Pagsumpay sa Kal-ang Tali sa mga Doktor ug sa mga Pasyenteng Saksi

ANG mga doktor sa tibuok kalibotan nahibalo sa usa ka butang bahin sa mga Saksi ni Jehova: Sila modumili sa pag-abuno sa dugo. Hinuon, daghang mga doktor wala kaayoy kasayoran bahin sa mga Saksi. Busa sa dihang gusto nilang dugangan ug dugo ang usa ka pasyenteng Saksi, lantawon nila ang pagdumili nga dili-makataronganon. Busa, usa ka makaguol nga kal-ang nagapabulag sa doktor ug pasyente.

Pila lang ka doktor ang nakaamgo nga ang mga Saksi ni Jehova dili supak sa medikal nga pagtambal ug nga ang ilang baroganan sa dugo maoy dili madala sa sabotsabot ug sa kalig-on gipasukad sa Kasulatanhong balaod. Kasamtangan, ang pagkamakataronganon niining Kasulatanhong baroganan kanunay nga natuboy tungod sa pagdagsang sa bag-ong mga kaplag sa siyensiya bahin sa mga kapeligrohan sa mga pag-abuno sa managsamang tipo sa dugo ug ang pagkaluwas sa mga kapilian sa pagpadugang sa dugo. Apan sa unsang paagi ang mga Saksi ni Jehova makapaabot niining impormasyona ngadto sa medikal nga katilingban?

Mga Komite nga Tigpakigsabot sa Ospital

Alang niana nga katuyoan, ang Nagamandong Lawas sa mga Saksi ni Jehova nagdumala sa pagtukod ug mga komite nga tigpakigsabot sa ospital diha sa dagkong mga siyudad nga adunay dagkong medikal nga mga institusyon. Sa Tinipong Bansa, mga usa ka gatos ka komite, nga adunay aberids nga lima ka ministro sa kada usa, nagsilbing taytayan sa medikal nga katilingban ug sa mga Saksi. Sayo niining tuiga ang kahikayan gipaabot sa ubang mga nasod. Gikan sa Pebrero 19 ngadto sa Marso 17, tulo ka membro sa Hospital Information Services sa Brooklyn miduaw sa walo ka sangang buhatan sa mga Saksi ni Jehova sa Pasipiko.

Ang katuyoan niini maoy tutulo: ang paghimo ug mga seminar aron sa pagbansay sa pinili-nga-daan nga mga ministrong Saksi alang sa buluhaton sa mga komite nga tigpakigsabot sa ospital, sa pagbansay sa mga kawani sa sanga aron sa pagdumala sa departamento sa Hospital Information Services sa matag sanga, ug sa pagbisita sa mga ospital ug mga doktor aron sa padayong pagdasig ug sa mauswagong pagtambal sa mga Saksi ni Jehova nga walay paggamit ug dugo. Upat ka seminar ang gihimo: usa sa Sydney alang sa Australia ug New Zealand; usa sa Manila alang sa Pilipinas, Hong Kong ug Taiwan; usa sa Ebina City alang sa Japan ug Korea; ug ang kataposan sa Honolulu alang sa Hawaii.

Ang programa migamit ug slides ug video sa pagpatin-aw sa obra ug sangkap sa dugo ug sa nagtaas nga listahan sa mga kapaingnan sa managsamang tipo sa dugo. Gikobrehan sa panaghisgot ang mga paagi sa pagtabang sa mga Saksi ni Jehova sa dihang sila moatubang ug mga problema bahin sa dugo. Ang seminar nagpasiugda usab sa bili sa pagkooperar sa mga doktor ug mga ospital, aron mas masayon kanila ang pagtahod sa baroganan sa mga Saksi. Ang usa ka membro sa komite sa Hapon miingon: “Ang programa tinuod nagsangkap kanamo sa pagsugod sa buluhaton sa pag-ugmad ug pagsabot.” Sobra sa 350 ka mga Saksi gikan sa tanang lakat sa kinabuhi gibansay sa maong upat ka seminar.

Sa wala pa ang maong mga pagbisita, ang mga sangang buhatan nakigsabot sa mga inilang mga siruhano ug sa mga labaw nga membro sa dagkong mga ospital aron sa paghisgot sa walay-dugo nga pagtambal alang sa mga Saksi ni Jehova. Tulo ka grupo sa kada sanga gitudlo sa paghimo niini nga mga pagbisita, kada usa gipangunahan sa usa sa mga representante gikan sa Brooklyn. Kini wala lang maghatag ug dihadiha nga pagbansay niadtong gitudlo nga mahimong mga membro sa komite sa ospital kondili kini nakapahimo usab kanila nga haruhay sa dihang makigsulti sa mga doktor ug mga propesyonal nga nagatagad-sa-panglawas. Sobra sa 55 ka mga pagbisita ang nahimo niining unom-ka-semana nga yugto.

Mga Taytayan sa Kooperasyon

Ang mga resulta maoy makapatagbaw. Sa Australia, usa ka nagabisita nga grupo nakatagbo sa luyoluyo sa ministro sa panglawas alang sa estado sa New South Wales. Ilang gihisgot uban kaniya ang pag-opera nga walay dugo diha sa daghang sentro nga nagatagad-sa-panglawas, nagsugyot nga ang Australia puwede nga mahimong sentro sa maong mga operasyon alang sa mga Saksi ni Jehova diha sa Habagatang Pasipiko. Wala siyay nakitang katarongan kon nganong ang mga tem sa mga doktor dili matukod nga mohimo sa maong mga operasyon. Kawhaag-duha ka pagbisita ang nahimo sa Australia. Ang usa ka direktor sa ospital nag-ingon: “Mas daghan kamo ug nahibaloan bahin sa dugo ug mga kapilian sa pagtambal kay kanamo.” Ang hepe sa usa ka grupo sa pito ka ospital nagpasalig nga siya magtudlo ug usa ka propesor sa operasyon aron ipadayon ang ideya sa pagtukod ug usa ka tem sa mga siruhano sa usa sa ilang mga ospital aron kapadapatan ug walay dugo nga pagtambal ang mga Saksi ni Jehova.

Diha sa heart center sa Manila​—giisip sa uban nga pinakamaayo sa Oryente—​gipunting ngadto sa medikal nga direktor nga duolan sa usa gatos ka mga Saksi ni Jehova nga naghulat ug operasyon sa kasingkasing gibutang sa kataposan sa listahan tungod kay sila dili magpaabuno ug dugo. Siya miingon nga hunongon niya ang maong praktis. Ang medikal nga direktor sa St. Luke, ang pinakabantog nga ospital sa Pilipinas, gipakitaan kon unsay gipahayag karon sa mga medikal nga literatura bahin sa walay-abuno nga operasyon, ug siya miuyon nga kini mas luwas. “Mao na kini ang bag-o karon,” siya miangkon. “Mao lang kini ang paagi nga kita makalikay sa AIDS ug hepatitis.” Siya nagpahayag nga siya andam nga mohatag sa mga Saksi ug higayon nga matambalan nga walay pag-abuno sa dugo diha sa iyang pasilidad; siya usab ang presidente sa tipiganan sa dugo sa maong ospital.

Diha sa tulo ka adlaw nga seminar sa Hapon, ang Korea adunay hawas usab, nga may delegasyon nga 44 ka mga Saksi ni Jehova, 5 kanila mga doktor. Gikan sa Hapon adunay 255 ka ministrong Saksi, apil ang 41 ka doktor, uban kanila maoy pila ka neurosiruhano ug anestesiologo, ug 2 ka abogado. Kawhaan ka komite ang gitukod sa Hapon, ug pito sa Korea.

Human sa seminar, ang mga instruktor miuban sa lokal nga membro sa komite aron sa pagbisita sa mga doktor sa ospital sa Tokyo aron sa pag-ugmad ug kooperatibong relasyon. “Mibisita kami sa usa ka luyoluyong propesor sa obstetrics diha sa usa ka ospital sa unibersidad,” nagreport ang usa ka ministrong Hapon. “Siya nakapanabang labing menos napulo ka babaye nga mga Saksi ni Jehova. Ang usa kanila nahutdan ug 2,800 kubikong sentimetro nga dugo, ug and iyang lebel sa hemoglobin mius-os sa 3.5 ka gramo/desilitro. (Ang aberids alang sa babaye maoy 14 gramos/desilitro.) Apan ang doktor milampos sa pagpanabang nga walay dugo. Bisag usa ka Buddhista, ang iyang baroganan mao ang pagtahod sa tinuohan sa iyang mga pasyente. Siya miuyon sa pagpadayon sa pagdawat ug mga pasyenteng mga Saksi ni Jehova.”

Usa ka medikal nga direktor sa Yokohama miuyon nga malista ang iyang ospital taliwala sa mga ospital nga andam nga makigkooperar ug miingon nga sila malipay sa pagdawat sa mga Saksi nga gidumilian sa ubang mga ospital. “Ang pagtambal sa mga Saksi ni Jehova nga walay dugo,” miingon ang doktor, “sa pagkamatuod maoy usa ka hagit, apan akong giapresyar ang mga Saksi tungod kay gihatagan nila ako ug higayon nga mapauswag ko ang akong kabatid ingong usa ka doktor.” Didto usab sa Yokohama nga usa ka ginikologo nag-ingon: “Mosukol ako diha sa korte kon isumbong man ako tungod sa pagtahod sa kabubut-on sa pasyente ug sa mga dili pag-abuno ug dugo.”

Nagtaho ug kalamposan ang mga komite nga gitukod alang sa Korea. Niadtong Mayo 26 usa ka pagbisita ang gihimo didto sa Ospital sa Yonsie nga Unibersidad. Kini inila sa tibuok nga Korea ug adunay tulo ka sanga. Ang mga membro niining maong mga pasilidad nanambong, nga mitotal ug 62 ang tanan. Usa ka propesor sa anestesiyologo naghisgot bahin sa “Paghatag ug Anestesiya sa mga Pasyenteng Saksi ni Jehova.” Ang impormasyong iyang ihatag ipatik sa usa ka basahon bahin sa anestesiyolohiya sa Korea. Sanglit usa man kini sa pinakamaayong ospital sa Korea, mohatag kinig dakong impluwensiya sa ubang mga ospital ug mga doktor. Walay pangutanang mitungha nga wala mahisgoti diha sa seminar sa Hapon.

Lima ka komite nga tigpakigsabot ang gitukod sa Hawaii, ug ang tanan kanila miadto sa Honolulu alang sa seminar. Kadaghanan kanila gidala sa mga pagbisita sa ospital. Diha sa Hawaii Healthcare Center, ang direktor miingon nga siya magsulat ug usa ka artikulo bahin sa mga Saksi sa ilang mantalaan aron ipadala sa tanang ospital sa Hawaii.

Diha sa pinakadako nga sentro nga nagaatiman sa panglawas, sa Queen’s sa Honolulu, gipunting sa komite nga ang porma sa kasabotan nga gigamit sa sentro nagagamit ug sayop nga pulong nga nagamisrepresentar sa mga Saksi ni Jehova. Dinha sa porma maorag gipasabot nga ang mga Saksi magpakamatay na lamang kay sa magpaabuno ug dugo nga “makaluwas sa kinabuhi.” Giklaro nga dili kini mao ang atong baroganan, kondili moadto kita sa ospital aron sa pagpanalipod sa atong lawas ug kinabuhi. Ang ilang paghan-ay sa pulong mopatim-aw nga ang paggamit sa dugo maayo kaayo ug ang walay dugo nagkahulogan sa kamatayon. Ang pinulongan sa porma napakyas sa pagdawat sa posibilidad sa kamatayon tungod sa mga pag-abuno, sa ingon wala magtanyag sa pasyente ug may-kahibalo nga kapilian kon unsang mga kapeligrohan nga andam niyang kuhaon. Ang abogado sa ospital nag-ingon: “Palantawa ko niana!” Sa iyang gibasa kini, siya nag-ingon: “Wala ako magsulat niini!” Sa dihang ang abogado ug ang administrador milakaw, ang administrador miingon sa abogado: ‘Maayo tingaling atong susihon kining dokumentoha.’

Bag-ong Komite Nagatuman sa Iyang Katuyoan

Sa pipila lamang ka adlaw tapos sa sesyon sa pagbansay sa Hawaii, usa ka Saksi ang gidali sa pagdala sa ospital tungod sa grabeng anemia, ang iyang ihap sa dugo mubo kaayo. Walay pagdugo ang makita; mahilingong operasyon ang gikinahanglan. Ang doktor dili moopera kon walay dugo. Siya gibalhin sa lain nga ospital diin ang doktor dili usab moopera. Ang bag-ong gitukod nga komite mitungha, nakig-estorya sa medikal nga direktor ug sa nagatagad nga doktor, ug gipatin-aw nga, sa ingon, ang pasyente giabandonar. Ang doktor midumili gihapon sa pag-opera ug gipulihan ug lain. Duha pa ka siruhano ang gitawag. Ilang gihimo ang operasyon, nakita ang hinungdan sa pagdugo, ug natambalan ang sakit. Ang atong sister naluwas. Kon wala pa makiglabot ang komite, mamatay unta siya, ug itaho unta kini sa palumagian sa balita nga laing kaso maylabot sa usa ka Saksi nga ‘namatay tungod kay wala kahatagi sa gikinahanglang dugo.’ Sa tinuoray, sa maong mga kaso nangamatay ang mga Saksi tungod kay wala kaoperahi sa higayon nga ang may katakos nga mga siruhano makaluwas man unta kanila.

Nan, sa internasyonal nga sukod, ang mga komite nga tigpakigsabot sa ospital naningkamot sa pagsumpay sa kal-ang taliwala sa medikal nga katilingban ug sa mga Saksi ni Jehova pinaagi sa makahuloganon nga komunikasyon ug panagsabtanay sa usag-usa. Ang resulta makapatagbaw. Dugang ug dugang mga doktor ang nagpakaamgo nga ang maayong medikal nga praktis ug batid nga pag-opera makapaangay sa mga pagtulon-an sa mga Saksi ni Jehova. Sa Tinipong Bansa, kapin sa 6,500 ka doktor ang andam nga mohimo niana.

Sa ilang bahin, ang mga Saksi kinahanglang maningkamot kanunay nga makigkooperar ug mahimong makataronganong mga pasyente. Sa ingon niana, ang mga doktor modangat pa gani sa pagtahod sa mga Saksi sa ilang pagsunod sa hataas nga mga prinsipyo. Ang usa ka katabang nga propesor sa urologo sa usa ka medikal nga kolehiyo sa Tokyo miingon: “Gitahod ko ang mga pasyenteng mga Saksi ni Jehova. Sila adunay tino nga mga prinsipyo diha sa usa ka kalibotan nga nawad-an nag mga prinsipyo.”

Ang katibuk-an nga tumong niini nga mga seminar ug mga pagbisita maoy pagpalambo sa mas matinahurong kooperasyon ug sa ingon malikayan ang konprontasyon. Ang tanan nga nalangkit niining maong paningkamot mibati nga kining maong tumong nakab-ot uban sa makapatagbaw nga kalamposan. Masaligon kami nga si Jehova magapadayon sa pagpanalangin niining maong mga paningkamot ug nagalig-on niadtong nagatuman sa pagtultol ni Jehova sa paglikay sa dugo, sumala sa gisugo sa iyang Pulong nga ilang pagabuhaton.

[Kahon sa panid 24]

[Hulagway sa panid 23]

Hospital Committee Seminar—March 12, 1990