Pagbuntog sa Kinabuhing Mabangison

ANG akong amigo ug ako midalagan nga labing kusog kutob sa mahimo, ug sa miabot kami sa suba nga haduol sa akong lungsod-natawhan, kami misalom niana. Sa among paggimaw, kusog kaming nanglangoy paingon sa pikas nga tampi.

Kadto ba usa ka matang sa binata nga dula? Dili gayod! Kadto butang may kalabotan sa kinabuhi ug kamatayon. Sa milingi ako sa luyo, nakita ko ang mga polis nga nagpunting kanamo sa ilang mga armas. Misalom ako sa ilalom aron makalikay sa mga bala ug mipadayon sa paglangoy paingon sa pikas nga tampi. Bisan didto sa ilalom sa tubig, nadungog ko ang buto sa pusil.

Sa nakaabot kami sa pikas nga tampi, milampos kami sa among pagpuga gikan sa bilanggoan, diin kami gibilanggo tungod sa panglungkab ug pagpangawat ug kotse.

Kadto usa lang sa daghang beses nga ako gipangita o aktuwal nga gigukod sa mga polis tungod sa usa ka buhat kriminal. Bisan tuod ako 17 anyos pa niadto, nabatonan ko na ang hataas nga rekord sa pagdakop sa mga awtoridad. Sa kadugayan, ang akong amigo ug ako nadakpan, ug sa makausa pa gisentensiyahan nga mabilanggo, nga sa maong panahon sa yugtong duha ug tunga ka tuig.

Bisan sulod sa bilanggoan gipadayag ko ang mabangisong kinaiya. Tungod kay sigeng makig-away sa ubang mga binilanggo, ako gihatagag puting uniporme. Kadto naghimo sa ubang mga samokan ug kanako nga mailhan alang sa espesyal nga pagtagad sa mga guwardiya.

Labi Pang Mabangison sa Pagkagawas

Ako nakagawas sa bilanggoan, apan wala mausab ang akong personalidad. Ngani, ako nahimong labi pang mabangison. Ako dali nga naila ug nadawat ingong hari sa lainlaing mga kalye. Si bisan kinsang manghagit nako makakita dayon ug andam nga mag-aaway.

Kas-a ang usa ka grupo sa mga batan-ong lalaki nakapalagot nako. Giatake ko sila, nga gikulata ang ubay-ubay una mapahunong sa mga polis ang away, bisan pag ang tuo kong kamot nabali sa usa ka sumbagay sa miaging semana.

Sa laing panahon ang duha ka amigo ug ako mihagit sa usa ka grupo sa mga lalaki gikan sa nait nga lungsod. Ang ilang lider migawas sa pagtagbo kanako nga may bara. Ako siyang nadisarmaran, apan kalit siyang nakabuhi sa akong paggunit ug midalagan. Ang bugtong paagi nga mapapadayon ko siya sa pagpakig-away mao ang paghatag balik sa iyang bara, nga akong gihimo. Mibalik siya, ug gidisarmaran ko na usab siya, nga sa maong panahon gitino nga siya dili makaikyas hangtod nga ako siyang makulata.

Usa ka gabii, alang lang sa “kalingawan,” ako mitindog sa usa ka eskina sa Harlem, New York City, ug nanghagit kang bisan kinsa sa away. Ang lainlain midawat sa akong tanyag, ug daghan ang mga bugno. Ingong sangpotanan, miusbaw ang akong dungog ingong peligroso, mabangisong tawo. Sa maong lainlaing mga bugno, ako gibunalan sa mga botelya, mga hiramenta sa ligid, ug mga batota ug giatake pinaagi sa mga korta ug ubang armas. Apan kanang tanan walay nahimo sa pagpabiya nako sa akong mabangisong mga paagi.

Misamot ang Kabangisan

Sa wala madugay akong nadiskobrehan nga daghan ang masapi sa negosyo sa droga. Kay tiggamit ug droga, ako nasinati sa katilingban sa droga. Sa wala madugay ako may mga tawo nga nagbaligyag mga droga alang kanako, nga naghimo kanako nga labi pang mabangison.

Kas-a gisulong namo ang laing tigbaligyag droga, nga naglaom nga mangawat sa iyang mga droga. Kami, nga armado sa usa ka pusil ug korta, misulod sa iyang balay ug gihuptang bihag ang tulo ka lalaki ug usa ka babaye samtang giukadyang ang balay, nga nangitag mga droga.

Sa laing panahon ang usa ka amigo ug ako, nga armadog mga pusil ug nagmaskara, mihukom sa pagtulis sa usa ka lalaking dato aron makakuwarta kami para sa mga droga. Among gibantayan ang iyang balay, apan wala gayod siya mopakita, mao nga kami nanglakaw. Sa walay duhaduha, kon siya nagpakita pa, malampos unta namo ang among mga tuyo.

Busa, sa 20 anyos lamang, ako dulot nang nalangkit sa kabangisan, mga droga, ug grabeng krimen. Ang akong ugma-damlag, sa kinalabwan, mao ang kinabuhi sulod sa bilanggoan​—ug ako masulob-on kaayo.

Ako kasagaran maghunahuna kon kinsay angay mohukom kon unsay matarong ug kon unsay daotan. Ako mihinapos nga kadto mao si bisan kinsa nga may labaw nga gahom diha sa katilingban. Nangatarongan usab ako nga sanglit ang mga tawo maoy naghukom sa matarong ug daotan, ug ako bug-os walay pagtahod sa tawhanong awtoridad, ako may katungod sama kang bisan kinsa sa paghukom sa maong gumonhap alang sa akong kaugalingon. Apan sa wala madugay nakaplagan ko ang labi pang maayong tubag.

Labi Pang Maayong Paagi

Ang akong igsoong babaye, kinsa naminyo sa usa sa akong mga amigo nga nakauban nako sa bilanggoan, misugot sa usa ka pagtuon sa Bibliya uban sa mga Saksi ni Jehova. Iyang gipakig-ambit ang mga butang iyang natun-an gikan sa Bibliya sa tanan sa among pamilya​—gawas kanako. Gisultihan ako sa akong pamilya nga likayan ang akong igsoong babaye. Ngano? Miingon sila nga tungod kay ang iya lamang hisgotan mao kanang “binuang nga relihiyon.”

Ako naikag. Unsa bay gipanulti niya nga nakapalagot kaayo sa mga tawo? Buot ko nga masayod, apan ang akong igsoong babaye wala makigsulti kanako bahin niadto. Nganong wala man? Naghunahuna siya nga ako daotan kaayo nga dili mamati sa bisan unsa bahin sa Bibliya.

Apan usa ka gabii gihangyo ko ang akong igsoong babaye kon ako makakaon ba sa iyang balay. Ako naglingkod didto nga nagkaon uban sa akong igsoong babaye ug sa iyang bana, ug ako miingon: “Tug-ani ako bahin niining bag-o nga relihiyon.” Kana ilang gihimo​—sulod ug unom ka oras! Alang kanako kadto makataronganon kaayo nga ako mibalik sa sunod gayong gabii aron mamatig dugang.

Human niadtong ikaduhang pagduaw, ako kombinsido nga akong nakaplagan ang butang nga pagakinabuhian, usa ka tinuod nga katuyoan sa kinabuhi. Sa gilayon, misugod ako sa pagtambong ug mga tigom sa Kingdom Hall of Jehovah’s Witnesses ug pagsulti usab sa akong mga higala kon unsay akong nakat-onan.

Wala mausab ang akong pagkinabuhi sa kadiyut nga panahon. Apan nagpadayon ako sa pagtuon ug pagkat-on bahin sa kon unsay gidahom ni Jehova nga Diyos, ug gitino ko nga dili ako makapalta sa mga tigom sa Kingdom Hall, diin gihisgotan ang Bibliya. Sa maong paagi nabatonan ko ang espirituwal nga kusog sa pagbag-o sa akong kinabuhi, usa ka butang sa usa ka panahon.

Nahauna, mihunong ako sa pagbaligyag mga droga. Nakapasuko kadto sa pipila niadtong akong gikauban sa nangagi, apan ako nagbaton pa sa akong dungog sa pagkamabangison, nga nagpahilayo kanako gikan sa kadaot. Sunod, mihunong ako sa paggamit sa isog nga mga droga ug mihunong usab sa akong imoral nga paagi sa kinabuhi. Ang kataposang butang nga akong gipukgo mao ang akong bisyo sa tabako. Sa walo ka bulan ako miuswag ngadto sa punto nga takos na alang sa bawtismo, ug ako nabawtismohan sa 1970.

Sa kataposan ako nahidangat sa bug-os nga kaamgohan sa tubag sa akong pangutana bahin sa kon kinsa ang magahukom kon unsay matarong ug kon unsay daotan. Ang tubag mao: Si Jehova, ang atong Maghahatag-Kinabuhi, nagbaton nianang maong katungod, ug siya usab may katungod sa pagdahom sa iyang mga linalang nga magkinabuhi sumala niana.

Ako subsob naghunahuna sa unsang paagi ang ilustrasyon sa Isaias 65:25 napadapat kanako sa masambingayong paagi. Ang maong tagna naghisgot bahin sa panahon nga moabot sa dihang ang mabangisong kinaiya sa leyon mausab ngadto sa malinawon nga kinaiya sa punto nga siya magakaon ug dagami sama sa torong baka. Gibati ko kana sa susamang paagi, ako nag-usab gikan sa pagkamabangison kaayong tawo ngadto sa usa nga may malinawon nga kinaiya ug malinawong panglantaw sa kinabuhi.

Bisan pa niana, ako may daotang dungog nga pagapapason pinaagig maayong gawi. Ingong pananglitan, ako regular nga nagduaw sa mga tawo sa ganghaan ngadto ganghaan aron makighisgot sa Bibliya uban nila. Sa usa ka ganghaan, ang usa ka batan-ong lalaki nga mibukas nakaila kanako ug nahadlok, kay naghunahuna nga ako didto aron sa pagkulata kaniya. Dali kong gipatin-aw ang akong mensahe sa kalinaw gikan sa Bibliya, nga naghimo kaniyang walay-tingog apan nahupayan pag-ayo.

Wala madugay tapos sa akong bawtismo, naminyo ako sa usa sa mga Saksi ni Jehova. Ikasubo, niadtong 1974 ang akong asawa mihukom nga dili na niya buot mobuhat sa kabubut-on sa Diyos. Gihatagan niya akog ultimatum: biyaan ang akong paagi sa pagsimba o kaha biyaan niya ako, nga dad-on ang duha namo ka gagmayng anak. Kadto ang labing lisod nga panahon sa akong kinabuhi. Apan dili ako makabiya sa akong pagsimba sa Diyos, ug mipadayon ako sa pagbuhat sa iyang kabubut-on.

Usa ka Bag-ong Paagi sa Kinabuhi

Bisan pa niana, gigantihan ako ni Jehova tungod sa pagpadayon nga matinumanon kaniya. Niadtong 1977, nahibalag nako ang usa ka talagsaong Saksi, ug kami naminyo. Siya may lima-ka-tuig nga anak lalaki. Sa wala madugay ang akong asawa ug ako misulod sa bug-os-panahong ministeryo, nga mideboto sa among kaugalingon ngadto sa pagtudlo sa uban mahitungod sa Diyos ug sa iyang mga katuyoan. Sa dihang midako na ang among anak lalaki, siya misulod usab sa bug-os-panahong ministeryo. Karon siya nagatabang sa lainlaing mga katungdanan diha sa lokal nga kongregasyon.

Ang akong asawa ug ako sukad nagbaton sa pribilehiyo sa pagbiyahe ngadto sa daghang bahin sa kalibotan, nga nagbuhat sa boluntaryong pagpanukod. Kini naglangkit sa pagtabang sa pagtukod ug bag-ong mga pasilidad sa sangang-buhatan sa lainlaing nasod aron sa pagpaluyo sa tibuok-kalibotan edukasyonal nga buluhaton sa mga Saksi ni Jehova.

Sa dihang kami anaa sa among pinuy-anan, kami nagpabiling puliki sa lokal, nga nagtabang sa uban sa pagkat-on mahitungod sa Bibliya ug sa pagtabang sa pagtukod ug bag-ong mga Kingdom Hall. Ako nagaalagad usab sa Komite sa Pagpanukod sa Rehiyon sa habagatang bahin sa Tinipong Bansa. Ug ang akong kanhi kauban sa bilanggoan​—ang bana sa akong igsoong babaye—​ug ako nagaalagad nga mga ansiano sa samang kongregasyon sa mga Saksi ni Jehova.

Mapasalamaton ako kang Jehova tungod sa pagtabang nako sa paggahom sa akong kinabuhi ug sa paghatag nianag bug-os bag-ong tumong. Samtang itugot ko nga siya ang magpakita kanako kon unsay matarong ug kon unsay daotan, ang akong kinabuhi sa dugang ug dugang nahimong mas maayo.​—Tinampo.