Gikan sa Among mga Magbabasa

Mek-ap Ako nagtrabaho ingong usa ka tigmek-ap ug nadiskobrehan ko nga ang artikulong “Mga Batan-on Nangutana . . . Sa Unsang Paagi Makagamit Akog Mek-ap sa Hustong Paagi?” (Hunyo 22, 1990) tukma kaayo ug matulon-anon. Bahin sa kapeligrohan nga makontaminar sa bakterya ang mga sampol o mga igsusulay sa tindahan, ang usa ka maalamong panagana mao ang pagpalit sa usa ka dungganong tindahan. Ang maong mga tindahan kasagarang gialagaran sa maayong-pagkabansay nga mga kawani nga nagakugi pag-ayo nga mahuptang hinlo ug madanihon ang ilang mga igsusulay nga yunit alang sa mga pumapalit. Angay nga moinsistir ka usab nga gamiton ang ikalabay nga mga igpapahid, sama sa pamahid o binola nga gapas. Ang lipstik angay hinloan sa alkohol una gamiton. Ang mga brutsa sa mek-ap angay hinloan una pinaagi sa ighihinlong solvente. Ang mga lapis sa kilay angay talinisan una sa matag gamit. Makapakita ka usab ug konsiderasyon alang sa sunod nga pumapalit pinaagi sa dili pagbutang sa imong mga tudlo nganha sa bisan hain sa mga produkto.

C. H., Tinipong Bansa

Mga Pusil Nasilo ako sa inyong tinuis nga paghulagway sa mga pusil diha sa Mayo 22, 1990 nga isyu. Kataw-anan ang maong usag-kiliran, negatibong paghulagway sa waykinabuhing mga butang. Ang mga pusil dili sa kinaiyanhon maayo o daotan; ni ang paggama, pagbaligya, o pagpanag-iya kanila.

J. P., Tinipong Bansa

Ang akong uyoan namatyan sa iyang asawa sa usa ka aksidente sa kotse ug migugol sa tulo ka bulan nga sigeg inom. Sa kataposan iyang gitrangkahan ang iyang kaugalingon sa banyo ug gipusil ang kaugalingon. Ako naglaom nga ang mga tawo nga nagbasa sa artikulo mohunong ug mamalandong kon maayo ba ang pagpanag-iyag pusil.

M. C. A., Brazil

Bisan pag isugid ko nga gusto ko kaayog pusil, sa dihang nahurot ko pagbasa kadtong mga panira, kana nakapasukna kanako kon kaha mapuslanon ba nga padayonon ko ang pagtigom aron makapalit ug usa ka pusil.

D. M., Inglaterra

Katolikong mga Pagkabahinbahin Nalisang ako sa inyong isyu sa Hunyo 22, 1990! Kinahanglan bang ipakita ang atong gilansang nga Manluluwas nga mabahin sa tunga?

D. L. A., Tinipong Bansa

Wala tuyoa ang dili pagtahod kang Kristo. Ang krusipiho kasagarang gigamit nga usa ka simbolo sa Iglesya Katolika mismo. Ang larawan sa ingon naghulagway sa makapaguol nga mga pagkabahinbahin sulod sa Katolisismo. Makaiikag, sa dihang gisaway ni apostol Pablo ang sektaryanismo taliwala sa mga Kristohanon sa Corinto, iyang gigamit kining tin-aw nga ilustrasyon: “Si Kristo nabahin.” (1 Corinto 1:13)​—ED.

Pahalipay. Ang sinulat maayong pagkadukiduki, makaiikag nga pagkasulat, ug dili mahukmanon. Dili kamo makakombertir nako sa inyong relihiyon, apan kamo naglamdag ug nag-edukar kanako.

V. O., Tinipong Bansa

Patol Ipahayag ko gayod ang akong dakong pasalamat alang sa artikulo bahin sa patol! (Hunyo 22, 1990) Dako gayod nga kahupayan ang pag-amgo nga dili lamang ako ang nagaantos sa patol. Ako nakabatog grabeng depresyon nga buot ko nang taposon ang tanan. Ang artikulo miabot nga tukma sa panahon. Kadto nagbukas sa paglaom sa usa ka kaugmaon nga wala na ang sakit.

N. P., Federal Republic of Germany

Panukiduki Diha sa Kahayopan Gipasalamatan ko kaayo ang inyong artikulo. (Hulyo 8, 1990) Nahibalo ako nga ang mga eksperimento gihimo diha sa kahayopan, apan wala gayod ako maghunahuna nga sila gigamit diha sa paggama sa kosmetiko, shampoo, ug deterhente! Mahinamon akong nagapaabot sa panahon sa dihang mohunong na ang maong mga pag-abusar.

R. M., Italya