Gikan sa Among mga Magbabasa
Mga Anak sa Nagdiborsiyo Binulagan ako ug asawa tulo na ka tuig, ug gimingaw kaayo ako sa among anak. Apan ang mga bata ang nag-antos, ug kita nga mga ginikanan angay magpalandong pag-ayo bahin niini. Kon nakabasa pa lamang unta ako sa mga seryal nga “Tabang Alang sa mga Anak sa Nagdiborsiyo” (Abril 22, 1991) samtang wala pa kami nagbulag, segurado ako nga hunahunaon ko gayod pag-ayo ang bahin sa pagbulag.
S. C. M. F., Brazil
Barrier Reef Sa eskuylahan gihatagan ako ug asayment sa pagtuki bahin sa mga takot. Apan, naglibog ako kon asa mangitag detalyado ug laktod nga impormasyon. Dako gayod ang akong kakurat sa pagkakita sa artikulong “Usa ka Pagduaw sa Great Barrier Reef.” (Hunyo 8, 1991) Nasudlan gayod kadto sa akong gikinahanglan! Akong gigamit ang maong impormasyon ug nakadawat ug labing taas nga grado. Daghang salamat sa inyong bililhong tabang.
M. M. T., Argentina
Pagpadako ug mga Anak Ang artikulong “Pagpadako sa mga Pamilya sa Tibuok-kalibotan—Pagmatuto sa Ginikanan Uban ang Gugma, Disiplina, Panig-ingnan, ug Espirituwal nga mga Sukdanan” (Septiyembre 22, 1991) maoy usa ka dako nga pagdasig kanako ingong bag-ong estudyante sa Bibliya. Dihang nagsugod kami sa pagtambong ug Kristohanong mga tigom, kilas kaayo ang akong anak nga lalaki ug mohilak morag buang. Apan uban sa tabang sa Kristohanong babaye nga nagtuon kanamo, ug sa pagdasig gikan sa mga magasin nga inyong gipatik, karon ginaani ko ang bunga. Ang akong duhag-tunga ka tuig nga anak nga lalaki karon hilom nga molingkod sa panahon sa mga tigom ug mohatag pa gani ug mugbong mga komento.
M. T., Japan
Tabi Tabian kaayo ako. Apan usa ka adlaw mipauli ako sa balay gikan sa eskuylahan ug gibasa ko ang mga seryal “Tabi—Kon Unsaon Paglikay nga Masakitan.” (Hunyo 8, 1991) Uban sa inyong tabang naputol ko ang maong daotan nga batasan. Wala gayod ako mahibalo nga ingon niana diay ka seryoso ang tabi ug nga kini makadaot sa dungog sa usa ka tawo. Mapasalamaton ako kaayo alang niining impormasyona.
F. B., Tinipong Bansa
Ang mga artikulo sa literal nakaluwas sa akong trabaho. Akong gipasa ang usa ka hungihong nga isira na nila ang pabrika nga akong gitrabahoan. Sa wala pa matapos ang adlaw, gipatawag ako sa opisina sa akong superbisor. Iyang akong gisultihan nga ang pagtabi ug nga ang pagpasag mga butang nga sama niana mohatag lamang sa mga tawo ug kahadlok tungod kay nihit man ang trabaho. Ang mga tawo gipaundang na sa trabaho sa akong trabahoan, ug sa hunahuna ko nga pasangil lang kini aron papahawaon ako. Sa dihang nadawat ko ang Pagmata! nga naghisgot bahin sa tabi, akong gilantaw kini ingong tambag gikan sa kahitas-an. Akong gipakita kini sa akong superbisor ug akong gisultihan siya sa akong nakat-onan ug buhaton ko kutob sa akong maarangan nga magpalayo gikan sa tabi. Iya akong gipasalamatan—ug nagpabilin gihapon ako sa akong trabaho.
L. G., Tinipong Bansa
Estrogen Replacement Mapasalamaton kaayo ako sa artikulong “Estrogen Replacement Therapy—Kini ba Alang Kanimo?” (Septiyembre 22, 1991) Nakurat ako sa katin-aw niini. Ako karon gitambalan alang sa osteoporosis ug nagadawat ug estrogen replacement therapy sulod sa upat ka tuig. Apan karon makapakigsulti na ako ug maayo sa akong doktor bahin niining mga butanga ug makaatubang na sa akong mga suliran nga mas malaomon. Salamat kaayo kaninyo.
R. C. S. M., Brazil
Pagtuon ug Musikal nga mga Instrumento Buot kong pasalamatan kamo alang sa artikulo “Kon Makatugtog Unta Akog Sama Niana!” sa Septiyembre 8, 1991, nga gula. Ako karon anaa na sa akong unang tuig sa junior hayskol ug nagtuon sa pagtugtog ug elektric organ. Duha na ka tuig ang milabay, ug bisag angay na unta nga magpakita ako ug pag-uswag, wala gihapon akoy pag-uswag. Ning tuiga sa akong recital o pagtugtog sa publiko, nagkasayop-sayop ako. Makalilisang gayod kadto. Kining artikuloha maluluton ug tukma sa panahong tambag alang kanako.
M. O., Japan