Ang Bayad sa Paglimbong

ANG mga rinyon ni Casey Lunsford hapit dili na moobra. Gibanabana sa mga doktor nga ang batang lalaki nga tres-imedia ang edad mabuhi sulod na lang sa tulo o upat ka bulan gawas kon siya magbatog laing rinyon pinaagi sa transplant. Ang iyang mga ginikanan, nga mga Saksi ni Jehova, mihukom pabor sa operasyon; ngani, ang amahan ni Casey maoy modonar sa usa sa iyang mga rinyon ngadto sa bata.a Ang ila lang kondisyon mao nga dili gamiton ang dugo​—ang mga Saksi ni Jehova nagadumili sa dugo pinasukad sa Kasulatanhong mga hinungdan.​—Tan-awa ang Buhat 15:20.

Nagplano ang mga Lunsford nga ang mga operasyon himoon sa usa ka ospital sa Texas nga may iladong rekord sa malamposong mga transplant sa rinyon nga gihimo nga walay abuno sa dugo. Apan ang usa ka ospital nga pila ra ka milya ang kalayo gikan sa balay sa mga Lunsford sa California andam mohimo sa transplant nga walay abuno sa dugo. Gipili sa mga Lunsford ang maong mas duol nga ospital.

Sa semana sa wala pa ang operasyon, ang kawanihan sa ospital ug siruhano sa transplant balikbalik nga nagpasalig sa mga ginikanan nga dili na kinahanglan ang abuno sa dugo o ang orden sa korte nga mag-awtorisar sa usa bisan pa sa pagsupak sa mga ginikanan. Ugaling, tapos gayod sa pagsugot sa mga ginikanan sa operasyon, ang siruhano misugod sa paghikay sa pagbatog orden sa korte nga ipugos ang dugo diha kang Casey. Nakamaneobra gani siya nga pulihan ang usa ka social worker sa kaso sa dihang mipugos siya nga ang mga ginikanan may katungod nga masayod bahin sa orden sa korte. Sa buntag sa operasyon, ang ospital nagpayl ug sertipiko nga nangayog orden sa korte sa pag-abuno kang Casey. Gipasabot pa sa sertipiko nga si Casey naghigda nga giagasan ug dugo samtang diha sa lamesa sa operasyon sa dihang, sa pagkamatuod, ang operasyon wala pa magsugod! Usa ka oras tapos sa operasyon, nga malamposong nahimo nga walay dugo, si Casey gihatagag abuno sa dugo.

Gikiha sa mga Lunsford ang siruhano ug ang ospital tungod sa mga paglapas sa ilang sibil nga mga katungod ug tungod sa panlimbong, battery o pagpuwersa, tinuyong pagpahinabog emosyonal nga kasakitan, ug paglapas sa pagsalig tungod sa katungdanan. Tapos sa upat-ka-semanang husay, ang hurado nagdiskusyon sulod sa duha ug tunga ka adlaw ug mihatag sa hukom nga kontra sa siruhano ug sa ospital. Gimandoan sila sa pagbayad sa mga Lunsford sa katibuk-ang kantidad nga $500,000.

Bisan tuod ang huwes nga naghusay karon midisidir kontra sa hukom bahin sa mga paglapas sa sibil nga mga katungod ug mimando ug bag-ong husay alang sa paglimbong ug sa ubang mga sumbong, ang 12 ka hurado kombinsido nga ang paglansis sa ospital ug sa doktor nagpakamatarong sa bayranan nga $500,000. Ang mga abogado sa pamilya nagpaila nga tinguhaon nila nga depensahan ang desisyon sa hurado pinaagi sa usa ka apelasyon.

[Footnote]