Gikan sa Among mga Magbabasa
Kamatayon sa Usa ka Bata “Ang Hunahuna sa Bibliya” nga mga artikulo “Nganong Gikuha sa Diyos ang Akong Anak?” (Pebrero 8, 1991) ug “Ang Kamatayon sa Usa ka Bata—Nganong Gitugotan Kini sa Diyos?” (Marso 8, 1991) nakahatag ug kahupayan kanako sa panahon gayod nga ako kining gikinahanglan. Niadtong Enero 9, ako nanganak ug usa ka bata nga namatay pagkatapos sa tulo ka oras. Ako nasuko sa akong kaugalingon ug nagtumong pa gani sa akong dili hustong kasuko sa Diyos. Unya akong nabasa kining mga artikulo. Ang kalalom sa kaluoy gibubo sa Diyos gikan sa mga pinanid, ug ako mihilak ug mihilak. Salamat kaninyo alang sa paglaom nga inyong gihatag sa dihang ako masulob-on ug miserable.
C. K., Hapon
Mga Tem sa Tunghaan Salamat kaninyo alang sa artikulo “Mga Batan-on Nangutana . . . Angay ba nga Moanib Ako sa Tem sa Tunghaan?” (Hunyo 22, 1991) Ang akong tunghaan nag-imbita sa tanang mga estudyante nga interesado sa pag-apil sa balebol tem. Ako kanunay gayod nga buot mosalmot sa mga dula. Apan ako kining gihunahuna pag-ayo. Ang mga dula ug pagbansay makababag sa akong ministeryo sa pag-ebanghelyo ug sa mga Kristohanon nga tigom. Busa human mabasa ang artikulo, ako kombinsido nga dili ako moapil sa tem.
M. C. P., Brazil
Mga Hudiyo ug mga Kristohanon Bag-o pa lamang nako natapos pagbasa ang mga artikulo sa tema nga “Mga Kristohanon ug mga Hudiyo—Mahusay ba ang Kabingkilan?” (Hunyo 22, 1991) Ingong usa ka Hudiyo, ako nagdako nga nasayod sa usa ka dakong panagbingkil nagalungtad tali sa “ang piniling katawhan” ug “ang goyim.” Ako usab natudloan labot sa umaabot nga pag-ari sa usa ka Mesiyas, apan kadto maoy usa ka dili tin-aw nga hunahuna. Usa ka adlaw ang mga Saksi ni Jehova nagbisita sa akong pultahan ug nagsugilon mahitungod sa umaabot nga kalinaw dinhi mismo ning yutaa. Kadto madanihon kaayo nga paminawon! Sa tin-aw, ang mga Saksi wala malangkit sa mga simbahan. Dugang pa, sila nagasimba sa Diyos ni Abraham, Isaac, ug Jacob. Mao nga ako nakasabot nga ang pagkahimong usa ka matuod nga Kristiyano dili magluib sa akong Hudiyonhong kabilin. Busa ako nakapabili, labaw pa kay sa mahubit sa mga pulong sa inyong mga artikulo, ug ako nagalaom nga daghan pang mga tawo ang makakita sa magilakong kalainan sa mga Saksi ni Jehova kay sa ubang mga relihiyon.
N. S., Estados Unidos
Kon sa Unsang Paagi Ikaw Makausab Kon Unsa Ka Bisan tuod akong gisulayan sa pagbuntog ang daotang bisyo sa pagmasturbar, ako napalaw tungod sa pagbalikbalik sa bisyo. Hinuon, pinaagi sa serye sa mga artikulo mahitungod sa ulohang “Kinahanglan ba Usbon Nimo Kon Unsa Ka?” (Hulyo 8, 1991), ako nakaarang pagkasayod sa lima ka mga espisipikong lakang nga akong mahimo sa pag-usab sa akong kaugalingon. Kini nakapalig-on sa akong tinguha sa pagpitol sa akong daotang bisyo.
R. H., Hapon
Asbestos Ako mapasalamaton kaayo tungod sa artikulo “Ang Kasaysayan sa Asbestos—Gikan sa Tigluwas ug Kinabuhi Ngadto sa Pagkahimong Hulga sa Kamatayon.” (Marso 22, 1991) Ako nagatrabaho sa usa ka pabrika ug masubsob moggamit ug asbestos. Ugaling, kay wala mahibalo kon unsa ka delikado kining butanga, ako nagatrabaho nga walay bisan unsang kasangkapan sa panalipod nga gisugyot diha sa Pagmata! Ang artikulo napamatud-ang makaayo alang kanako ug sa akong mga kauban sa trabaho, kay ako makahimo man sa pagsulti mahitungod niining butang sa among inadlawng paghisgot alang sa seguridad.
J. R. T., Brazil
Adunay usa ka aksidente sa trapiko nga naglangkit sa asbestos, ug sila nga nag-apil sa pagtabang wala mahibalo kon unsa ka peligroso ang maladlad sa maong butang. Akong nabasa ang inyong artikulo mga pila ka adlaw sa wala pa kining hitaboa. Ingong usa ka enhinyero, nakaarang ako sa paghatag ug giya aron ang maong palakaw mahimo nga luwas.
D. C., Brazil
Mga Langgam nga Moawit Salamat kaninyo tungod sa makapahinganghang artikulo bahin sa mga langgam nga moawit diha sa Mayo 22, 1991, nga isyu. Latas sa mga katuigan ang akong bana nagasabud sa mga langgam dinha sa among luyo, ug kaming duha malingaw sa pagtan-aw kanila. Apan human makabasa mahitungod sa di-katuohang paagi ang mga langgam makamugna ug mga nota, kami karon maminaw na sab kanila. Kami mapasalamaton kaayo sa inyong maanindot sinulat nga pagbatbat sa lain na usab nga kahibulongan gikan kang Jehova.
J. S., Estados Unidos