod sa maong makapalig-on ug positibong artikulo. Sa pagtan-aw nga ako walay depekto, usahay ako mahibulong kon unsaon nako pagsagubang ilalom sa samang mga kahimtang. Kitang tanan nailalom sa labihang pagpit-os gikan niining kalibotana, apan si Tony Wood nagsagubang niini ug labaw pa gani pinaagi sa pagsalig kang Jehova.
P. G., Inglaterra
Mga Pelikula Salamat sa artikulong “Mga Batan-on Nangutana . . . Sa Unsang Paagi Ako Makapilig Desenteng Pelikula?” (Agosto 8, 1990) Karong adlawa ang kinabag-an sa mga batan-on dili makaila kon unsang matang sa mga pelikula ang angay tan-awon sa usa ka Kristohanon, ni sila mangutana sa ilang mga ginikanan kon angay ba nilang tan-awon ang usa ka pelikula o dili. Nagustohan ko kaayo ang ideya nga kon ang usa ka tawo mahitabong nagatan-aw sa dili-maayong pelikula, angay niyang pagngon kana.
J. N. S., Brazil