Ang Quebec Nagpakitag Pagtahod Alang sa Kagawasan
ANG usa ka brodkaster sa Montreal, Quebec, miingon dili pa dugay diha sa balita sa gabii nga ang mga Saksi ni Jehova dugay na nga gihasi sa maong probinsiya sa Canada “tungod kay sila lahi.” Iyang gipunting ang usa ka bag-o pa nga atake nga gihimo pinaagi sa radyo ni Yvon Picotte, ang ministro sa mga kalihokan sa munisipyo. Ang brodkaster nagtaho nga si Picotte “nagtawag sa mga Saksi nga ‘mga parasito sa katilingban’ kinsa, sa daghang kaso, nabuhi sa hinabang. Sa ingon, giinsulto ni Picotte dili lamang ang mga Saksi ni Jehova kondili ang tanan nga nagadepende sa tabang sa katilingban.”
Gitubag sa brodkaster ang sumbong ni Picotte pinaagi sa pag-ingon nga ang gidaghanon sa mga Saksi nga nagadawat ug hinabang dili taas kay sa ubang relihiyon. “Mas angayan pang tawgong ‘parasito’ si Gn. Picotte kay kanila,” matud niya. “Sa pagkamatuod, hunahunaa lang, may molalis nga ang tinuod nga mga parasito sa atong katilingban mao ang mga politiko.”
“Kon unsay nakahagit sa akong interes sa binuang nga pangatake ni Picotte,” nagpadayon ang brodkaster, “mao ang ‘nangaging hitabo’ o ‘déjà vu’ nga bahin. Balik sa ulahing katuigan sa ’40’, si Maurice Duplessis, ang maharihariong primer ug nagtudlo-sa-kaugalingon nga magdadapig sa pagtuong Romano Katoliko, nagbanlod sa duolan sa 400 ka mga Saksi ni Jehova sa bilanggoan, dili tungod sa pagpanuktok sa pultahan—nga gikasuk-an kaayo ni Picotte—kondili sa mga sumbong nga ‘sedisyon.’ Sumala sa balaod matud ni Duplessis, ang pag-apod-apod ug relihiyosong mga pulyeto maoy usa ka buhat nga sedisyon! Gisira ang mga tigomanan sa mga Saksi ug walay-kaluoy nga gilutos sa mga polis sa probinsiya.”
Ang pahayag ni Duplessis sa 1946 nga “Gubat nga Walay Kaluoy Batok sa mga Saksi ni Jehova” giatake usab sa prensa. Ang mga ulohan sa balita mipatugbaw: “Ang Mangiob nga Katuigan Mibalik sa Quebec,” “Mibalik sa Inkisisyon,” ug “Ang Baho sa Pasismo”!
Karon, 50 ka tuig sa ulahi, kining brodkaster sa Montreal mihinapos: “Samtang kita aduna pa gihapoy pipila ka Luog nga mga politiko, ang ilang pagpataka ug yawyaw dili na pagatugotan. Sa pagkamatuod, si Picotte, nga si Duplessis ra untay modayeg, gimandoan ni Gn. Bourassa [ang primer sa Quebec karon] sa pagpangayo ug pasaylo alang sa iyang mga gipanulti diha sa National Assembly karong adlawa. Ang sibil nga manlalaban sa kagawasan magmasiboton. Dako na kaayo ang atong pag-uswag sukad ang mga tawo niini nga probinsiya gibilanggo tungod sa pagpakaylap sa ilang pagtuo.”