Mga Saksi ni Jehova ug ang Medikal nga Propesyon Nagtinabangay

NIADTONG 1945, nasabtan sa mga Saksi ni Jehova nga dili-kasulatanhon ang paggamit sa dugo. Nasulat sa Moisesnong Kasugoan, ang pagdili nadala ngadto sa Kristohanong Gregong Kasulatan. Ang Buhat 15:28, 29 nag-ingon: “Ang balaang espiritu ug kami sa among kaugalingon nagkauyon sa dili paghatag ug dugang palas-anon kaninyo, gawas niining kinahanglanong mga butang, sa paglikay sa mga butang nga gihalad ngadto sa mga diyosdiyos ug gikan sa dugo ug sa mga butang nga naluok ug sa pakighilawas. Kon kamo mag-amping sa pagpahilayo niining mga butanga, magmauswagon kamo. Maayong panglawas kaninyo!” (Tan-awa ang Levitico 17:10-12.) Ang pagdumili sa mga Saksi sa pagpaabunog dugo misangpot ug daghang dili-pagsinabtanay diha sa pipila sa medikal nga propesyon.

Mga Hospital Liaison Committee

Sa pagpaluyo sa mga Saksi sa ilang pagdumili sa dugo, sa paghusay sa dili-pagsinabtanay sa bahin sa mga doktor ug sa mga ospital, ug sa pagmugnag mas kooperatibong espiritu tali sa medikal nga mga institusyon ug sa mga pasyenteng Saksi, ang mga Hospital Liaison Committee gitukod sa Nagamandong Lawas sa mga Saksi ni Jehova. Gilangkoban sa hamtong nga mga Saksi nga nabansay sa pagpakig-atubang nga masinabtanon sa mga doktor ug sa mga ospital, ginapakalma niining mga komiteha ang mga dili-pagsinabtanay, ug nagatukod sila ug mas kooperatibong espiritu. Diyutay lamang ang maong komite niadtong 1979, ang ilang gidaghanon karon mitubo ngadto sa 850 diha sa 65 ka kayutaan. Kana nagkahulogan nga ang ilang makatabang nga mga serbisyo karon mabatonan na sa mga 3.5 ka milyong Saksi ni Jehova.

Kapin sa 4,500 ka ansiano sa mga kongregasyon sa mga Saksi ni Jehova ang nabansay sa pagpakigsulti sa mga doktor sa pagtabang kanila nga makita gikan sa medikal nga literatura mismo ang tanang butang nga mahimong himoon nga dili modangop sa mga pag-abuno ug dugo. Sa mga kaso nga may linain nga panginahanglan, ang haom nga mga artikulo ipadala pinaagig fax direkta sa ospital aron matabangan ang mga doktor sa pagtambal sa mga Saksi nga walay paggamit ug dugo. O kaha ang mga komite maghikay sa pagpakigkonsulta sa ubang matinabangong mga doktor aron sa paghimog mga paagi alang sa walay-dugo nga pagtambal o pag-opera.

Pananglitan, sa daghang kaso sa pagkawala sa dugo gumikan sa grabeng anemya, diin ang mga doktor miingon nga gikinahanglan ang pag-abunog dugo aron motaas ang gidaghanon sa pulang-selula, ang mga membro sa Hospital Liaison Committee nakapaambit sa mga artikulo gikan sa medikal nga literatura nga nagpakita sa pagkaepektibo sa recombinant erythropoietin (EPO) sa paghimo sa samang butang. Kining ginama nga hormone molihok sama sa kinaiyanhong erythropoietin nga makaplagan sa atong mga amimislon ug magpalihok sa utok sa bukog sa pagpadala ug bag-o, preskong mga pulang selula ngadto sa sapasapa sa dugo.

Ang pila ka doktor nagtuo nga ang EPO dili dayon moepekto sa pagtagana sa panginahanglan, apan daghang kaso nga nalangkit ang mga Saksi ni Jehova nagpakita nga kini moepekto dayon. Sa usa ka higayon, sa mismong adlaw human gihatag ang EPO, ang gidaghanon sa bag-ong mga pulang selula maoy upat na ka pilo kay sa normal nga gidaghanon! Sa misunod nga adlaw miarang-arang ang pasyente, ug sa ikaupat ka adlaw, ang gidaghanon sa pulang selula misugod sa pagtaas. Sa pila pa ka adlaw, kana tulin nga mitaas. Ang pasyente naluwas. Niining paagiha ang mga doktor ingon man ang pasyente nakapahimulos sa mga kalihokan niining mga Hospital Liaison Committee.

Sa dihang ang mga doktor sa Australia miingon nga dili nila maluwas ang kinabuhi sa usa ka pasyenteng Saksi nga walay paggamit ug dugo sa pagtambal sa usa ka talagsaong tropikonhong sakit, sila nangayo sa lokal nga Hospital Liaison Committe ug tabang nga ikahatag sa komite kanila sa pagpangitag impormasyon labot sa medikal nga pagdumala nga walay paggamit ug dugo. Ang sangang buhatan sa Australia sa mga Saksi ni Jehova gipahibalo sa panginahanglan. Sila nakigkontak sa Hospital Information Services sa mga buhatan sa internasyonal nga hedkuwarter sa mga Saksi ni Jehova sa Brooklyn, New York. Nanukiduki kinig medikal nga impormasyon diha sa kompiyuter. Ang makatabang nga mga artikulo gipadala pinaagig fax ngadto sa Australia. Onse ka oras lamang human mibiya sa opisina sa doktor, ang sakop sa Hospital Liaison Committee sa Australia mibalik dala ang gikinahanglang mga artikulo. Kini epektibo gayod, ug ang pasyente naulian. Ang medikal nga materyal gikan sa New York nakaabot ingon ka layo sa Nepal pinaagi sa fax.

De-kalidad nga Panukiduki ug Tabang

Ang de-kalidad nga panukiduki nga gihimo sa mga Saksi ni Jehova sa medikal nga literatura kasaligan ug nunot-sa-panahon. Usa ka rehistradong nars nga kaubang-direktor sa serbisyo sa pagdisdis sa usa ka ospital sa Oregon, T.B.A., miingon sa usa ka artikulo diha sa medikal nga basahon alang sa mga tigdumala sa lawak-disdisanan: “Ang [mga] Saksi ni Jehova . . . mas abante kay kanato. Sila mao ang labing nahibalo labot sa mga kapuli sa dugo ug mga produkto sa dugo ug sa subsob nagahatag kanato ug literatura una pa nato kini madungog.”​—OR Manager, Enero 1993, panid 12.

Ang pila ka ilado kaayong mga doktor ug mga ospital nga motambal nga dili mogamit ug dugo nga samag tipo andam nga konsultahon labot sa ilang mga pagdumala ug mga paagi. Ang ilang manggihatagong sanong niining panginahanglana nakatabang sa pagluwas ug mga kinabuhi, ingon sa makita diha sa mga kaso sa malamposong mga pagtambal sa leukemia ug sa lainlaing matang sa operasyon. Kining medikal nga mga konsultasyon subsob nga ginahimo pinaagig internasyonal nga tawag sa telepono.

Nagpaila usab sa gilapdon nga nahimo sa mga Saksi ni Jehova sa pagtabang niadtong nanginahanglan sa dihang sila mag-atubang ug nagahagit-sa-pagtuo nga kahimtang sa medikal mao ang kahikayan sa pagbalhin sa pasyente gikan sa usa ka ospital ngadto sa lain, gikan sa usa ka bahin sa nasod ngadto sa lain, ug gani bisan gikan sa usa ka yuta ngadto sa lain. Ang pila ka pananglitan: Usa ka hamtong nga pasyente gipasakay sa ayroplano gikan sa Suriname ngadto sa Puerto Rico; ang lain gipasakay sa ayroplano gikan sa Samoa ngadto sa Hawaii; usa ka masuso, gikan sa Austria ngadto sa Florida, T.B.A.

Dugang mga Doktor ang Nakigkooperar

Ang pag-uswag sa kahimtang sa mga Saksi ni Jehova makita usab diha sa nagatubo nga gidaghanon sa mga doktor nga andam mokooperar kanila niining butanga, gikan sa mga 5,000 sa milabayng lima ka tuig ngadto sa kapin sa 30,000 karon diha sa 65 ka kayutaan. Kanang gidaghanona sa may-katakos nga mga doktor nagpaposible pa sa laing paborableng kaugmaran​—ang pagkaporma sa kapin sa 30 ka medikal ug pagdisdis nga mga sentro nga dili mogamit ug dugo diha sa nagkalainlaing yuta.

Busa, karon, labing menos sa Amerika del Norte, halos dili ka na makadungog ug mga paningkamot sa pagpugos sa pag-abuno ug dugo diha sa usa ka hamtong, ug daghang ubang kayutaan ang nagauswag sa maong punto. Ang kadaghanang suliran karon maoy labot sa bag-ong nahimugso nga mga bata ug ilabina sa wala-sa-panahon nga mga pagpanganak. Kining mga ahat nga pagkatawong mga bata magsugod sa daghang suliran nga nalangkit sa wala-pa-maugmad nga mga organo nga dili normal ang pag-obra, sama sa mga baga ug mga amimislon. Apan ang mga doktor nangitag mga paagi sa pagtambal niining mga kahimtanga nga walay pag-abuno ug dugo. Pananglitan, ang artipisyal nga surfactant nga mopugong sa tisyu sa baga sa pagpilit, mabatonan aron sa pag-alibyo sa respiratory distress syndrome o kalisod sa pagginhawa. Ang paggamit ug EPO alang sa pagtambal sa anemya gumikan sa ahat nga pagpanganak kaylap na nga gidawat.

Tabang Alang sa Medikal nga Kawani ug mga Opisyal

Aron tabangan ang mga pedyatrisyan ug mga doktor sa bag-ong nahimugso sa pagtambal sa mga bata sa mga Saksi ni Jehova nga walay pag-abunog dugo, ang Hospital Information Services nakapatunghag tulo-ka-indese nga tomo sa 55 ka artikulo gikan sa medikal nga basahon nga nagpakita kon unsay mahimo nga dili mogamit ug dugo alang sa daghang suliran sa bag-ong nahimugso.

Aron ang mga huwes, mga tig-alagad sa katilingban, mga ospital sa mga bata, mga doktor sa bag-ong nahimugso, ug mga pedyatrisyan maabot sa impormasyon labot sa mabatonang medikal nga mga kapilian nga walay paggamit ug dugo, ang mga Saksi ni Jehova sa linain naghimog 260-panid nga tomo nga gitawag Family Care and Medical Management for Jehovah’s Witnessesa alang niining medikal nga kawani ug mga opisyal. Kini maoy basahon nga matangtang ang panid aron mahuptan kining nunot-sa-panahon. Sanglit may pila ka dili pagsinabtanay labot sa pamilyahanong pagkinabuhi taliwala sa mga Saksi ni Jehova, gipatin-aw usab niini ngadto sa propesyonal nga mga tawo ang gugma sa mga ginikanan alang sa ilang mga anak sa paagi nga makaayo kaayo, mahigugmaong atmospera gumikan sa estilo-sa-pagkinabuhi nga gipahinabo sa pagtulon-an sa Bibliya.

Giunsa pagdawat kanang publikasyona? Human nasusi ang kaundan niana, ang bise presidente sa usa ka ospital sa mga bata sa Pennsylvania, T.B.A., miingon nga naglaom siya nga kana sabton ug gamiton sa iyang sakop. Siya midugang: “Kon kana ibalik kanako nga walay timaan nga gitun-an, gusto nakong mahibaloan kon ngano!” Giamendar sa pila ka huwes ang ilang mga mando sa korte sa pagsugo sa tanang doktor nga gamiton sa usa ang tanang dili-dugo nga mga kapilian una pa mogamit ug dugo. Ang mga bata natambalan nga walay dugo ug naayo.

Ang kasagarang reaksiyon mao kadtong sa usa ka maghuhukom sa mga kaso nga nalangkit ang menor-de-edad nga mga bata sa Ohio, T.B.A. Siya nakadayeg kaayo sa librong Family Care nga siya mipididog dugang pito ka kopya alang sa iyang kaubanan. Karon iyang gibag-o ang iyang mga mando sa korte sa pagtimbang sa mga obligasyon sa doktor batok sa mga katungod sa mga ginikanan, gihimo kini sa duha ka paagi. Iyang gidetalye ang iyang mando (1) nga kinahanglan unang gamiton sa mga doktor ang tanang kapiliang tambal una pa gamiton ang dugo; ug (2) nga kinahanglang pasaligan siya sa mga doktor nga ang dugo nga ilang gamiton nasusi ug walay kagaw sa AIDS ug hepatitis. Sa tulo ka mando nga giisyu sukad nga iyang gibag-o kana, ang tulo ka bata malamposong natambalan nga wala kaabunohig dugo.

Si Dr. Charles H. Baron, propesor sa abogasiya sa Boston College Law School, mipresentar ug usa ka sinulat sa miaging tuig panahon sa tigom sa mga magtutudlo sa University of Paris. Ang iyang ulohan maoy “Dugo, Sala, ug Kamatayon: Kalihokan sa mga Katungod sa mga Saksi ni Jehova ug sa Amerikanong mga Pasyente.” Diha sa maong sinulat mismo, ang sunod nga parapo nagpahayag mahitungod sa buluhaton sa mga Hospital Liaison Committee sa mga Saksi:

“Sila nakadani pa gani sa Amerikanong mga doktor sa pagtuon pag-usab sa pipila ka pagtuo niini sumala sa katin-awan sa dugang ebidensiya. Sa proseso, ang tibuok katilingbang Amerikano nakapahimulos. Dili lamang ang mga Saksi ni Jehova, kondili ang mga pasyente sa kinatibuk-an, karon dili na dapatan ug wala-kinahanglanang pag-abuno sa dugo tungod sa gihimo sa mga Hospital Liaison Committee sa mga Saksi. Ang mga pasyente sa kinatibuk-an nakabaton ug mas dakong katungod sa paghimog desisyon labot sa tanang matang sa pag-atiman sa panglawas tungod sa gihimo sa mga Saksi ingong bahin sa kinatibuk-ang kalihokan sa mga katungod sa mga pasyente. Ug ang mga kawsa sa kagawasan sa kinatibuk-an ug sa relihiyosong kagawasan sa partikular napauswag sa masibotong pakigbisog sa mga Saksi batok sa tanang paningkamot sa pagpugos kanila sa paglihok nga supak sa ilang relihiyosong mga tinuohan.”

Kining tanang kalihokan sa mga Hospital Liaison Committee maoy dili direktang pagsangyaw sa maayong balita sa Gingharian sa Diyos, apan kini sa pagkatinuod nagatubag sa direktang hagit sa atong pagsimba mahitungod sa gitawag sa unang siglo nga nagamandong lawas nga usa sa “kinahanglanong mga butang” sa atong balaang pag-alagad. (Buhat 15:28, 29) Hinuon, makaiikag nga ang atong maisogon apan dungganon nga paningkamot sa pagpakigkomunikar nakabukas sa dalan alang sa pila ka medikal nga mga propesyonal sa pagsanong sa mensahe sa Gingharian. Daghang membro sa mga Hospital Liaison Committee nakadumalag mga pagtuon sa Bibliya uban sa mga doktor nga ilang nahibalag pinaagi sa kalihokan sa komite, duha sa maong mga doktor bag-o pang nabawtismohan.

Busa pinaagi sa tabang sa kahikayan sa Hospital Liaison Committee, ang mga Saksi ni Jehova natabangan sa pagsugot sa hingpit nga balaod ni Jehova labot sa paglikay sa dugo, nga dili ikompromiso ang ilang integridad ug sa gihapon makabaton sa gikinahanglang medikal nga pag-atiman. (Salmo 19:7) Sa pagkatinuod adunay nagapadayon maayong kalamposan sa pagwagtang sa dili pagsinabtanay nga kanhi naglungtad. Ang mga doktor ug mga ospital karon mas nahibalo kon unsaon nila sa pagtagana sa mabatonang dili-dugo nga pagtambal. Alang sa mga pasyente, mga paryente, relihiyosong mga kauban, ug kawani sa ospital, kanang resulta nga gusto sa tanan​—ang himsog nga pagkaayo sa pasyente.​—Tinampo sa Hospital Information Services sa tibuok-kalibotang hedkuwarter sa Watch Tower Society.

[Footnote]

[Hulagway sa panid 25]

Ang Liaison Committee nakigsulti sa usa ka doktor

[Hulagway sa panid 26]

“Pag-atiman sa Pamilya”