Doktor-Pasyente nga Komunikasyon—Usa ka Yawi sa Kalamposan

SAYO sa katuigang 1980, nadayag nga angay himoon ang maisogong mga pasiunang tikang aron matukod ang maayong komunikasyon tali sa mga Saksi ni Jehova ug sa medikal nga komunidad. Busa giawtorisar sa Nagamandong Lawas sa mga Saksi ni Jehova ang usa ka programa aron maugmad ang moobrang relasyon uban sa mga doktor ug sa mga ospital.

Gibisita sa mga hawas gikan sa hedkuwarter sa mga Saksi sa kalibotan sa New York City ang daghang dagkong ospital nianang siyudara. Kadto giapresyar pag-ayo sa mga kawani sa ospital, ug gipahimutang niadto ang usa ka pasikaranan sa kooperasyon, inay sa panagbangi. Human niadto gidumala sa maong mga hawas ang mga seminar sa dagkong mga siyudad sa tibuok nasod. Ingong usa ka bahin sa maong mga seminar, ilang gidala ang lokal nga mga ministro sa mga Saksi ni Jehova alang sa mga tigom diha sa mga ospital sa dapit, sa ingon nagbansay sa maong mga ministro sa pagpadayon sa programa. Sa didto sa Chicago, Illinois, U.S.A., sila nakigkita sa editor sa Journal of the American Medical Association. Misangpot kadto sa imbitasyon sa pagsulat ug artikulo bahin sa kon unsaon sa mga doktor pagtambal ang mga Saksi ni Jehova.a

Sa nahaigong panahon, ang pagbansay ug sinulat nga mga direksiyon nga detalyado gitagana aron ang mga Saksi sa ubang kayutaan makasugod sa susamang mga programa.b Pananglitan, tapos madumala ang usa ka seminar sa Canada, naporma ug nabansay ang Hospital Liaison Committees (nga sa ulahi gitawag didto nga Medical Liaison Committees). Ang matag komite gilangkoban sa mga Kristohanong ansiano nga andam ug arang makaestorya sa mga doktor, mga social worker, ug mga kawani sa ospital.

Gihimo ang mga kasabotan uban sa pila ka probinsiyal nga ministro sa panglawas, mga direktor sa medikal ug ospital nga mga asosasyon, ug ubang impluwensiyal nga tawo diha sa natad nga nagaatiman sa panglawas. Kining mga tigoma nakatabang sa paghimo sa medikal nga komunidad nga mas sensitibo sa mga kahikayan sa mga Saksi ni Jehova. Sa ingon ang usa ka lig-ong patukoranan napahimutang alang sa umaabot nga pakig-estorya.

Usa ka Andam nga Tinubdan sa Tabang

Dugay nang giila nga ang tukmang impormasyon maoy usa ka dakong tabang sa paghupay sa lagmit nga mga pagharongay tali sa sinserong mga Kristohanon ug sa mga doktor nga nagasalig sa dugo ingong tambal. Sa sinugdanan sa katuigang 1960 sa hedkuwarter sa mga Saksi ni Jehova, nasugdan sa pagtigom ang usa ka listahan sa kooperatibong medikal nga mga doktor. Kini sila maoy mga doktor nga sinati sa medikal nga mga kapuli sa abuno sa dugo. Sa ulahi, kon ang usa ka lokal nga doktor o ospital malisdan sa pagdumala sa usa ka kaso, ang usa ka komite makabaton sa mga ngalan sa ubang mga doktor. Unya ang pasyente ikabalhin ngadto sa laing grupo sa mga doktor.

Ang laing kapaingnan mao nga ang Hospital Liaison Committees makahikay sa usa ka konsultahay sa telepono tali sa lokal nga siruhano ug sa iyang eksperyensiadong mga kauban. Usahay kining matanga sa dihadihang komunikasyon nakapaarang sa mga doktor sa pagbag-o sa ilang tambal, nga walay hinobrang riyesgo sa pasyente. Busa, sa pag-alagad ingong usa ka koneksiyon tali sa pasyente ug sa doktor, ang mga komite nahimong mga eksperto sa paghupay sa kabalisa sa pasyente ug sa doktor sa dihang ang dugo tingali mopatim-aw nga kinahanglanon.

Pamatuod nga Kini Mosaler

Si Sonya maoy usa ka utokan 13-anyos sa dihang, sayo sa 1989, iyang nasayran nga siya may kanserosong tumor sa ilalom sa usa ka mata. Gipadayag sa usa ka siruhano kang Sonya ug sa iyang mga ginikanan ang kaseryoso sa gikinahanglang operasyon. Sanglit kusog ang pagtubo sa tumor, ang operasyon angay dili langanon. Ang chemotherapy lagmit nga sunod gikinahanglan, ug ang doktor miingon nga ang iyang mga ginikanan kinahanglang mohatag permiso alang sa mga abuno sa dugo. Apan ang pamilya dili makatugot niana tungod sa ilang relihiyosong mga pagtuo. Ang may-katakos nga siruhano nga nag-atiman kang Sonya buot mokuha sa kanserosong tumor, nga masaligon nga siya makabuhat niana nga walay abuno sa dugo. Bisan pa niana, tungod sa polisa sa ospital, ang siruhano dili makakuhag usa ka anestesiologo nga makaayuda.

Si Jonathan mao ang kinamagulangang anak lalaki ni Michael ug Valerie. Sa hinapos sa 1989, sa dihang 16 anyos, gipahibalo sila sa mga doktor nga si Jonathan may dako kaayong bugon sa iyang spleen. Ang mga doktor mahadlokon bahin sa pag-opera nga dili mogamit ug dugo, apan maisogon nilang gibuhat kana, nga mitahod sa baroganan sa pamilya. Panahon sa yugto sa pagpauli sa lawas, naugmad ang seryosong mga komplikasyon. Ang presyon sa dugo ni Jonathan mius-os pag-ayo, ug ang kuwenta sa iyang dugo miubos. Sa ikaduhang operasyon, nawad-an siyag daghan kaayong dugo, nga ang iyang hemoglobin mius-os ngadto sa 5.5, nga maoy un-tersiya sa normal nga lebel. Ang doktor mipatugbaw: “Ang kondisyon sa inyong anak migrabe kaayo. Kita walay kapaingnan. Kon siya dili abunohan, siya mahimong mamatay!” Unsay buhaton?

Ang mga liaison committee mitaganag bililhong tabang sa maong duha ka kaso sa Canada. Ang usa nagpasalig sa pamilya ni Sonya nga kon gikinahanglan, sila makatabang sa paghimog kahikayan aron siya ibalhin ngadto sa usa ka ospital sa laing nasod. Apan may mahimo ba aron makaopera ang babayeng siruhano nga nasinati na sa iyang kaso? Sa pagkamatuod, ang maong siruhano nasuod kaayo kang Sonya nga siya mitanyag nga mahimong bahin sa grupong tig-opera bisan diin himoon ang operasyon. Hinuon, wala na kinahanglana ang pagbalhin. Ang mga membro sa komite nakaarang sa pagdani sa lokal medikal nga mga kawani sa pagkooperar sa siruhano. Sumala sa maong doktor, tapos sa walo-ug-tunga-sa-oras nga operasyon, ang unang mga pulong ni Sonya maoy mabalak-ong pakisusi kon kaha gipugos ang abuno sa dugo diha kaniya. Pagkadako sa kalipay sa pagkahibalo ni Sonya nga ang tubag maoy wala!

Sa kaso ni Jonathan, sa dihang ang iyang kuwenta sa dugo mius-os ngadto sa 5.5 tapos sa duha ka operasyon, ang mga doktor nakombinsir nga gikinahanglan ang abuno sa dugo sa pagluwas sa iyang kinabuhi, ug sila andam nang mangayog orden sa korte sa pagpugos ug dugo diha kaniya. Apan ang lig-ong pagtuo ug personal nga pagtutol ni Jonathan sa paggamit ug dugo nakapahinay sa kahimtang. Mitaho si Jonathan: “Gikuwelyo ko si Dr.​— ug gitan-aw siya sa mata ug giingnan, ‘Walay dugo o mga produkto sa dugo, PALIHOG!’” Ang komite sa nabansay nga mga igsoon mitabang sa paghikay nga si Jonathan masakay ug ayroplano paingon sa usa ka dakodakong ospital. Sa pag-abot niya, usa ka membro sa komite didto na sa ospital ug nakig-estorya na sa mga doktor nga moatiman. Sa sunod adlaw ang hemoglobin ni Jonathan wala na mous-os. Ang kuwenta sa iyang dugo inanay miuswag, ug siya gipagawas 15 ka adlaw human sa unang operasyon.

Tin-aw, tungod sa mausbawong gidaghanon sa mga doktor ug mga social worker nga andam mokooperar sa Hospital Liaison Committees sa mga Saksi ni Jehova, madahom ang mapinadayonong maayong kalamposan.

[Mga footnote]