Gikan sa Among mga Magbabasa

TMJ Syndrome Salamat sa inyong artikulo “Gikan sa Apapangig​—Ang Dakong Impostor.” (Hunyo 22, 1991) Dili pa dugay, naagoman ko kining sulirana. Makamata ako sa gabii, matarantar tungod kay maungot ang akong apapangig! Nasayop ang nagkalainlaing mga doktor sa pag-ila sa akong sakit hangtod nga mikonsulta ako sa espesyalista sa ngipon. Iyang nadiskobrehan dayon nga kadto gipahinabo sa ngipon nga wala magkatakdo. Ang sugyot nga gihatag diha sa artikulo praktikal, mapuslanon, ug mohatag ug dihadihang kahupayan.

S. F., Italya

Daotang mga Batasan Salamat sa tabang nga akong nakaplagan diha sa artikulo “Pagsanta sa Pagsugmat sa Daotang mga Batasan” (Abril 8, 1991) aron mabuntog ang pagkagiyan sa TV. Ang kapitulo 36 sa librong Mga Pangutanang Gisukna sa mga Batan-on​—Mga Tubag nga Mosaler [gipatik sa Watchtower Bible and Tract Society of New York, Inc.] nakatabang ug diyutay, apan mibalik ako sa sobrang pagtan-aw pag-usab. Natabangan ako sa inyong artikulo sa pagpuli sa daotang batasan ug bag-ong batasan, nga mao, pagbasa sa espirituwal nga pagkaon nga nagagula diha sa Pagmata!

A. G., Tinipong Bansa

Mga Anak sa Nagdiborsiyo Kinasingkasing nga pasalamat alang sa mga seryal “Tabang sa mga Anak sa Nagdiborsiyo” (Abril 22, 1991) Sa tres anyos pa ako, gidiborsiyohan sa akong amahan ang akong inahan. Maayo ang iyang nahimo sa pagmatuto sa akong manghod nga lalaki ug ako sa paghigugma kang Jehova. Apan sa mga tuig sa pagkatin-edyer, sama gayod kadto sa inyong gihubit. Akong gibati nga ang “tanang mga relasyon dili-kasaligan, hinukmang mabungkag sa umaabot tungod sa pagbudhi ug pagluib.” Nahadlok ako nga mahigugma ug higugmaon, ug bisan taliwala sa kaubang mga Kristohanon, ang tanang relasyon wala kaayo nako hatagig gibug-aton. Ang pagtuon sa paghimog mga butang alang sa ubang mga tawo ug pag-alagad ingong bug-os panahong magwawali nakatabang kanako sa pagbuntog niining mga kilinga sa usa ka paagi. Apan, ang inyong artikulo nakatabang kanako sa pagsabot sa akong kinailadmang mga pagbati sa unang higayon.

M. H., Hapon

Ang mga artikulo nakapabati kanako ug sa akong bana nga sad-an. Ang akong unang kapikas napalagpot gikan sa Kristohanong kongregasyon tungod sa pagluib. Ang akong mga anak nga lalaki ug ako miipon ug puyo uban sa akong mga ginikanan, nga mga 3,200 ka kilometros ang gilay-on. Ang akong anak nga mga lalaki wala kaayoy kontak sa ilang amahan. Human nga naminyo ako pag-usab, padayon namong gihikaw ang bisan unsang kontak, mibati nga dili maayong impluwensiya ang amahan. Hustong desisyon ba ang among nahimo?

C. W., Tinipong Bansa

Walay diborsiyo ni pagpalagpot gikan sa Kristohanong kongregasyon ang makatapos sa ginikanan-anak nga relasyon: ang mga anak padayon nga nagkinahanglan sa duha ka ginikanan. Bisan pa, nagkalainlain ang matag usa ka situwasyon. Ang pagkanahilayo sa lawasnon o ang pagkawalay pagtagad sa usa sa kapikas kanhi makahikaw ug dako sa ginikanan-anak nga kontak. Sa laing bahin, ang mga korte basin mopakanaog ug mga kahikayan labot sa mga katungod sa pagduaw, ug ang Kristohanon tingali wala kaayoy kapilian gawas sa pakigkooperar. Kon walay mga kahikayan sa pagduaw nga gipakanaog, anaa ra sa ginikanan nga nagbaton sa anak ang pagtino kon ang pagpakig-uban sa kapikas kanhi mohatag bag dakong pisikal o espirituwal nga kapeligrohan.​—ED.

Salamat sa prangka nga kamatuoran sa inyong mga artikulo mahitungod sa diborsiyo. Ang akong mga ginikanan nagdiborsiyo sa mga 20 anyos pa ako, ug naagoman ko ang yugto diin gikaligotgotan ko ang mismong institusyon sa kaminyoon. Gilantaw ko kini nga usa ka lit-ag o usa ka bilanggoan! Salamat sa inyong gidan-agan-sa-Bibliya nga mga libro ug mga magasin, nagpaabot ako nga maminyo ra sa umaabot, uban sa matuod nga paglantaw sa mga potensiyal sa kaminyoon.

L. T., Tinipong Bansa

Colosseum Nakita ko ang artikulo “Ang Colloseum​—Sentro sa ‘Kalingawan’ sa Karaang Roma” (Abril 8, 1991) nga makaiikag kaayo. Ingong usa ka manalaysay, giisip kong makadasig kaayo ang inyong paagi sa paglain sa kamatuoran gikan sa sugilambong.

N. H., Tinipong Bansa