Usa ka Katingad-ang Kalainan

ANG pag-uswag sa populasyon sa tibuok yuta gidahom nga magdugang ug hapit katumbas sa laing Tsina sa atong kalibotan sa katuigang 1990. Ang mga siyudad sa kalibotan ang labing apektado sa suliran. Ngani, sa sunod 15 ka tuig, ang mga molupyo sa siyudad ning planetaha gidahom nga molupig sa gidaghanon sa ilang mga katumbas sa banika sa unang panahon. Ang magasing International Wildlife miingon nga samtang ang mga siyudad sa kalibotan modagko nga mahimong huot dagko kaayong mga siyudad, sila “magpabaho sa hangin ug tubig, maghurot sa umahonong yuta sa ilang mga palibot, maghurot sa mga reserbang lasang aron itagana ang sugnod ug tabla, ug magpasanay sa krimen, sakit ug kawalay-paglaom.”

Kasamtangan, mas daghan ug mas daghang kabanikanhan gibiyaan. Pananglitan, sa Tinipong Bansa, adunay ginatos ka lungsod nga himalatyon tungod kay kulang sa mga tawo. Sa luag kaayong Great Plains nga rehiyon sa kasadpang Tinipong Bansa, ang pila ka county karon may mas daghang mga lungsod nga walay tawo kay sa buhing mga lungsod. Napulo ka county sa North Dakota duna lamay 1.5 ka tawo o menos pa matag kilometro kuwadrado; 18 ka county nawad-an sa labing menos 50 porsiento sa ilang populasyon sukad sa 1930. Gibati gani sa pipila, sumala pa sa The Wall Street Journal, nga ang tibuok Great Plains nga rehiyon “tinong nahibalik sa kasagbotan nga gigikanan niini.” Ngano? Gibasol sa mga eksperto ang sayop nga pagdumala sa yuta, pag-abusar sa limitadong suplay sa tubig, hulaw, ug lisod nga ekonomiya.

Mga siyudad nga naghitok sa mga tawo. Luag nga kapatagan nga may pat-akpat-ak sa gibiyaang mga lungsod. Nianang katingad-anang kalainan nahiluna ang dugang makapasubong pamatuod nga dili maayo ang pagmando sa tawo sa banika ingon man sa siyudad, ug niining planetaha ingon man sa katawhan niini. Sumala sa haom nga pagpahayag niini sa Bibliya: “Dili iya sa tawo nga nagalakaw ang pagtultol sa iyang lakang.” (Jeremias 10:23) Apan ang may-katakos, makiangayong kagamhanan dili saylo sa katakos sa Maglalalang sa tawo. Gisaad niya nga sa dili madugay ang tibuok nga yuta mahimong mabungahon, nga ugmaron sa makigdaitong mga molupyo inay laglagon sa mga saop nga dili mapugngan.​—Salmo 67:6; 72:16; Isaias 65:21-23.