Mga Hinungdanong Petsa sa Ekumenikanhong Kalihokan
1844: Pagsugod sa interdenominasyonal nga kalihokan nga sa ulahi nakapahimugso sa Young Men’s ug sa Young Women’s Christian Associations.
1846: Unang internasyonal nga komperensiya sa interdenominasyonal Evangelical Alliance, nga gihimo sa London, England.
1908: Naporma ang Federal Council of the Churches of Christ in America. Sa 1950 kini nahimong National Council of Churches of Christ in the United States of America.
1910: Unang World Missionary Conference nga gihimo sa Edinburgh, Scotland, “diin ang modernong ekumenikanhong kalihokan tinuod nga nagsugod.”—Encyclopædia Britannica.
1919: Si Papa Benedicto XV wala modawat sa imbitasyon alang sa Katolikong Iglesya sa pag-apil uban sa Protestanteng Episcopal Church diha sa usa ka tigom bahin sa pagtuo ug kahusay (mga kalainan sa doktrina ug ministeryo sa mga relihiyon).
1921: Naporma ang International Missionary Council.
1925: Unang internasyonal nga komperensiya sa Universal Christian Council on Life and Work (alang sa pagtuon sa usa ka kumon nga polisa sa ekonomikanhon, politikanhon, ug sosyal nga mga isyu), nga gihimo sa Stockholm, Sweden.
1927: Unang komperensiya sa kalibotan sa mga relihiyon nga “Faith and Order” nga kalihokan, nga gihimo sa Lausanne, Switzerland.
1928: Si Papa Pio XI miisyu ug ensiklikal nga sulat nga Mortalium Animos, nga nagdili sa mga Katoliko sa pagsuporta sa ekumenikanhong kalihokan.
1937: Ang “Life and Work” nga komperensiya nga gihimo sa Oxford, England, ug ang “Faith and Order” nga komperensiya nga gihimo sa Edinburgh, Scotland, miuyon sa pagpormag usa ka temporaryo nga komitiba alang sa pagtukod sa usa ka konsilyo sa mga iglesya sa kalibotan. Kini nga proyekto nalangan tungod sa pagbuto sa Gubat sa Kalibotan II.
1948: Ang WCC (World Council of Churches) naporma sa usa ka asembliya nga gihimo sa Amsterdam, Netherlands. Apil sa iyang mga membro mao ang duolag 150 ka Protestante ug pipila ka Sidlakang Ortodoksong mga Iglesya. Ang WCC sukad niadto naghimog regular nga heneral nga mga tigom (1954: Evanston, Illinois, U.S.A.; 1961: New Delhi, India; 1968: Uppsala, Sweden; 1975: Nairobi, Kenya: 1983: Vancouver, Canada).
1960: Si Papa Juan XXIII nagtukod diha sa Batikano ug Secretariat Alang sa Pagpauswag sa Kristohanong Panaghiusa. Kini ang “unang opisyal nga pag-ila sa Romano Katoliko nga Iglesya sa paglungtad sa ekumenikanhong kalihokan.”—Encyclopædia Britannica.
1961: Ang International Missionary Council nahiusa uban sa WCC. Ang Batikano nagsugod sa pagpadalag opisyal nga mga maniniid ngadto sa mga heneral nga asembliya sa WCC.
1964: Si Papa Paulo VI mideklarar sa Second Vatican Council ug “Pamalaod sa Ekumenismo,” nga nagbatbat sa mga limitasyon sa pag-apil sa Katoliko diha sa ekumenikanhong kalihokan.
1965: Ang papa ug ang Ortodoksong patriarka nagkauyon sa pagnulo sa mga pag-ekskomunikar nga gihimo sa ilang gipulihan niadtong 1054.
1968: Ang SODEPAX (Joint Commitee on Society, Development, and Peace) gitukod sa Batikano ug sa WCC.
1969: Si Papa Paulo VI mibisita sa hedkuwarter sa kalibotan sa WCC, sa Geneva, Switzerland. Iyang gipasiugda, hinunoa, nga siya ang manununod ni apostol Pedro ug ang tanang panaghisgot bahin sa pag-apil sa Katolikong Iglesya sa WCC maoy ahat.
1980: Ang SODEPAX giwala.
1986: Si Papa Juan Paulo II nag-organisar ug usa ka ekumenikanhong “Adlaw sa Kalibotan sa Pag-ampo Alang sa Kalinaw” sa Assisi, Italy, diin ang espirituwal nga mga pangulo nga nagahawas sa dagkong mga relihiyon sa kalibotan nagtigom aron sa pag-ampo alang sa kalinaw sumala sa ilang nagkalahing mga seremonyas.