Pagsanta sa mga Sunog Diha sa Balay

SUMALA sa estorya, gipatiran sa baka ni Gng. Patrick O’Leary ang kingki sa kamalig sa kahayopan ug misugod ang dakong sunog sa Chicago niadtong 1871. Ang bili sa napilding propiedad ug kinabuhi makalilisang. Sumala sa usa ka tinubdan, ang sunog naghimo sa 100,000 nga walay pinuy-anan, nga nasunog ang kapin sa 17,400 ka tinukod, ug namatay ang 250 ka tawo.

Karong adlawa, 120 ka tuig sa ulahi, ang modernong teknolohiya sa pagpatay sa sunog nakatabang sa pagsanta sa daghang dagkong mga sunog. Bisan pa niana, ang mga sunog sa balay nagpadayong usa ka kapeligrohan. Ang NFPA (National Fire Protection Association) nangangkon nga sa Tinipong Bansa, halos lima ka libong tawo ang namatay sa mga sunog sa balay sa usa ka tuig. Sumala sa narekord diha sa The Vancouver Sun, ang NFPA mihatag ug pila ka yanong sugyot sa pagtabang sa pagpahilayo sa mga sunog sa balay. Sa diwa sila mao:

◻ Ayaw itugot ang pagtabako sulod sa balay. Ang mga aksidenteng naglangkit sa danghag nga mga hinabako nagpadayong mao ang pangunang nakaingon sa kamatayon gumikan sa mga sunog diha sa balay.

◻ Ayaw biyai nga ang mabitbit nga mga kasangkapan sa pagpainit sa kuwarto nag-andar nga walay nagbantay o samtang ikaw natulog.

◻ Ayaw pasobrahi ang karga sa koryente o ayaw gamita ang mga alambreng nagusnit. Gamita lang ang tukmang gidak-on sa mga fuse.

◻ Hupting hinlo ang mga dapog ug mga panghaw. Susiha sila sa matag tuig.

◻ Susiha ang mga tigtiktik sa aso nga regular, ug pulihi ang mga bateriya kada tuig. Tinoa nga ang tanan diha sa pamilya makaila sa tingog sa tigtiktik sa aso.

◻ Susiha nga ang tanan sa pamilya nahibalo sa agianan sa pag-eskapo engkasog may sunog, ug hupting walay babag ang mga eskapohan.