Sanong sa “Pagpangita sa Katawhan sa Diyos”

USA sa mga dagkong punto sa “Putling Pinulongan” Distritong mga Kombensiyon, nga gihimo sa mga Saksi ni Jehova gikan sa tungatunga sa 1990 hangtod sa sayo sa 1991, mao ang pagluwat sa librong Pagpangita sa Katawhan sa Diyos. Kini magahatag ug klarong katin-awan sa sinugdan, kasaysayan, ug mga tinuohan sa dagkong mga relihiyon sa kalibotan, ug kini nagatug-an kon unsaon pagkaplag sa matuod nga Diyos. Unsay sanong sa mga magbabasa sa tibuok nga kalibotan?

“Akong tim-os nga pagdayeg sa Pagpangita sa Katawhan sa Diyos,” mikomento si E. G., usa ka dili-Saksi nga taga-Alemanya. “Ang maong detalyado ug bug-os nga pag-utingkay sa tinagsa ka mga relihiyon talagsaon kaayo ug makalingaw basahon. Dugang pa, ang libro wala makulangi sa katarongan​—kaatbang gayod hinuon. Ikasugyot ko nga susihon sa mga tawo ang ilang relihiyon pinasukad niining libroha.”

Ang usa ka magbabasa nga taga-Flushing, New York, U.S.A., misulat: “Ako usa ka Muslim, ug Al-Islaam ang akong relihiyon. Naangayan ko ang inyong bag-ong librong Pagpangita sa Katawhan sa Diyos. Naangayan ko ilabina ang impormasyon ninyo bahin sa akong relihiyon.”

Sa Netherlands, si A. v. D., usa ka 17-anyos, nakapahimutang ug kopya sa libro sa kaubang estudyante, nga migamit niana sa pag-andam sa usa ka asaynment sa eskuylahan. Buot hisayran sa magtutudlo ang tinubdan sa iyang materyal. Sa pagkakita sa libro, mipedido siyag tulo ka kopya. Si A. v. D. mipadayon: “Sa sunod adlaw gihatag ko ang tulo ka bag-ong libro ngadto sa magtutudlo, nga iyang gipakita dayon ngadto sa pipila ka laing magtutudlo. Sa wala madugay, ako iyang giingnan, ‘OK ni. Giaprobahan ako sa administrasyon sa eskuylahan nga mopedidog 35 niining mga libroha.’”

Gikan sa British Columbia, Canada, ang usa ka magtiayon misulat: “Ang Pagpangita sa Katawhan sa Diyos lagmit makaapektar ug mas daghang tawo gikan sa mas daghang kultural nga kagikan kay sa ubang basahon sa Watch Tower sa nangagi.”

Gikan sa Le Havre, Pransiya, si M. H. misulat: “Igasulti ko nga kining libroha bug-os milapaw sa akong mga pagdahom; kini tin-aw kaayo, pinamubo, ug nindot tan-awon. Magnifique!”

Si H. W. W. nga taga-Texas, U.S.A., misulat: “Kining libroha makaiikag kaayo ug makalingaw, nga wala ko kini ikabutang. Ako nagbasa niini hangtod sa gabii nang dako. Labing maayo ang matang sa pagsulat. Ang libro naghisgot sa mga tinuohan sa ubang mga tawo sa paaging makataronganon ug matinahoron, samtang nagdasig nila sa ilang pagpadayon sa pagpangita sa matuod nga Diyos, si Jehova. Ug ang mga pulong masabot sa personal kaayong paagi, nga halos may naglingkod sa imong tupad nga nakig-estorya nimo.”

Usa ka magtiayon nga taga-Panama, si G. ug S., miingon: “Ang katawhang tigsultig Kinatsila nagadawat dayon sa libro. Nalipay sila sa mga dekolor nga letrato sa mga templo ug sa mga diyosdiyos.”

Si D. M., usa ka marinero sa U.S. Navy misulat: “Nahibalag nako ang usa ka dalaga usa ka adlaw nga miingon, ‘Gusto ba nimog espirituwal nga libro?’ ug ako miingon, ‘Oo,’ nga wala gayod masayod kon unsa kadtong matanga sa libro. Sa akong katingala kadto misangpot nga mao ang libro nga taodtaod ko nang gipangita.”

Usa ka propesor nga nagtudlog relihiyon sa kalibotan sa usa ka Amerikanhong unibersidad misulat: “Ang katin-aw sa ekspresyon ug katibuk-ang katukma sa katin-awan sa pangunang mga pagtulon-an sa lainlaing mga relihiyon maoy dalayegon. Ang paghisgot sa ubay-ubay giilang mga magsusulat sa natad nagtin-aw nga ang magsusulat nasayod sa kontemporaryong kahibalo ug paggamit. Adunay bug-os nga kamatinud-anon ug walay tinagong butang pagahisgotan.”

Usa ka batan-ong babaye, si N. Y., misulat gikan sa Nagoya City, Hapon: “Ako 12 anyos ug nagtuon sa kasaysayan sa eskuylahan. Kining libroha detalyadong naghisgot sa mga relihiyon sa Hapon. Gawas pa, ako bug-os nagkalipay sa pagbasa bahin sa salamangka ug espiritismo diha sa kapitulo 4 ug ‘Pagbalik sa Matuod nga Diyos’ diha sa kapitulo 15.”

Daghang ubang sulat sa apresasyon ang nadawat gikan sa Argentina, Colombia, Inglaterra, Puerto Rico, ug Espanya ingon man gikan sa ubang nasod. Kon buot nimong makabatog kopya sa Pagpangita sa Katawhan sa Diyos, nga karon gipatik sa 26 ka pinulongan, tan-awa ang panid 32.