Gikan sa Among mga Magbabasa
Kolor Salamat sa artikulong “Dugangig Diyutayng Kolor ang Imong Kinabuhi.” (Oktubre 8, 1990) Ang giya nga gihatag dinha maoy ekselente ug nakatabang nako ug dako sa akong pagpilig sinina. Ako may kalisdanan sa pagbagay sa mga kolor, ug ako makiling sa pagsul-ob sa itom ug puti lamang. Karon malahi na ang kahimtang!
D. M. D., Brazil
Sistema sa Imyunidad Nagasulat ako ingong apresasyon sa inyong mga artikulo bahin sa sistema sa imyunidad. (Nobyembre 22, 1990) Nagtuon ako bahin sa imyunidad dugaydugay na kanhi ingong bahin sa mga kinahanglanon sa akong graduate studies. Maayo untag ang akong propesor ingon ka detalyado ug ka klaro kaninyo. Tinuod gayod nga usa ka kursong makaparepresko! Salamat sa pagpahayag sa laktod sa ulohang imyunidad.
O. O. O., Tinipong Bansa
Buot ko lamang pahalipayan kamo tungod sa labing siyentipikanhong artikulo nga sukad akong nabasa bahin sa sistema sa imyunidad. Nalingaw ako ilabina sa “Usa ka Espirituwal nga Imyunidad sa Pagkahugno sa Moral.” Pagkamaalamon!
R. K., Tinipong Bansa
Tapos-Klase nga mga Trabaho Ako 17 anyos ug nalipay sa pagdawat sa artikulong “Mga Batan-on Nangutana . . . Ang Tapos sa Klase nga Trabaho Motabang ba Nako nga Mahamtong?” (Nobyembre 22, 1990) Mitrabaho ako panahon sa bakasyon sa ting-init niining tuiga, kay buot nakong masayran ang kalibotan sa mga hamtong. Kinahanglang atubangon ko ang usa ka hambogirong amo, maot nga mga problema batok sa isigkatrabahante, ug uban pa. Kon nakabasa pa ako niining artikuloha nga sayosayo, sa akong hunahuna makapili unta ako sa pagkat-on bahin sa kinabuhi sa dili kaayo makapaguol nga paagi. Ako nalipay kaayo nga kamo nakasabot sa mga panginahanglan sa mga batan-on.
T. F., Hapon
Mga Abnormalidad sa Pagkaon Sa pito ka tuig nakigbisog ako sa bulimia. Gisuginlan ko ang akong inahan, ug siya miingon nga kadto usa lang ka bahin nga matuboan ra na nako. Unom ka bulan sa ulahi kadto wala mawala. Busa gitug-anan nako ang duha ka Kristohanong babaye, ug sila nagsusi kanako matag karon ug unya. Ako may usa ra ka pagsugmat sukad niadto. Ang pagbaton sa laing mga tawo ingong tigpaluyo maoy usa ka dakong tabang, apan ang tinuod nga panukmod mao ang kahadlok sa pagpasuko sa akong Higala, si Jehova. Daghan nang libro ang akong nabasa bahin sa ulohan, apan ang inyong mga artikulo (Disyembre 22, 1990) mao ang labing tin-aw ug naghisgot nga deretso sa suliran.
E. S., Tinipong Bansa
Sa panahon nga ako 13 anyos na, naugmad nako ang batasan sa pagkaon ug pagsuka. Sa walay usa ka oras, ako makakaon sa gidaghanon nga kasagarang makapabusog sa napulo ka tawo. Sa tabang sa usa ka propesyonal nga magtatambag nga nagaespesyalista sa mga abnormalidad sa pagkaon, ako nakahimog mga kausaban. Karon ako usa ka bawtismadong Saksi ni Jehova. Salamat kaayo sa paghatag kanamo sa maayo kaayong pagkatuki ug balanseng mga artikulo mahitungod sa maong komplikado kaayong mga suliran.
N. I., Hapon
Tibuok-Kalibotang Pag-igsoonay Sa sinugdan sa Nobyembre, gipasulat kami sa among magtutudlo sa usa ka komposisyon bahin sa ulohang “Ang usa ka sibilisasyon angay bang hukmang labaw kay sa lain?” Ang mga artikulo bahin sa tibuok-kalibotang pag-igsoonay (Disyembre 8, 1990) miabot sa tukmang panahon! Gisukna ako sa akong magtutudlo kon diin ko makita ang akong impormasyon, ug gihatag ko kaniya ang mga artikulo sa Pagmata! Akong nakuha ang gradong 18 puntos (gikan sa 20) alang sa maong komposisyon!
L. Q., Pransiya
Glaucoma Ang akong ugangang-babaye miduaw kanako ug giingnan ako nga siya nakakitag asul ug dalag nga mga kolor ug sa usa ka lingin sa mga nawong sa mga tawo. Nakaplagan ko ang artikulong “Glaucoma—Malipoton nga Kawatag Panan-aw!” (Mayo 8, 1988) Tungod sa maong impormasyon, gihimo ang sayo nga pagrekonosir, ug ang akong ugangang-babaye karon hapit nang matambalan. Pagkamapasalamaton nako sa Pagmata!
G. S., Inglaterra