Kapitulo 35

Unsaon Nako Paglingkawas sa Droga?

NAADIK ka ba sa droga? Tingali nahibalo ka nga makadaot kini sa imong utok ug lawas. Ug basin naningkamot ka pa sa paghunong niini, apan karon nagdroga na pod ka. Kon mao, ayawg kaguol. Ang uban nakalingkawas sa pagkaadik, busa ikaw makahimo usab niana! Atong tan-awon kon giunsa paglingkawas sa tulo ka tawo nga lainlaig kaagi.

NGALAN Marta

AKONG KAAGI Ang akong inahan pinaangkan, busa ako ug ang akong igsoong babaye nagdako nga way amahan. Sa nag-edad kog 12, tig-adtoan na kog diskohan uban sa akong iyaan nga hilig ug sayaw. Mahigalaon kaayo ko pero nakabarkada kog mga tawong bisyoso. Pag-edad nakog 13, misugod ko paggamit ug droga, hasta cocaine. Sa primero, morag wala ray problema. Pero sa kadugayan, bisag unsa na lay akong makita ug madungog, ug pirme na kong mahadlok. Inigkawala sa epekto sa droga, makahunahuna ko sa paghikog. Gusto kong mohunong apan naglisod ko.

KON GIUNSA NAKO PAGLINGKAWAS Nagsugod ko sa paghunahuna bahin sa Diyos ug nakasimba pa ganig pipila ka beses. Apan misamot hinuon ang akong kaguol. Sa nag-18 ko, nag-ipon mi sa akong trato ug nakaanak mi. Tungod sa akong anak, mas determinado kong magbag-o. May amiga ko kaniadto nga mibalhig puyo atbang sa akong gipuy-an. Iya kong giduaw ug gipangomosta. Ako siyang gisultihan sa tanan. Siya miingon nga Saksi ni Jehova na siya ug gitanyagan ko niyag pagtuon sa Bibliya, ug ako kining gidawat.

Akong nakat-onan nga ang akong pagkinabuhi supak diay sa kabubut-on sa Diyos ug nga kinahanglan kong mohunong sa pagdroga ug pagpanigarilyo. Apan grabe ang akong pagkaadik. Kadaghan kong moampo kang Jehova nga Diyos sa usa ka adlaw aron tabangan ko niyang makalingkawas. Gusto ko nga malipay siya nako. (Proverbio 27:11) Paglabayg unom ka bulan nga pagtuon sa Bibliya ug pagpakig-uban sa mga Saksi ni Jehova, nakahunong ko sa pagdroga. Duna nay direksiyon ang akong kinabuhi karon. Dili na ko magsigeg kaguol. Nakabana kog buotang Kristohanon ug akong namatuto ang akong anak sumala sa mga prinsipyo sa Bibliya. Mapasalamaton kaayo ko kang Jehova nga gidungog niya ang akong mga pag-ampo ug gitabangan ko niya!

NGALAN Marcio

AKONG KAAGI Nagdako ko sa siyudad sa Santo André, sa estado sa São Paulo, Brazil. Bata pa ko nga nakakat-on sa pagpanigarilyo, pagdroga, ug pagpangawat. Daghan kog amigo nga carnapper ug pusher. Ang usa nila manghatag ug droga sa mga batan-on sa among dapit. Kon maadik na sila, mapugos silag palit ug droga kaniya.

Ang mga polis magsigeg patrolya sa among dapit, ug kadaghan kong nadakpan tungod sa ginagmayng krimen ug kas-a gisuspetsahan kong pusher. Sagad, akoy motago sa kinawat nga mga butang ug mga pusil sa gang diha sa akong balay.

Gikaintapan ko sa mga tawo. Pirmeng magpula ang akong mata. Kanunay lang kong magmug-ot, ug isog kaayog nawong. Gianggaan kog “Tufão” (Bagyo) kay bisan asa ko moadto makakita gyod kog away. Palainom ko ug imoral ug kinabuhi. Daghan sa akong mga higala nangamatay na o kaha napriso. Tungod sa akong kaguol, misulay ko paghikog pinaagi sa pisi nga akong gihigot sa sanga.

KON GIUNSA NAKO PAGLINGKAWAS Nangayo kog tabang sa Diyos. Dayon nasangyawan kog mga Saksi ni Jehova ug nagsugod pagtuon sa Bibliya. Akong nahibaloan nga Jehova diay ang ngalan sa Diyos, ug nga siya may kahingawa ug motabang niadtong maningkamot sa pagsunod sa iyang mga sukdanan. (Salmo 83:18; 1 Pedro 5:6, 7) Daghan kog kinahanglang usbon, ug ang usa sa kinalisdan mao ang pagpahiyom.

Kanunay kong mangayog tabang ni Jehova, ug gipadapat nako ang tambag sa Bibliya. Pananglitan, wala na ko makig-uban sa akong mga barkada ug wala na moadto sa mga bar. Nakig-uban ko sa mga tawo nga nagsunod sa mga sukdanan sa Bibliya. Naglisod ko, pero nabag-o na ko karon. Dili na ko kawatan ug palaaway. Ug kapin sa napulo ka tuig nga wala na ko magdroga.

NGALAN Craig

AKONG KAAGI Nagdako ko sa usa ka uma sa South Australia. Palainom ang akong amahan, ug nagbulag sila sa akong inahan sa otso anyos pa ko. Ang akong inahan naminyo pag-usab, ug nagpuyo ko uban niya hangtod sa nag-edad kog 17. Nianang edara nakakat-on ko sa pag-alot ug karnero ug mikuyog sa ubang mga tig-alot sa pag-adto sa mga lugar diin may trabaho. Nagsugod ko paggamit ug lainlaing droga ug nahimong palainom. Nagpataas kog buhok. Ako kining pomadahan, sapiron ug butangag beads. Nahimo kong seloso, putong, ug tigdagmal. Kadaghan kong napriso.

Mibalhin kog puyo sa gamayng lungsod sa Western Australia ug nag-ipon mi sa akong trato, nga bartender sa usa ka hotel. Pareho ming hinabako ug hinginom, ug nananom mig marijuana.

KON GIUNSA NAKO PAGLINGKAWAS Bag-o lang ming nakaanig marijuana dihang nanuktok ang mga Saksi ni Jehova sa among gubaong balay. Wala dayon ko motuo sa ilang giingon. Gipamatud-an una nako sa taas-taas nga panahon kon tinuod ba ang giingon sa Bibliya. Dayon, usa-usa nakong gibuntog ang akong mga bisyo ug kahuyangan.

Wala madugay, akong nahibaloan nga kinahanglan nakong hunongon ang paggamit ug marijuana. Sa unsang paagi? Sanglit gihagoan nako kinig pananom, nakahunahuna ko nga ipanghatag kini. Apan nakaamgo ko nga dili kini maayo busa gisunog ko na lang kini. Dako kaayog tabang ang pag-ampo sa pagbuntog sa akong pagkaadik ug pagkapalainom. Miampo ko sa Diyos nga tabangan unta ko sa iyang espiritu sa pagbuntog sa akong bisyo. Wala na sab ko makig-uban sa mga tawong nakaimpluwensiya nako. Samtang akong gitun-an ug gipadapat ang mga pagtulon-an sa Bibliya, nakabaton kog kalig-on sa pagbuntog sa pipila nako ka dili maayong kinaiya. Nagtuon sab sa Bibliya ang akong trato ug nagbag-o sa iyang batasan ug pagkinabuhi. Dayon nagpakasal mi. Mga 21 ka tuig na ming nagpahimulos ug maayong panglawas ug malipayong nagmatuto sa duha namo ka anak. Kon wala pa ko tabangi ni Jehova, ambot kon unsa nay kinabuhi nako karon.

TEKSTO

‘Si Jehova mao ang akong kusog ug akong gahom.’—Isaias 12:2.

SUGYOT

Kon mahimo, likayi ang mga tawo, dapit, ug mga butang nga nalangkit sa imong pagdroga kaniadto. Sumala sa panukiduki, ang pagkakita niining mga butanga makapukaw sa imong kahidlaw sa droga.

NAHIBALO KA BA . . . ?

Ang pag-abuso sa droga makadaot sa imong utok.

ANG AKONG PLANONG HIMOON!

Kini ang akong himoon kon makagamit ko pag-usab ug droga: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Nganong kinahanglang mohimog dagkong kausaban sa kinabuhi ang usa kon buot niyang makalingkawas sa droga?

● Sa unsang paagi makatabang ang pagtuon sa kamatuoran bahin sa Diyos?

[Blurb sa panid 253]

“Pinaagi sa pagsunod sa taas nga sukdanan sa Bibliya, malipayon na ko karon ug may direksiyon na ang akong kinabuhi.”—Marta

[Hulagway sa panid 256]

Ang pagbuntog sa pagkaadik samag pag-ikyas sa nagkalayo nga balay—imong biyaan ang tanan, apan maluwas mo ang imong kinabuhi