Gikan sa Among mga Magbabasa
Nagbulag nga mga Ginikanan Ang akong mga ginikanan nagdiborsiyo sa tres anyos pa ako. Sulod sa 36 ka tuig misulay ako sa pagbanabana kon asa ang akong amahan, nga nagluib sa akong inahan, mohaom sa akong kinabuhi. Ang pagtimbangtimbang kon kinsay dapigan nakita nga sobra ra sa akong maarangan. Ang inyong artikulo “Mga Batan-on Nangutana . . . Unsaon Nako Pagtagad ang Akong Ginikanan nga Mipahawa sa Balay?” (Nobyembre 8, 1990) naghisgot sa tanang bahin mahitungod niining butanga. Ako naulian na sa akong pagbati, ug gibati ko nga daw si Jehova nagbutang sa iyang mahigugmaong bukton kanako ug nag-ingon, ‘Nakasabot ako.’
G. M., Tinipong Bansa
Trahedya sa Ayroplano Bag-o ko pa lamang natapos pagbasa ang artikulo “Akong Kaguol sa Biyahe 232” (Disyembre 22, 1990), ug dili ako makapugong sa mga luha nga naghunahuna sa naagoman ni Lydia, nga namatyan ug bana. Namatay ang akong inahan sa kanser sa lima ka bulang milabay. Mapasalamaton kaayo ako sa atong mahigugmaong Diyos sa paghimo niining posible alang kanato sa pagkakita sa atong mga minahal pinaagi sa pagkabanhaw.
C. G., Pransiya
Kon Nganong Gitugotan sa Diyos ang Pag-antos Akong nabasa ang Pagmata! gikan sa hapin ngadto sa hapin sukad sa 1985, apan wala pa ako sukad makakitag sama ka madan-agong tubag sa pangutana kon nganong gitugotan sa Diyos ang pag-antos kay nianang gihatag sa Oktubre 8, 1990, nga gula. Ang tanang mga tawo nga may paghunahuna makabaton ug klarong mga tubag pinaagi sa pagbasa niining maayo kaayong pagkasulat nga mga artikulo.
E. T. V., Brazil
Tapos sa Klase nga mga Trabaho Ang inyong artikulo “Mga Batan-on Nangutana . . . Ang Tapos sa Klase nga Trabaho Makatabang ba Nako nga Mahamtong?” (Nobyembre 22, 1990) naghatag nako ug pila ka makatabang nga tambag sa hustong panahon. Kini nakatabang nako sa pagtimbangtimbang sa bentaha o disbentaha sa trabaho ug sa paghimog mas maayong desisyon kay sa mahimo ko unta sa akong kaugalingon. Salamat kaninyo!
M. R., Tinipong Bansa
Wala ako maikag sa maong artikulo. Ako 32 anyos, adunay duha ka anak, ug nagtrabaho duha ka gabii sa usa ka semana diha sa fast-food nga restawran. Ang mga batan-on nga akong kauban sa trabaho kugi nga nagtrabaho. Busa ang uban masuko sa terminong “fast-food joint.”
C. B., Tinipong Bansa
Kami nakasabot sa gibati sa pipila ka magbabasa niining bahina. Ugaling, ang termino maoy kinutlo sumala sa pagkasulat niini diha sa “The Wall Street Journal.” Diha sa artikulo, among gigamit ang ekspresyong “fast-food restaurant.”—ED.
Mga Abnormalidad sa Pagkaon Sanglit ginaantos ko kanunay ang depresyon ug anorexia, giapresyar gayod nako nga gihisgotan sa Sosyedad kining malisod nga mga suliran diha sa simpleng mga termino, nagapakita nga ang mga babaye makalingkawas gikan sa abnormalidad sa pagkaon. (Disyembre 22, 1990) Salamat sa pagtagad niining talagsa rang gihisgotan gidili nga mga ulohan.
C. L., Pransiya
Sistema sa Imyunidad Mao pay pagkahuman nako ug basa sa artikulong “Atong Sistema sa Imyunidad—Usa ka Milagro sa Kalalangan.” (Nobyembre 22, 1990) Sa sinugdan, nagpanuko ako sa pagbasa niana, apan sa nakasugod na ako, kini nagbukas sa akong mga mata kon unsa diay ka katingalahan ang Diyos!
L.Z., Tinipong Bansa
Nakurat ako sa inyong artikulo. Ang pagpresentar sa sistema sa imyunidad ingong mga sundalong armado dili gayod maayo. Ingong mga Kristohanon, supak kita sa gubat. O ang paglarawan ba dili tagdon nga seryoso?
D. C., Alemanya
Ang pagtandi nga gihimo dili kay usa ka pag-uyon sa tawhanong gubat. Kadto maoy tabang lamang sa mga magbabasa sa pagsabot sa usa ka komplikado kaayong ulohan. Makaiikag, ang Bibliya nagagamit ug gubat ingong basehanan alang sa mga ilustrasyon, gitandi ang mga Kristohanon ingong mga sundalong armado. (Efeso 6:10-17)—ED.