Sa Dihang ang mga Kanaryo Mamatay
ANG mga kanaryo mas sensitibo sa makadaot nga mga gas kay sa mga tawo. Tungod niini nga rason, sa nangaging mga panahon ang mga minero sa uling magdala ug hinawla nga kanaryo ngadto sa minahan aron makaila sa presensiya sa makadaot nga mga gas. Sa dihang ang kanaryo mamatay, ang mga minero makabantay ug dali-daling makaikyas sa peligro hangtod nga ang napagawas na ang makadaot nga gas. Tungod niini nga kahibalo mas masabtan sa usa ang komento ni Dr. David Suzuki, usa ka inilang siyentista sa Canada.
Nabalaka sa maorag duol na nga kamatayon sa planetang Yuta, siya migamit sa sunod nga ilustrasyon: “Sa dihang ang usa ka minero sa karbon magdala ug usa ka kanaryo ngadto sa minahan ug ang kanaryo namatay, ang minero wala miingon, ‘O, kanang langgama namatay lamang apan ako dili man langgam.’ Ang kanaryo namatay tungod kay kini nakig-ambit sa samang hangin.”
Siya midugang: “Sa dihang imong makita ang 22 ka mga Beluga nga mga balyena nangamatay sa Luuk sa St. Lawrence ug sila puno kaayo sa makamatay nga kemikales nga ikaw kinahanglan mogamit ug guwantis ug usa ka maskara aron sa paghikap kanila, sa dihang ang mga tawo magsulti kanato nga ang maple sugar nga kalasangan sa Quebec mamatay na sulod sa napulo ka tuig, sa dihang ang mga tawo magsulti kanato nga sa matag oras duha ka matang sa 10,000 ka mga leyon sa dagat nga anaa sa Dagat Amihan ang mamatay ug sila wala nahibalo kon ngano, sigurado . . . kadto mga kanaryo ug kon atong hunahunaon nga dili managsama ang atong ginapuy-an, nan kita mga buang.”
Si Dr. Suzuki naguol nga ang mga politiko naghatag ug gamay o walay pagtagad niining mga “kanaryo” ug wala makakita sa pagkaseryoso sa situwasyon hangtod nga ang daghang kabataan ang mangamatay. Siya miingon: “Busa buot ba nato nga ang atong mga anak ang atong mga kanaryo?”
Ang tinuod nga mga Kristohanon hinuon, bisan nabalaka, wala nagkaguol. Si Jehova, ang Maglalalang sa yuta, “siya nga wala naglalang niini nga walay kapuslanan, siya nga nag-umol niini aron pagapuy-an,” dili motugot sa mapasagaron, dalo nga mga tawo mopadayon sa pagdaot sa atong palibot sa walay katinoan. Sa iyang Pulong, ang Bibliya, siya nagasaad “sa paglaglag niadtong nagalaglag sa yuta.”—Isaias 45:18; Pinadayag 11:18.