Pagsangyaw sa Maayong Balita sa Daghang mga Pinulongan
SA GIHATAG ni Jesus ang ilhanan sa kataposang mga adlaw, ang usa sa mga bahin niini mao ang tibuok-yutang pagsangyaw sa maayong balita sa Gingharian. (Mateo 24:14) Aron masabtan kon nganong kining tibuok-yuta nga pagmantala sa tanang kanasoran sa daghang mga pinulongan wala mahitabo sa wala pa kini nga kaliwatan, ug kon nganong kini nahitabo ug nagakahitabo karon, kinahanglan motan-aw kitag balik sa kasaysayan. Sama sa gipunting sa diksiyonaryong Webster, hangtod na lamang sa ika-15 siglo, kapin lag 500 ka tuig kanhi, nga giimbento ni Gutenberg ang imprintahang movable type. Sukad niini, ang tawo nag-ugmad ug mga paagi aron magama ang pinatik nga mga panid sa dinaghan aron maapod-apod sa publiko.
Maayong hinumdoman nga sa wala pa maimbento ang mga imprintahan, ang Bibliya nihit, sanglit kini kopyahon nga kinamot. Ang pagkopya nga kinamot budlay ug mahal. Ang pag-imbento sa movable type ug sa mga makinang imprintahan maoy dakong tikang aron mapatik ang Bibliya ug sa gibase-sa-Bibliya nga mga basahon sa tanang pinulongan.
Sukad sa 1914 dunay dagkong mga tikang sa pagpauswag sa pag-imprinta ug pagmantala, ang offset press sa ulahi maoy mipuli sa kadaghanang pag-imprinta nga gihimo niadto diha sa mga makinang letterpress.
Sa dili pa dugayng katuigan, ang pagtungha sa kompiyuter nakapatulin niining paagi sa pag-imprinta. Ang mga titik, mga marka-sa-paglitok, ug ubang mga hulagway madibuho, maaninaw diha sa kompiyuter, ug mabatonan aron daling magamit sa usa lang ka pagtapoy sa keyboard sa kompiyuter. Kini nagpasayon sa pagpatik ug mga basahon alang sa mga tawo sa tanang pinulongan sa tibuok kalibotan.
Gisugdan sa 1979 sa Sosyedad sa Watchtower ang proyektong gitawag MEPS. Ang mga titik sa pulong MEPS gikan sa “Multilanguage Electronic Phototypesetting System.” Ang komersiyal nga mga kompaniya nag-ugmad ug mga kompiyuter sa piniling mga pinulongan aron makaganansiya sa ilang gipuhonan. Lahi ang buluhaton sa Sosyedad. Ang Bibliya nagaingon nga ang maayong balita igamantala “ngadto sa tanang kanasoran ug tribo ug pinulongan ug katawhan.”—Pinadayag 14:6.
Pinaagi sa kadaghanan sa 93 ka sangang buhatan sa Sosyedad sa tanang bahin sa kalibotan, ang panukiduki sa mga kinaiyahan sa mga pinulongan gihimo. Ang listahan sa mga karakter ug marka-sa-paglitok nga gikinahanglan sa pagprinta sa mga basahon sa mga pinulongan nga sakop sa matag sanga kinahanglan himoon. Gikinahanglan usab ang mga lagda sa pagputol sa mga pulong sa matag pinulongan. Ang matag titik ug marka-sa-paglitok kinahanglan dibuhoon, aninawon sa kompiyuter ug tinoong way-sayop. Nalangkit niini ang daghang tuig sa dedikadong paghago. Ang resulta mao nga ang mensahe sa Gingharian mapatik na karon sa mas daghang pinulongan sukad masukad, ug ang gidaghanon nagauswag.
Sa sinugdan ang Sosyedad midesinyo ug migamag ilang kaugalingong piyesa ug makina ug programa sa kompiyuter. Ang mga Saksi ni Jehova gikan sa tibuok kalibotan nagtipon sa pagtabang sa maong proyekto. Dihay pagbinayloay sa mga katakos ug pagdinasigay. (Roma 1:12) Maorag nabali ang hitabo sa Torre sa Babel. Human sa linaing pagbansay, ang mga kasangkapan, uban sa batid nga mga trabahante, gipadala ngadto sa mga sanga sa tibuok kalibotan. Ang resulta mao ang daghag-gamit nga sistema sa pag-imprinta nga gigamit sa kapin sa usa ka gatos ka kayutaan ug mga isla sa kadagatan, nga nasangkapan ug maayo aron mapatik ang mga basahon sa Sosyedad ngadto sa mga 200 ka pinulongan sa pagkakaron.
Niining gitagna nga kataposang mga adlaw, ang maayong balita sa Gingharian sa Diyos sa pagkamatuod ginamantala sa tanang kanasoran ug sa daghang pinulongan.