Gikan sa Among mga Magbabasa
Tabang Alang sa Himalatyon Salamat kaninyo alang sa serye sa mga artikulo diha sa “Tabang Alang sa Himalatyon.” (Oktubre 22, 1991) Miabot kini nga tukma gayod sa panahon. Ako usa ka nars, ug kada adlaw ikahinagbo ko kanunay ang mga pasyente nga himalatyon. Ingong usa ka Kristohanon, ako dugay na nga namalandong kon gikinahanglan ba gayod nga makig-away sa kamatayon kutob sa mahimo. Ang artikulo mitabang kanako sa pagsabot sa panglantaw sa Diyos bahin sa maong butang.
C. C., Italya
Ang akong inahan dunay kanser. Sa dihang giingnan ako sa doktor, ‘Ulahi na kaayo nga tambalan siya karon,’ ako labihang nasubo ug naghunahuna nga maghikog! Apan usa sa mga Saksi ni Jehova nagdasig kanako nga magtuon pag-usab sa Bibliya. Ako usab nakabaton sa kopya sa mga artikulo sa “Tabang Alang sa Himalatyon.” Nasabtan ko na pag-ayo karon ang teksto nga nag-ingon, niini ania ang gugma ‘dili nga kita nahigugma sa Diyos kondili nga siya mao ang nahigugma kanato.’ (1 Juan 4:10) Ako karon naningkamot gayod nga mahimong usa sa mga Saksi ni Jehova.
S. M., Hapon
Pasad Daghan kaayong salamat alang sa inyong mahigugmaong artikulo “Sa Dihang ang Pasad Dili na Magamhan.” (Agosto 8, 1991) Sulod sa akong 12 anyos nga kaminyoon, ako nakigbisog sa tumpok sa natigom nga mga butang, nag-utingkay sa mga kloset nga wala gayoy hikaplagan! (Ako dunay daghang mga rason nga maghupot sa mga butang.) Human nga mabasa ang inyong artikulo, nakatigom akog igoigong gidaghanon sa ilabogay nga mga butang. Ang akong nahinloan nga mga kloset daw mipahiyom kanako nga talagsa ra gayod mahinloi kaniadto. Ipaskin ko sa dayag ang artikulo diha sa akong kloset aron malikayan gayod ang pagpasad pag-usab!
L. W., Netherlands
Ang akong inahan, akong igsoong babaye, ug ako nanghinlo sa mga pasad. Kami nanghinlo sa among butanganag sinina ug nanghatag sa daghang mga sinina. Ang akong kinasingkasing nga pasalamat alang sa artikulo.
Z. M., Jamaica
Kumpirma Salamat alang sa artikulo “Ang Hunahuna sa Bibliya . . . Kumpirma—Usa ba ka Kristohanong Kinahanglanon?” (Agosto 8, 1991) Misugod ako sa pagtuon sa Kasulatan sa dili pa dugay, apan ako sa gihapon dunay kuwestiyon mahitungod sa bawtismo. Ako dunay duha-ka-bulan nga batang babaye, ug uban sa tabang niana nga artikulo, nakasabot ako sa kataposan nga walay pagpaluyo ang Kasulatan sa bata nga bawtismohan.
J. M. S., Brazil
Mga Gamit sa Pagpaumog sa Hangin Tugoti ako nga mokomento sa ulohang “Mga Suliran sa Gamit sa Pagpaumog sa Hangin” nga makita diha sa “Pagpaniid sa Kalibotan.” (Septiyembre 22, 1991) Ikasubo nga wala ninyo hisgoti nga kining mga sakita mapasa lamang pinaagi sa mga gamit sa pagpaumog sa hangin nga may mga tigsala.
S. G., Alemanya
Ang nagasagang sa mineral nga mga tigsala mopakunhod sa riyesgo sa paghugaw sa hangin uban sa gagmay kaayong mga partikulo sa mga mineral, sama sa aluminum, tingga, o asbestos. Bisan pa, ang mga eksperto mirekomendar nga ang mga tigsala ilisan kanunay ug nga ang makina mismo kanunay nga hinloan pag-ayo.—ED.
Estrogen Replacement Salamat kaninyo alang sa artikulong “Estrogen Replacement Therapy—Alang Ba Kini Kanimo?” (Septiyembre 22, 1991) Miabot nga tukma gayod sa panahon. Ang akong doktor mao pay pagsugyot nga ako mogamit ug estrogen. Pagkadako sa akong kalipay nga makabasa mahitungod niining ulohana nga detalyado sa misunod nga adlaw.
M. R. S., Tinipong Bansa
Sa milabay nga duha ka tuig, ako dihay grabeng daklit nga pagpanginit sa lawas ug ubang mga simtoma. Ang akong doktor mihatag ug tambal, apan kadto may teribleng di-maayo nga resulta, sama sa labad sa ulo. Misulay ako sa paghimog kinaugalingong panukiduki ug sa kataposan mihukom nga mosulat kaninyo ug mosugyot sa usa ka artikulo alang niining ulohana. Sa pagkasunod semana, gibuksan ko ang Pagmata!, ug dihay usa ka tin-aw ug daling masabtan nga kahubitan sa estrogen replacement therapy. Segurado ako nga ang artikulo makatabang sa daghang kababayen-an.
B. S., Tinipong Bansa