Gikan sa Among mga Magbabasa
Pagkaupaw Ang artikulong “Alopecia—Pagkinabuhi sa Hilom Uban sa Pagkaupaw” (Abril 22, 1991) nakapaikag ilabina kanako. Nagsugod ako sa pagkaupaw sa dihang ako unom ka tuig ug tunga. Kadto sa sinugdan makaulaw, apan ang akong mga higala ug ang katawhan kadaghanan maluluton ug mahigugmaon kaayo. Ako 64 anyos na karon ug wala gayod makasabot sa hinungdan sa akong pagkaupaw hangtod nga akong nabasa ang inyong artikulo. Salamat kaayo kaninyo.
R. W., Tinipong Bansa
Ako 16-anyos nga babaye, ug ako nag-antos sa alopecia sukad ako 10 anyos. Ang akong mga klasmet nagtiaw kanako pinaagi sa paghatag ug angga ug pagsulay sa pagtukas sa akong peluka. Kini makapasubo ug makapaguol nako. Apan gipakita sa inyong artikulo kon unsaon sa pagsagubang pinaagi sa pagsalig kang Jehova. Naglaom usab ako nga maulian ako sa akong buhok sa iyang bag-ong kalibotan.
C. B., Tinipong Bansa
Tabi Salamat kaninyo tungod sa isyung “Tabi—Kon sa Unsang Paagi Malikayan nga Masakit.” (Hunyo 8, 1991) Kana miabot sa panahon nga labi ko kanang gikinahanglan. Ako may suliran sa usa ka babaye nga niadto suod kaayo nakong higala, ug siya nagpakatap ug makadaot nga tabi bahin kanako. Ang inyong artikulo nakatabang gayod nako sa pagsabot ug pag-antos.
M. P., Tinipong Bansa
Pagkiniat Nagdawat ako nga regular sa Pagmata! Apan sa inyong artikulong “Mga Batan-on Nangutana . . . Unsay Daotan sa Pagkiniat?” (Mayo 8, 1991) gibati ko nga kamo mapig-oton kaayo. Wala may daotan sa paghangyo sa batang lalaki kang Sara sa paglingkod sa iyang tapad. Ug pastilan pod, nganong daotan man ang pagpahiyom sa kaatbang nga sekso? Angay ba nga kagoton mo ang imong ngipon diha sa ‘palayo kanako’ nga panagway?
W. T., Tinipong Bansa
Ang kaso sa batan-ong si Sarah tin-aw nga naglangkit sa iyang pagkaladlad sa matag adlaw sa wala-kaangayi nga pagtagad. Hisabtan, siya naglagot niadto. Bahin sa pagpahiyom, gitin-aw sa artikulo nga “walay daotan sa pagkahimong mahigalaon.” Sa pagkatinuod, dako kaayo ang kalainan tali sa mahigalaon nga pahiyom ug sa “sabtonon nga pahiyom” nga gitumong sa artikulo.—ED.
Crossword Puzzles Salamat tungod sa crossword puzzle diha sa Hunyo 8, 1991, nga isyu. Samtang miduaw sa akong mga apohan, gisugdan ko pagsolbar ang pulongbay. Apan sa misugod ako sa paghimo niana, nangutana ang akong apohan kon siya makatabang ba. Ako nakurat kaayo! Ang akong apohan wala gayod maikag sukad sa Bibliya. Bisan pa, siya ang nagbasa sa mga kasulatan, ug ako ang nagbasa sa mga ilhanan. Mga napulo ka minutos sa ulahi, miabot ang akong iyaan ug nangutana kon siya makatabang ba usab sa pulongbay. Ang Bibliya sa nangagi usa ka gidili nga ulohan diha sa balay sa akong mga apohan—apan dili na karon!
A. J., Inglaterra
Ang mga Baga Nadasig ako sa pagsulat kaninyo human sa pagbasa sa artikulong “Ang mga Baga—Kahibulongang Desinyo.” (Hunyo 8, 1991) Sa usang adlaw, namatyan ako sa akong iyaan tungod sa kanser sa baga. Ang artikulo nakapausbaw sa akong pagpabili sa pagkakahibulongan sa lawas. Kana sayon usab nga sabton ug nakatabang nako sa pagsabot sa panginahanglan sa pag-atiman sa akong mga baga ug dili paghugaw niana pinaagi sa mga butang [sama sa tabako].
C. G., Tinipong Bansa
Pag-amoma sa Tigulang Giatiman ko ang akong amahan, nga masakiton kaayo. Ang akong mga igsoon wala magtabang apan nagaingon sa mga butang sama sa, ‘Lig-on ka. Makaarang ka niana’ o, ‘Angay unta nga gisusi nimo ang posibilidad sa usa ka tig-atiman nga balay katuigan nga miagi.’ Misugod ako sa pagkaluoy sa akong kaugalingon, sa pagkaamgo nga ang akong purohan nga maminyo ug magbaton ug mga anak miagi na. Ako gani nagsugod sa pagbatog mga suliran sa emosyon. Apan ang seryeng “Gitahod Mo ba ang Tigulang?” (Marso 22, 1991) mihatag kanakog kahupayan ug kusog nga gikinahanglan sa pag-antos.
S. B., Tinipong Bansa