Gikan sa Among mga Magbabasa
Tapos sa Klase nga mga Trabaho Nalingaw kaayo ako sa mga artikulo mahitungod sa mga trabaho tapos sa klase. (Nobyembre 22 ug Disyembre 8, 1990) Bisag dili pa ako andam alang sa usa ka trabaho, ang inyong mga artikulo nagpakita kanako sa bili sa pagtigom ug kuwarta alang sa umaabot. Kini nakatabang usab kanako sa pagkasabot nga kon ako makakitag trabaho, nagkinahanglan ako ug iskedyol nga nag-apil sa panahon alang sa espirituwal nga mga buluhaton. Akong hinumdoman kining mga artikuloha sa umaabot.
J. S., Tinipong Bansa
Ang akong tumong mao ang pagkahimong payunir [bug-os panahong ebanghelisador]. Nahibulong ako kon kinahanglan bang mangita una ako ug trabaho ug magtigom ug kuwarta. Ang mga artikulo nakatabang kanako sa pagkakita nga ang paghimo niini makapahulog kanako sa bitik sa materyalismo. Busa midesider ako sa pagtrabaho—sa pagtrabaho sa pagtukod sa akong espirituwal nga pundasyon—aron ako mahimong maayo ug andam alang sa payunir nga pag-alagad.
G. J., Tinipong Bansa
Tropikal nga Kalasangan Ang inyong artikulo mahitungod sa tropikal nga kalasangan (Marso 22, 1990) maoy siyentipikanhon kaayo. Ang tanan nahibalo nga ang palibot nagakadaot ug nga kinahanglang may buhaton gayod. Apan ingong koresponsal sa balita dinhi sa Poland, ako nahibulong kon kinsa bay may kaisog sa pagsulat mahitungod sa sukaranang mga katarongan sa pagpasagad sa palibot. Kamo pa ang una sa paghimo niini pinaagi sa pagpunting sa hingaping pagkadalo ug sa tinguha alang sa ganansiya ingon nga mao ang tinuod nga mga katarongan. Maayong pagkasulat!
W. S., Poland
Madugoong mga Pelikula Usa ka pelikula nga gusto kong tan-awon, ang Die Hard 2, gihisgotan sa “Pagpaniid sa Kalibotan” sa tipik nga balitang “Madugoong mga Pelikula.” (Disyembre 22, 1990) Gisultihan ko gani ang akong mga higala nga motan-aw ako niini. Apan sa nabasa nako kini, midesider ako nga ang pagtan-aw niining pelikulaha sama rag nagtan-aw ug makahahadlok nga salida ug midesider nga dili na lang motan-aw. Sa pagkatinuod, gusto akong motan-aw, apan alang sa akong kaugalingong kauswagan sa espirituwal, ako dili motan-aw.
M. T., Hapon
Ehersisyo Salamat kaayo kaninyo sa inyong artikulong “Kon Unsay Mahimo sa Ehersisyo Alang Kanimo.” (Oktubre 22, 1990) Matag panahong himoon namo ang physical education sa eskuylahan, kinahanglang daganon namo ang 1.6 ka kilometro, ug maglagot gayod ako niini! Ang inyong artikulo nagpakita kanako nga tinuod gayod nga makahatag kaayohan ang ehersisyo sa mga tawo.
L. B. D., Tinipong Bansa
Salamat kaayo sa inyong artikulo. Niadtong Septiyembre, tungod kay aduna akoy regular nga programa sa pag-ehersisyo, nakahunong ako sa pag-inom ug tambal alang sa alta-presyon. Human sa siyam ka semana sa pag-untol-untol diha sa gamayng ambakanan nga lona, akong giingnan ang akong doktor nga gusto kong mohunong sa akong pag-inom ug tambal. Iya akong giingnan nga ianam-anam ang pagkunhod sa dosis. Karon normal na ang presyon sa akong dugo, maayo na ang akong panimati, ug ang akong bana nag-untol-untol na usab sa paningkamot nga moubos ang presyon sa iyang dugo!
G. Y., Tinipong Bansa
Kinahanglang magbantay ang mga magbabasa nga kon sila dunay suliran sa panglawas, o kon sila gulang-gulang na, maalamong magpakonsulta una sila sa usa ka kuwalipikadong mananambal sa dili pa magsugod ug malagsik nga programa sa ehersisyo. Ang pagkonsulta sa maong mananambal maalamon usab kon maghimog desisyon maylabot sa giresitang mga tambal.—ED.
Mga Bakasyon Diha sa Balay Ang inyong artikulo “Nganong Dili Sulayan ang Pagbakasyon Diha sa Balay?” (Hunyo 22, 1990) nagsugyot sa pagkolekta ug mga bulak sa kagulangan. Samtang mao kini ang akong gihimo sa mga katuigang miagi, ako nakakat-on sa balaod sa gawas sa balay: ‘Ayaw pagkuha ug bisan unsa gawas sa mga hulagway; ayaw pagbilin ug bisan unsa gawas sa mga tunob sa tiil.’ Sa dapit nga akong gipuy-an, supak sa balaod ang pagpangutlo ug pipila ka mga bulak sa kagulangan. Apan ang nadan-agan ug maayo, maayong pagkapokus nga hulagway sa bulak sa kagulangan pagakalingawan sa daghang katuigan!
W. K., Tinipong Bansa
Ang pagpanguhag mga hulagway sa pagkamatuod maoy praktikal nga paagi nga pagakalipayan ang kinaiyahan diha sa mga dapit nga ang pagpangutlog mga bulak, o ang susamang mga kalihokan, batok sa balaod o mopahinabog kadaot sa ekolohiya. Salamat sa sugyot.—ED.