Afghan nga mga Ilo nga Buot Motan-awg Usa ka Uma
SAMTANG ang modernong katilingban nahimong dugang ug dugang siyudadnon, minilyon nga kabataan dili na gayod makakitag usa ka uma ug sa kahayopan niini. Sa pagkatinuod, ang mga batang taga-Afghanistan kasagarang dili gayod makakitag usa ka Amerikanhong uma. Busa tiaw na ang kahinam sa usa ka gamayng grupo sa maong mga bata, nga mga ilo, nga gidaot ug gipiangan sa gubat, sa pagduaw sa Watchtower Farms, nga nahimutang sa Wallkill, mga duha ka oras amihanan sa New York City pinaagig kotse.
Mikuyog ang mga maghuhubad sa Afghan sa grupo aron sa pagtabang nila sa pagsabot sa tanang kalihokan sa maong linaing uma-imprentahan nga mga tinukod nga gipalihok sa mga Saksi ni Jehova ug gitrabahoan sa kapin sa libo boluntaryong trabahante, nga maoy naglangkob sa pamilya sa Watchtower Farms.
Ang pagduaw misugod uban sa maabiabihong painit sa tsa ug cookies, nga human niadto ang grupo mipadayon aron sa pagtan-aw sa dako kaayo upat-kolor nga mga makina sa imprenta nga gigamit sa paggama sa mga magasing Bantayanang Torre ug Pagmata! Usa ka giya miingon: “Sa akong katingala sila nalipay sa kahanas ug sa gidak-on sa buluhaton, bisan pag ang ilang mga kasingkasing natumong sa pagtan-aw sa kahayopan sa uma.”
Siya mipadayon: “Dayon, ngadto sa mga nating baka, diin ang mga bata nakahigayon sa paghapyod ug pagpakaon sa mga hayop. Kadto usa ka talan-awon—ang mga bata nagdagan aron sa pagkuhag dugang lunhaw nga mga sagbot aron ipakaon sa mga nati. Sa balay sa manok, silang tanan nakakita sa gagmayng mga piso. Kataw-anan gayod, sa gisukna kon unsa ang paborito nilang Amerikanhong pagkaon, sila mitubag, ‘Kentucky fried chicken!’”
Sa pag-abot sa tigpaniudto, sila nakig-ambit sa pagkaon nga kan-ong humay ug manok kauban sa dako kaayong pamilya sa uma didto sa lawak-kan-anan. Human niadto, ang mga membro sa pamilya mihugop sa pagtimbaya sa maong mga bata gikan sa halayo kaayo. Dayag nga gusto nilag mga bata.
Sa hapon nagkalipay ang mga bata sa pagkatkat sa mga traktora ug pagkupot sa manibela. Siyempre, gusto nilang tanan nga mosakay ug kabayo, ug ang maong tinguha sa wala madugay natuman. Ang sunod nga dakong kahinam? Ang estasyon sa mga bombero sa Watchtower Farms, uban sa iyang dako, pula kaayong bomba sa sunog! Pagkamakapaukyab! Makita nimo kana sa ilang mga nawong samtang sila nagturnohay sa pagsakay ug pagpatingog sa pito. Ang mga bata sa tibuok kalibotan gustog samang mga butang—kolor ug kalangas!
Sa gisukna alang sa ilang mga reaksiyon sa pagduaw, si Ahmad, usa ka dakodako nang batang lalaki, miingon: “Nahimuot ako sa mga makina sa imprenta, pag-ampo sa wala pa ug pagkatapos sa pagkaon—ug sa tanang butang didto sa kapeteriya!” Silang tanan nakaangay sa kahayopan ug sa pagsakay sa kabayo.
Kining mubong kasinatian naghulagway nga ang kalulot, ngadto sa mga ilo o kang bisan kinsa, mahimong maayong rekomendasyon sa Kristohanong pagtuo ug sa mahigugmaong Diyos, si Jehova. Sumala sa ginaingon sa Bibliya: “Ang matang sa pagsimba nga mahinlo ug walay buling gikan sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan, ug paghupot sa kaugalingon nga walay buling gikan sa kalibotan.” (Santiago 1:27)—Tinampo.