Katungdanan sa Usa ka Doktor

MGA pito ka tuig kanhi, si Dai Suzuki, usa ka diyes-anyos nga batang lalaki, nawad-an sa iyang kinabuhi ingong sangpotanan sa usa ka aksidente sa trapiko. Ang media miakusar sa mga ginikanan ni Dai sa pagpasagad tungod kay sila, sa pagsunod sa mga prinsipyo sa Bibliya, wala motugot nga ang ilang anak abunohan ug dugo. Mga Saksi ni Jehova ang mga ginikanan ni Dai. Tapos sa imbestigasyon sa kapolisan, natino nga walay pagpasagad sa bahin sa mga ginikanan.

Ang mga Saksi ni Jehova sa Hapon ug sa ubang dapit nagaila sa panlimbasog sa mga doktor sa pagluwas sa kinabuhi ug andam mokooperar sa medikal nga mga kawani. Sila nagagamit sa modernong medisina ug nagadawat sa medikal nga pagtambal, gawas sa abuno sa dugo. Apan sa dihang ang usa ka medikal nga desisyon makaapektar sa ilang kamaunongon sa mga prinsipyo sa Bibliya, sila mamati sa Diyos. (Buhat 4:19) Ang Bibliya nagahatag sa tin-aw nga sugo: “Magpadayon sa paglikay . . . sa dugo.”​—Buhat 15:29.

Busa inay ikompromiso ang ilang pagtuo sa mga sugo sa Diyos, ang mga Saksi ni Jehova mopili sa mga pagtambal nga dili maglangkit sa paggamit sa abuno sa dugo. Tinuod, ang panginahanglan sa kapaingnang mga pagtambal tingali mahimong usa ka hagit alang niadtong anaa sa medikal nga propesyon. Apan dugang ug dugang mga doktor ug mga administrador sa ospital nagapangitag mga paagi sa pagpahiuyon sa gusto sa mga Saksi ni Jehova. Pananglitan, usa ka mantalaan sa Hapon, ang Mainichi Shimbun, miingon nga karong bag-o “pila ka ospital nagapugong sa pag-agas sa dugo kutob sa labing maarangan ug andam sa paghimo sa operasyong dili mogamit ug dugo.”

Ang artikulo mihisgot nga sa Ageo Kosei Hospital, 14 ka operasyon diha sa mga Saksi ni Jehova malamposong nahimo nga walay abuno sa dugo tali sa 1989 ug Enero 1992. Ang ospital nagpasiugda sa may-kahibalo nga pagtugot. Ang polisa niini mao ang pagpakighisgot uban sa Saksing mga pasyente sa gidahom nga gidaghanon sa dugong mawala ug sa mga kapeligrohan nga nalangkit sa operasyon nga walay abuno sa dugo. Sa pagkadawat gikan sa pasyente ug kasulatang nagpahigawas sa doktor, ang mga doktor naghimo sa operasyon nga wala mogamit sa abuno sa dugo.

Unsay mitukmod niining ospitala sa pagdawat sa Saksing mga pasyente ug pagtahod sa ilang gipalabing pagtambal, bisan pag gisalikway sila sa ubang mga ospital? Sumala sa Mainichi Shimbun, si Toshihiko Ogane, direktor sa ospital, misaysay: “Ang katungdanan sa usa ka doktor nagaobligar kaniya sa pagtahod sa katungod sa pasyente sa paghimo sa pangataposang desisyon ug sa pagbuhat kutob sa iyang maarangan sumala sa itugot sa iyang kahanas sa pagkooperar sa pagtambal sa sakit. Ang may-kahibalo nga pagtugot hinungdanon kaayo gikan sa maong punto de vista.”

“Ang mga Saksi ni Jehova sa ilang bahin,” midugang ang mantalaan, “nakatukod ug mga liaison komite sa ospital diha sa 53 ka siyudad sa tibuok nasod alang sa ilang mga magtutuo. Ang katuyoan sa maong mga komite mao ang pakigsabot sa mga ospital sa paghimo sa operasyon nga walay abuno sa dugo.” Ingong resulta, ubay-ubayng ospital sa unibersidad ug medikal nga institusyon karon mosugot na nga papilion ang mga Saksi sa pagtambal.

Sa pagkakaron, kapig 1,800 ka doktor sa Hapon ug kapin sa 24,000 sa tibuok kalibotan andam mokooperar sa mga Saksi sa paghatag kanila sa mga kapuli sa abuno sa dugo. Kapin sa 800 ka liaison komite sa ospital nakakontak sa mga doktor nga nagaisip nga “katungdanan sa usa ka doktor” ang pagtahod sa katungod sa pasyente sa pagpili.