Gikan sa Among mga Magbabasa
Rosaryo Ako nagasulat mahitungod sa inyong artikulo sa rosaryo. (“Ang Panghunahuna sa Bibliya,” Hunyo 8, 1990) Pinasukad sa mapihigon nga panglantaw sa duha ka “kanhiayng-mga-madre,” kamo mihinapos nga ang Diyos dili buot nga kita moadto Kaniya pinaagi sa iyang Inahan, si Maria. Ang Katolikong doktrina nga si Maria tigpataliwala kang Kristo maoy kanhiay na ug maayong pagtukod. Ang usa nga mosulay sa pagbatok niining kamatuorana nga walay nagasusi sa tanang impormasyon nagahimo sa usa ka seryoso nga sala. Kuhaa ang tanang impormasyon!
M. E. M., Tinipong Bansa (babaye)
Among mapabilhan kon nganong pipila ka mga Katolikong magbabasa mobati sa ingon niini. Hinunoa, ang among artikulo maayong pagkadukiduki, ginamit ang talahorong mga tinubdan, apil na ang “New Catholic Encyclopedia.” Ug samtang ang mga komento sa mga kanhiayng-mga-madre nga gikutlo maoy makapainteres, ang artikulo nagpasukad sa iyang mga konklusyon sa mga testimonya sa Bibliya mismo. Mga kasiglohan sa tradisyon sa simbahan wala nag-usob sa kamatuoran nga ang Bibliya wala naghatag ug katungdanan kang Maria ingon nga “tigpataliwala.” Sa kasukwahi, si Jesus mismo miingon: “Walay makaduol sa Amahan gawas pinaagi kanako.” (Juan 14:6, Catholic “Jerusalem Bible”)—ED.
Teleskopyo Ang Marso 8, 1990, nga isyu adunay artikulong nag-ulohan “Talagsaong Teleskopyo Nagpadayag sa Misteryo sa Adlaw.” Akong gipakita kini sa akong maestra sa siyensiya ug siya nalipay niini. Duha ka adlaw sa ulahi ang maestra mihatag ug mga kopya sa tanan sa klase, ug among gihisgotan ang tibuok artikulo. Siya nagalaraw sa paggamit sa artikulo sa tanan niyang klase sa siyensiya.
A. V. A., Tinipong Bansa (babaye)
Makeup Halos tanan sa mga babaye sa akong klase sa eskuelahan nagagamit sa mek-ap, bisan kon pipila kanila 13 anyos lamang. Gusto nako nga gamiton kana, apan ang akong ginikanan dili gusto sa ideya. Kay nakabasa sa inyong artikulo (Mayo 22, 1990), ako karong nasabtan nga ikaw matahom gihapon bisan kon walay mek-ap. Gihunahuna ko nga maayo gayod kaayo nga kamo nagapatik sa mga artikulong desinyo sa mga batan-on.
D. C., Alemaya (babaye)
Salamat sa inyong artikulo kabahin sa paggamit hustong sa mek-ap. (Hunyo 22, 1990) Dili ako tugotan nga mogamit sa mek-ap tungod kay ako 11 lamang. Apan akong nahibal-an sa inyong artikulo nga sa dihang ako tugotan nga mogamit na sa mek-ap, mogamit lamang ako ug gamay, ug sa dihang ako modako na ug nagkinahanglan ug mas daghang mek-ap, mao na ang panahon nga ako magbutang ug ubay-ubay.
S. D., Tinipong Bansa (babaye)
Tawhanong Pagmando Ang inyong serye “Tawhanong Pagmando Gitimbang” nakapalibog kanako. Unsay nakaayo sa paghiwahiwa ug paghukom sa lainlaing porma sa tawhanong panggobyerno sa dihang ang tanang porma sa gobyerno miantos man sa walay hunong nga pakiglabot ni Satanas? Sa unsang paagi ang usa makasulti nga ang mga kuyot ni Satanas natapos ug ang pagkakulang sa tawo magsugod?
A. P., Tinipong Bansa (dili mahibal-an)
Ang impluwensiya ni Satanas sigurado nga nakaamot sa kapakyasan sa tawo nga momando sa iyang kaugalingon. Hinunoa, ang tawhanong pagmando nga bulag sa Diyos bisan kon wala nakiglabot si Satanas mapakyas. Nagaingon ang Jeremias 10:23: “Wala diha sa tawo nga nagalakaw ang pagtultol sa iyang lakang.” Ang among serye nagapatigbabaw sa pagkatinuod niining maong mga pulong.—ED.
Pagkagiyan sa Crack Salamat sa inyong tinuod-kinabuhing mga artikulo sa shabu. (Hulyo 22, 1990) Nasulayan na nako ang tanang droga nga nahibal-an gawas sa heroin, ug ako nagagamit sa droga sa 11 ka tuig. Ang akong asawa nagagamit usab ug nagabaligya pa. Samtang napriso sa 27 ka bulan, siya misugod sa pagtuon sa Bibliya uban sa mga Saksi ni Jehova ug nabawtismohan. Pinaagi sa pagtuon sa Bibliya, ug sa tabang ni Jehova, ako usab nakaputol sa paggamit sa droga sa bug-os.
C. V. Colombia (lalake)
Ang pagputol sa paggamit sa droga lisod, ug ang pipila nagakinahanglan sa propesyonal nga tabang aron mahimo nila kana. Ang pagtuon sa kamatuoran sa Bibliya, hinuon, mahimong usa ka gamhanan nga tabang sa paglingkawas gikan sa pagkagiyan.—ED.