Gikan sa Among mga Magbabasa
Pagkiniat Ang artikulo “Mga Batan-on Nangutana . . . Unsay Daotan sa Pagkiniat?” nakakuha sa akong interes. (Mayo 8, 1991) May higala ako nga kanunayng magkiatkiat sa kaatbang sa sekso, ug daw makalingaw tan-awon. Nahupayan ako sa pagkasayod nga ‘natural lamang nga magustohan.’ Apan akong naamgohan karon nga peligroso ang pagkiniat, ug hinunoa buot kong magpakitag tinuod nga kaikag sa mga tawo sa katibuk-an.
S. I., Hapon
Tawo ug Mananap Buot kong ipahayag ang akong kinasingkasing nga apresasyon sa ulohang “Sa Dihang ang Tawo ug Mananap Magpuyo Diha sa Pakigdait.” (Abril 8, 1991) Estudyante ako sa Bibliya sa usa na ka tuig karon, ug akong nakat-onan ang katuyoan ni Jehova sa paghimo sa yuta nga walay kataposang paraiso. Ang artikulo nakadugang ug dako sa akong gugma alang kang Jehova ug sa akong tinguha sa pagpuyo diha sa pakigdait uban sa mga mananap diha sa iyang bag-ong kalibotan.
A. S., Brazil
Mahigugmaon kaayo ako ug mananap. Gusto ko ganing moeskuyla sa unibersidad ug magpalista sa ilang programa sa zoolohiya. Unsa may akong makuha, hinunoa, sa paggugol ug tibuok panahong pagtuon sa pipila lamang ka matang sa mga hayop? Diha sa bag-ong kalibotan ni Jehova, makatuon ako sa tanang mga hayop—sa walay kataposan! Sa nagbasa sa artikulo nakahilak ako tungod sa kalipay, sa kasayoran nga moabot ra ang adlaw nga ang maong pangandoy matuman na unya.
L. M., Tinipong Bansa
Daotang mga Batasan Ang artikulo “Pagsanta sa Pagsugmat sa Daang Batasan” (Abril 8, 1991) daw samag usa ka sulat nga gipatumong ilabina kanako. Bisan tuod wala gayod hisgoti sa artikulo ang akong daotang batasan, nagtuo ako nga ang mga giya nga gihatag niini mapuslanon. Uban sa tabang ni Jehova buntogon ko gayod kining batasana sa bug-os!
S. M., Tinipong Bansa
Sa miaging 11 ka tuig, malamposong mius-os ang akong timbang ug 36 kilos, apan mibalik ra kini. Akong gibantayan pag-usab ang akong timbang, ug sa misugod ako sa pagkaluya, akong gibasa pag-usab ang artikulo. Akong gigamit usab kini uban sa duha ka estudyante sa Bibliya nga nakigbisog sa paghunong sa pagtabako.
E. T., Tinipong Bansa
Maanindot kaayo kadto nga artikulo nga nakatulo ang akong mga luha. Ang nakatandog kaayo nako mao ang bahin diin kini nag-ingon: ‘Napakyas ako, busa mas maayo pang mosurender na lang ako.’ Sama usab niana ang akong hunahuna kanunay. Apan natabangan ako sa artikulo sa pagtan-aw sa mga butang sa lahi nga paagi.
S. H. S. N., Brazil
Mga Anak sa Nagdiborsiyo Ang inyong artikulo “Tabang sa mga Anak sa Nagdiborsiyo” (Abril 22, 1991) miabot sa husto gayod nga panahon. Karon nagaagom ako sa pakigdiborsiyo. Sa adlaw una pa miabot kining artikuloha, nakabungat ako ug masakit nga mga butang sa akong bana atubangan sa mga anak. Sa ulahi nangayo ako ug pasaylo kaniya ug gihatagan siya niining gulaa sa Pagmata! Salamat sa inyong tabang ug tambag.
C. L., Tinipong Bansa
Sa nuybe anyos pa ako, nagdiborsiyo ang akong mga ginikanan. Sa milabay ang tulo ka tuig, nagpakasal sila pag-usab. Malipayon kaayo ako. Dili pa dugay, akong nahibaloan nga nagkuha na usab sila ug laing diborsiyo. Ang kasayoran nga gihigugma nila ako ug ako nakabaton kang Jehova nakatabang kanako gikan sa pagkapukan. Ang inyong artikulo miabot sa panahon nga gikihananglan nako kaayo. Salamat sa inyong pagtagad sa kabataan. Nagkinahanglan kami sa tanang pagpaluyo nga among mabatonan!
A. J., Tinipong Bansa
Seksuwal nga Panghasi Mapasalamaton ako sa artikulong “Mga Batan-on Nangutana . . . Unsay Akong Himoon Aron Ako Dili Niya Hilabtan?” (Mayo 22, 1991) Sa mismong adlaw nga gihatag kanako sa akong inahan kining magasina, nakadawat ako ug sulat sa gugma gikan sa usa ka batan-ong lalaki sa akong klase. Gitudloan ako sa artikulo nga kon ang mga lalaki mobirigbirig, mahimong atong ipatin-aw ang atong relihiyosong mga pagtuo. Salamat sa inyong pagtaganag mahigugmaong tabang alang kanamong mga batan-on.
M. K., Hapon