Pagduaw sa Usa ka Pasyente—Kon Unsaon sa Pagtabang

ANG usa ka higala gipaospital, ug buot mo gayod nga moduaw kaniya. Unsay angay nimong isulti ug buhaton? Unsa bay mahimo nimong dad-on? Unsay ilabinang makatabang? Ug aduna bay mga butang nga angay nimong likayan sa pagsulti o pagbuhat?

Buot mo nga ang imong pagduaw magmapuslanon, dili lang usa ka “Hello,” salikwaot nga “Komosta ka man?” dayon ang dinaliang “Adiyos,” uban tingali sa “Hinaot nga mamaayo ka na” nga ipahayag. Busa unsaon nimo paghimo kana?

Usa ka pasiunang pulong sa pagtambag: Gamita ang kaalam bahin sa pagpaniempo sa imong pagduaw. Makasukna ka sa pasyente o sa iyang pamilya kon unsay labing maayong oras, sama sa kon kanus-a siya dili puliki sa ubang dumuduaw o suod nga mga paryente. Lagmit mas maayo ang pagduaw sa gabii una sa operasyon sa dihang ang pasyente makabatog kaayohan gikan sa masadyaon, makalinga-sa-hunahuna nga estoryahay inay kay pagkahuman dayon sa operasyon, sa dihang siya tingali naliponglipong pa o gisakitan.

Mga Pulong Ngadto ug Gikan sa Makinaadmanon

Mahimong tagdon nato ang mga pulong ‘sadyang estoryahay.’ Dahoma nga maoy manguna sa panahon sa pagduaw, ug ipadayon ang estoryahay nga may igong pagkamadasigon. Ang tawong naghigda sa ospital angay dili mabalaka sa pagkahimong maayong gibisitahan alang nimo. Makapas-an ka sa maong lulan pinaagi sa pagkarelaks ug sa mahigalaong panglantaw. Karon, kon unsay isulti, kon unsay dili isulti.

Ayaw pag-anha nga may masulob-on o ugdang nga nawong, bisan pag mopatim-aw nga dili maayo ang kondisyon sa pasyente. “Ang usa ka kasingkasing nga malipayon maoy usa ka maayong tambal,” matud sa makinaadmanong magsusulat sa Proverbio, “apan ang usa ka espiritu nga magul-anon makapauga sa mga bukog.” (Proverbio 17:22) Busa, hinumdomi, imong responsabilidad ang paghimo sa estoryahay nga makapalig-on ug kahimut-anan.​—Proverbio 25:11; itandi ang Isaias 41:13.

Ang kinaulahiang balita gikan sa pamilya o kongregasyon sa pasyente basin makapaikag ug makapalig-on, ilabina kon ikaw may maayong balita. Usab, ayawg kalimti ang epekto sa diyutayng pasiaw diha sa pagkaayo; pangitag kahigayonan sa pagpapahiyom o pagpakatawa sa pasyente. Kinahanglanon dinhi ang katimbang. Ikaw wala moduaw aron mahimong komikero o komedyante sa palasyo apan aron sa pagpahayag ug tinuod nga kabalaka ug simpatiya.

Gikinahanglan usab sa pasyente ang pagsalig. Busa, pag-amping nga dili mosultig negatibo bahin sa doktor o sa ospital. Kasagarang labing maayo nga dili itandi ang kondisyon o problema sa pasyente sa butang nga tingali nasinati nimo sa kaugalingon o sa uban nga may susamang problema, gawas kon malipayon ang resulta. Ang tagsatagsa maoy lahi, ug ang kahimtang sa matag pasyente maoy linain.​—Proverbio 18:13.

Pangataposang pahayag mahitungod sa imong pakig-estorya: Nakabaton ka ba sa lisod, makakapoy nga kasinatian nga mahauban sa usa kansang mga pulong nagpusotpusot sama sa mga bala sa masinggan, sama sa bul-og sa tubig nga nag-ambak sa Iguaçú Falls? Gikapoy ka niadto, dili ba? Busa palihog ayaw pagkaingon niana sa dihang magaduaw sa imong naospital nga higala o paryente. Samtang ang imong pakigsulti angay nga malipayon ug makapalig-on, kontrolaha ang gidaghanon ug paso niana. Dili kinahanglang manerbiyos ka, nga samag kinahanglang pun-on nimo ang matag segundo sa mga pulong. Makapahupay usab ang diyutayng mahilomong panahon nga magkauban. Oo, pagbantay nga dili ka makaamot sa kalapoy sa pasyente tungod sa dili-matapos nga pag-abot sa mga bisita nga magpaagom kaniya sa labi pang dili-matapos nga bulhot sa mga pulong.

Unsa ka Dugay ang Pagduaw?

Sa pila ka bahin sa kalibotan, ang usa ka pamilya halos magapuyo na sa ospital uban sa pasyente. Sila tingali dahomon sa pag-atiman sa pagdigo kaniya ug pagtaganag pagkaon, mao nga ang maong pagduaw tingali dugay. Apan sa kadaghanang ospital, ang mga oras sa pagduaw limitado aron ang pasyente dili mahago ug ang mga trabahante sa ospital makabuhat sa ilang mga buluhaton. Busa, sa kadaghanang kaso ang imong pagduaw angay molungtad nga dili mokapin sa oras kon ikaw paryente o suod kaayong higala sa pasyente, ug tunga sa oras kon ikaw usa lang ka kaila. Unsa man kon hangyoon ka sa pasyente sa pagpabilin ug dugaydugay? Basin maayo gihapon ang paglimite sa imong pagduaw, kay basin siya gikapoy ug may dili-tin-awng panghukom. Hinuon, kinahanglang gamiton nimo ang imong kaugalingong panghukom, apan ang pangunang punto mao, ayaw pasobrahi ang imong pagduaw.

Ang maong tambag kinahanglag linaing pasiugda kon ang pasyente mopatim-aw nga dunay mas daghang bisita kay sa maayo alang kaniya o alang sa naandang buluhaton sa ospital. Sa pagkamatuod, ang imong paghimog ubay-ubay mugbong mga pagduaw mas maayo ug nagapakita sa imong kabalaka nga labaw pa kay sa usa nga dugay. Hinumdomi, usab, ang panginahanglan sa salabotan kon ang pasyente dunay mga paryente nga tingali supak o mayugot pa sa imong presensiya.​—Itandi ang Proverbio 25:17.

Imong Praktikal nga Tabang

Bisan sa dili ka pa mohikay sa imong pagduaw, ang laing matang sa abanteng pangandam makatabang. May butang mapuslanon ba nga imong madala? Unsa man ang bag-ong balasahon? Tingali nianang adlawa imong nadawat sa koreyo ang imong kinabag-ohang isyu sa usa ka magasin nga gusto sa pasyente. Ang pasyente basin matandog sa imong kaandam nga ipaambit ang imong gimahal nga bag-ong isyu. Makatanyag ka pa sa pagbasa ngadto kaniya sa usa o duha ka artikulo nga imong nakitang makapaikag sa linain.

Unsang ubang butang ang imong madala? Ang gamayng handumanan sama sa mga bulak o prutas basin makapasadya sa adlaw. Ang laing butang mabitbit basin mao ang paboritong dulse sa pasyente o linuto sa balay nga pagkaon​—kon kana itugot. Masukna nimo ang pamilya bahin sa maong mga kalan-on o ang mga nars sa dili pa nimo kana dad-on sa kuwarto.

Makasukna ka usab sa doktor o sa nars kon kaha may lain pa nga imong madala ngadto sa pasyente o imong mabuhat alang kaniya nga makapagaan sa ilang lulan o maghimo kaniyang mas komportable. Basin kahinangpan nila ang imong tabang.

Buot ba nimong motabang sa ubang mga paagi? Suknaa ang pasyente mahitungod sa gagmay praktikal nga mga butang. Kinsay nagkuha o nagdala sa iyang mga sulat? Makatanyag ka ba sa pagsusi sa iyang balay o apartment, nga tingali magpatabang pa sa pila ka higala sa paglimpiyo niana una mouli ang pasyente sa balay? May gikinahanglan ba nga usa ka tawo sa pagpala sa niyebe gikan sa mga agianan, pagbisbis sa mga tanom, o mohimog mga lakang aron ang balay magbaton sa dagway nga gipuy-an ug sa ingon dili makadani sa mga manglulungkab? Mabalak-on ba siya bahin sa pag-atiman sa usa ka binuhi? Kini sila ug ubang butang tingali anaa sa hunahuna sa pasyente apan dili mahigawas gawas kon ikaw mosukna. Ang imong malulutong mga pakisusi makatabang usab sa diwa nga magapasiugda nga ikaw tinuod matinagdanon.

Ang pahimatngon angay bahin sa tukmang panggawi samtang magaduaw sa ospital. Bisan pag tingali katingad-an, ang imong sininaan ug linihokan makaapektar sa paagi sa pagtratar sa mga trabahante sa ospital sa pasyente. Basin sila makadayeg kon ilang mamatikdan nga ang usa ka pasyente nagadawat ug mga bisita nga maayog panagway. Sa dihang ang ubay-ubay maong halangdong mga bisita mapanid-ang magpakisusi bahin sa maayong panglawas sa pasyente, ang mga trabahante basin mohinapos nga ang maong pasyente maoy usa ka tawong respetado, nga, siyempre, siya mao. Ang Bibliya naghisgot bahin sa pagdayandayan sa kaugalingon ‘sa paagi nga haom sa mga tawong nag-angkon nga nagasimba sa Diyos,’ ug pinaagi sa pagbuhat niana, basin imong madasig ang mga trabahante sa pagtratar sa pasyente sumala niana.​—1 Timoteo 2:9, 10.

Kon Adunay Usa ka Seryosong Problema

Usahay, ang pasyente nga imong ginaduaw basin may seryosong suliran sa pagpakigkomunikar sa mga trabahante sa ospital. Ang usa ka maayong pangutana nga iandam, nga walay paghilabot sa pribasiya sa pasyente, mao, “Unsay hunahuna sa doktor bahin sa imong kahimtang?” Kon dili maayo ang kahimtang, ug ikaw mao ang responsableng membro sa pamilya o ministro, tingali ikaw makahatag ug tabang. Sa kaayohan sa pasyente, basin kinahanglang ikaw ang mangunay sa pagbatog dugang impormasyon gikan sa mga trabahante sa ospital. O tingali ikaw makatanyag sa pag-uban sa pamilya, si kinsa tungod sa usa ka hinungdan tingali magpanuko sa pagpakigsulti sa doktor.

Kon kini mao ang kahimtang, ang pangunang butang ibutang sa hunahuna mao nga dili mahadlok sa palibot o mga trabahante sa ospital. Ang pasyente basin anaa pa sa intensive-care unit, nga gilibotan sa tanang matang sa mga makina ug mga tawong grabe. Ang mga trabahante basin mopatim-awng puliki kaayo o tingali isogon. Ang kiling mao nga mahadlok sa pagbalda kanila, labi na sa pagsulti sa butang nga basin mopatim-awng usa ka hagit. Apan kon ikaw sa tukma mao ang tigpaluyo sa pasyente, ikaw (ug siya) takos sa tin-awng mga tubag ug mga kapaingnan. Angay dili ka magpatambag batok niana hangtod nga malampos ang imong buluhaton. Bisan tuod magbantay nga dili mahimong kasamok, hinumdomi nga bisan si Jesus diha sa usa ka ilustrasyon nagpasiugda nga usahay gikinahanglan ang pagpadayon sa paghangyo aron mabatonan ang pag-atiman o impormasyon nga maoy katungod sa usa ka tawo.​—Lucas 18:1-6.

Paghinumdom sa Imong Pagduaw

Sa pagkahuman sa imong pagduaw, nga mibiyang masadyaon, makasubli ka sa imong gisulti ug gibuhat. Ang maong paghinumdom basin makatabang nimo sa pag-ila sa unsang paagi ang imong sunod nga pagduaw, sa maong pasyente o sa lain, mahimong labi pang epektibo ug makapatagbaw.

Tanantanan, adunay daghan nga imong malampos sa usa ka pagduaw sa ospital. Ibutang sa hunahuna ang preparasyon ug tinguha nga makatabang. Pinaagi sa pagpahimulos sa higayon, ikaw makapahimulos sa labing maayo niana ug mahimong “usa ka higala nga labi pang suod kay sa [unodnong] igsoon.”​—Proverbio 18:24.

[Kahon sa panid 10]

Imong Makatabang nga Pagduaw sa Usa ka Pasyente

1. Mahimong andam.

2. Tagda ang kahimtang sa pasyente. Ayaw pagdugaya ang imong pagduaw.

3. Pagsinina sa tukmang paagi.

4. Manguna sa estoryahay, apan limitihe ang imong mga pulong.

5. Magmatinabangon sa imong dad-on o itanyag nga buhaton.

6. Magmadasigon ug makapalig-on.

7. Balik alang sa laing kadiyut nga pagduaw.