Gikan sa Among mga Magbabasa
Tabang Alang sa Himalatyon Salamat kaninyo tungod sa mga artikulo bahin sa “Tabang Alang sa Himalatyon.” (Oktubre 22, 1991) Ang akong igsoong babaye dunay tumor sa utok ug ang doktor nagtug-an kanamo nga sila mahimong makapalugway sa iyang kinabuhi [pinaagi sa labaw-kasagaran nga paagi sa pagtambal] o pasagdahan ang sakit sa pagsubay sa iyang padulngan. Kadto maoy lisod nga desisyon, apan kami sa kataposan nakahukom sa kinaulahiang kapilian. Human sa iyang kamatayon, hinuon, ako misugod sa pagbati ingon nga kami sad-an. Busa ako mibati nga nahuwasan pag-ayo human mabasa ang mga artikulo. Salamat kaayo kaninyo tungod sa pagtagana kanamo sa kahupayan ug tabang sa tukmang panahon!
A. L. M. A., Brazil
Mga Pamilya Makigsuod Buot lang namo nga ipahayag ang among apresasyon alang sa nindot pagkasulat nga serye “Mga Pamilya—Makigsuod sa Dili pa Ulahi ang Tanan.” (Septiyembre 22, 1991) Tungod kay ning bag-o pa nahimong mga ginikanan sa usa ka bililhong batang lalaki, kami nahimuot sa personal nga mga komento bahin sa pagpadako sa bata nga giasoy sa mga ginikanan gikan sa tibuok nga kalibotan. Kami nagalaom ug nagaampo nga kami usab makapadako sa among anak “diha sa disiplina ug pagpahamatngon ni Jehova.”—Efeso 6:4.
R. S. ug J. L. S., Tinipong Bansa
Dugaydugay na hangtod karon, gusto gayod nako nga itug-an kaninyo kon unsa ka dako ang akong pag-apresyar sa inyong mga artikulo. Apan human mabasa ang isyu bahin sa pagpalig-on sa pamilyahanong kahugpongan, ako kinahanglan gayod mosulat sa pagpasalamat kaninyo. Ako nanganak sa miaging pipila ka bulan, ug ang akong bana ug ako mohimo sa tanang paningkamot sa pagpadapat niining mga sugyot.
S. D., Italya
Pagbasa Ako usa ka batan-on ug nahimuot gayod sa pagbasa. Ugaling, ako dili kanunay makasabot kon unsay akong ginabasa, ug ako makiling sa dili pagtagad sa mga lisod nga pulong. Ang artikulo “Basa aron Molapad ang Imong Kalibotan” (Hulyo 22, 1991) nagtabang kanako sa pagpauswag dinhing bahina.
A. R. B., Brazil
Sa daghang mga tuig ako nagsulay pagbasa sa tanang mga isyu sa Ang Bantayanang Torre ug Pagmata! apan napakyas, bisan tuod ako dunay eskedyul nga nagalakip sa pagbasa kanila. Ang inyong artikulo nagtabang kanako sa pagkaamgo nga ang akong suliran maoy dili maayong pamatasan sa pagbasa. Ako nakaapresyar sa mga sugyot bahin sa pagpauswag sa akong pagbasa.
A. K. F. M., Brazil
Mga Ospital Tugoti ako sa pagkomento bahin sa serye “Mga Ospital—sa Unsang Paagi Masagubang Nimo?” (Marso 8, 1991) Sa miaging tuig ako naospital sa makaupat ka beses. Mibati ako nga walay depensa ug walay panalipod. Kon ako mosuknag pangutana mahitungod sa akong kahimtang, pamaagi sa pagtambal, ug laing mga epekto sa medisina, ang akong mga doktor nag-isip niini sama sa walay-salig nga boto. Ngani sila moingong, ‘Ikaw dili angay dinhi. Mahimo kang mopauli.’
R. A., Czechoslovakia
Ang ideya sa mga katungod sa pasyente dili dinawat sa tanang dapit, bisan tuod ang ingong mga katungod maoy tulin nga nakabaton ug pag-ila. Ang mga Hospital Liaison Committees nga gi-esponsoran sa mga Saksi ni Jehova nakabaton nag sukod sa kalamposan sa pagkuha sa kooperasyon sa mga doktor. Apan diin ang mga katungod sa pasyente wala pa respetohi, ang mga indibiduwal tingali makaarang sa pagpauswag sa ilang kahimtang pinaagig pag-ugmad ug kooperatibo, masinabtanon nga relasyon uban sa ilang doktor una pa mahimong kinahanglanon ang pagpaospital. Maalamon kanunay nga ang usa ka Kristohanon makiglabot sa mga medikal nga kawani diha sa maayohon ug matinahorong paagi.—ED.
Paglikay sa Panghasi Ako nakaapresyar sa artikulong “Mga Batan-on Nangutana . . . Unsay Akong Himoon Aron Dili Niya Ako Hilabtan?” (Mayo 22, 1991) Bisan tuod ang artikulo giluwatan sa panguna alang sa mga babaye, kaming mga lalaki makakat-on ug pila ka butang gikan niana. Ning ulahi ako nakaatubang sa susamang suliran gikan sa usa ka babaye kinsa nagtental kanako sa pagpameligro sa akong pakighigala sa Diyos! Ang inyong artikulo ming-abot sa igong panahon ug nakatabang kanako sa pagdumala sa kahimtang.
E. K. O., Ghana
Tan-awa ang among Oktubre 8, 1991, isyu alang sa tinong mga sugyot nga gitumong sa mga batan-ong lalaki nga nagaatubang sa susamang mga kahimtang.—ED.