Gikan sa Among mga Magbabasa

Kantalita Ako nakadayeg sa inyong artikulong “Mga Batan-on Nangutana . . . Unsay Daotan sa Pagsultig Kantalita?” (Septiyembre 22, 1991) Kini maoy butang nga ako sad-an sa daghang katuigan na karon. Kadaghanan niini naa diha sa kunohay salabotanong paagi, apan sa pagpalandong akong nakita nga nahimo sad kadtong usa ka matang sa mekanismo sa pagdepensa-sa-kaugalingon, nga nagtabon sa dugay nang mga pagbati sa pagkaubos. Kay nakabasa ning artikuloha, hinuon, buot kong biyaan kining dili maayo ug makasakit usahay nga bisyo.

C. T., Inglaterra

Pagpamati sa mga Pasidaan sa Lawas Sa miaging tuig ako naospital sulod sa tulo ka bulan tungod sa sakit sa matris. Latas sa mga tuig ako dunay mga senyales sa pasidaan, apan wala nako tagda pag-ayo. Sa kataposan ako miadto sa ospital ug nasayran nga dinaliang pagdisdis ang gikinahanglan. Unta kon nabasa pa nako ang inyong artikulong “Pagpamati sa mga Pasidaan sa Lawas” (Oktubre 8, 1991) kaniadto, duna unta koy kaisog sa pag-adto sa doktor ug sayo.

M. U., Hapon

Air-Conditioning Ang artikulong “Gikinahanglan Mo ba ang Air-Conditioning?” (Hunyo 22, 1991) nakadani kanako, tungod kay ako nakatrabaho sa pagserbisyo sa mga air conditioners sulod sa kapin 35 ka tuig. Balik kaniadto sa mga 1950 sa dihang una nakong natun-an ang akong trabaho, kami motuon sa ulohan bahin sa Btu’s sa pipila ka adlaw. Inyong gisaysay kining butanga sa yano kaayo ug daling masabot nga paagi diha lamang sa usa ka parapo! Gihandom nako nga nakabaton ko niining artikuloha kaniadto.

A. D., Tinipong Bansa

Panagbangi sa Dugo Ako bag-o lang gyod makabasa sa artikulo mahitungod ni Wyndham Cook, nga nag-ulohan “Karong Gabii Ikaw Mamatay.” (Agosto 22, 1991) Sukad walay artikulo ang nakatandog sa akong kasingkasing sama sa paagi ning usa. Ako nag-ampo nga si Jehova mobantay sa iyang mga ginikanan ug nga kitang tanan unta makasunod sa lig-ong panig-ingnan sa pagtuo nga gihimo niining batan-ong lalaki.

J. T., Tinipong Bansa

Ingong usa ka 15-anyos mismo, makapadasig gayod sa pagkahibalo nga ang batan-ong mga Kristohanon nakapakita ug samang debosyon ngadto sa Diyos. Nakapahilak kanako ang pagbasa mahitungod sa maayong pakigbisog ni Wyndham Cook alang sa pagtuo. Ako nagaampo nga sa susamang kahimtang, ako magpabiling matinumanon.

D. L., Tinipong Bansa

Pasad Salamat kaninyo tungod sa artikulong “Sa Dihang ang Pasad Dili na Magamhan.” (Agosto 8, 1991) Ako nakig-away na niining bugno sa kadaghanan sa akong 44 ka tuig nga pagkinabuhi, ug ako nakagamit sa bisan unsang tabang nga akong makuha. Salamat kaninyo alang sa inyong labing praktikal nga mga sugyot.

C. R., Tinipong Bansa

Ang akong bana nagbasa sa artikulo pag-una ug nagpasabot nga ang among balay nagpasad! Bag-ohay pa lang kami nakatapos sa among panghinlo, ug ako naghunahuna nga ang among balay mas maayong tan-awon sukad. Unya ang akong turno sa pagbasa sa artikulo. Kadako sa akong katawa sa dihang akong nasabtan ang tinuod nga kahimtang sa akong balay! Ang inyong artikulo nakatabang kanako paghapnig sa nagtipun-og nga pasad. Salamat kaninyo.

S. C., Tinipong Bansa

Kawalay-trabaho Buot nako kamong pasalamatan gikan sa kasingkasing alang sa serye sa mga artikulo bahin sa “Kon Unsaon Pagsagubang sa Dihang Mawad-an Ka sa Imong Trabaho.” (Agosto 8, 1991) Usa ka tuig nga milabay ang akong bana kalit nga nawad-an sa iyang trabaho ug wala pa molampos sa pagkakitag lain nga sama niadto. Kini nahimong tinuod nga hagit alang kanamo. Salamat kaninyo tungod sa kanunay nga paghatag kanamo ug makapahupay nga pulong.

R. S., Brazil

Internasyonal nga Pagpanukod Kami nalipay sa pagdawat sa artikulong “Angay Lamang nga Buhaton Mo Kini.” (Abril 22, 1991) Kini miabot mga usa lamang ka semana sa wala pa kami sa akong asawa mogikan aron moalagad ingong mga boluntaryo sa Watch Tower nga proyekto sa pagpanukod sa Colombia, Habagatang Amerika. Ang artikulo naghatag kanamo ug abanteng kasayoran kon unsay madahom. Kami usab nakapahimutang ug daghang mga kopya sa among pamilya, mga agalon, interesado, ug mga estudyante sa Bibliya sa wala pa kami mogikan. Kini nakatabang kanila sa pagbaton ug maayong pagsabot sa buluhaton diin kami nakapribelihiyo sa pag-ambit.

T. G., Tinipong Bansa