Gikan sa Among mga Magbabasa

Pagkiniat Salamat sa inyong artikulo “Mga Batan-on Nangutana . . . Sa Unsang Paagi Makalikay Ako sa Kaguol sa Pagkiniat?” (Disyembre 8, 1991) Mao pay akong pagkaagi ug mga pagbati sa kasakit ug pagbudhi nga resulta gikan sa pagkiniat sa dihang kalit lang nga gibulagan ako sa akong trato nga walay hinungdan. Sa ulahi akong nahibaloan nga siya gidungog nga kiat ug nakapasakit na sa uban una pa kanako. Karon ako nang naamgohan nga mabasol usab ako niining masakit nga kahimtang tungod kay nahigugma ako nga sayo kaayo. Maayo unta ug nabatonan ko kining impormasyona sa mga bulan pang miagi.

G. T., Tinipong Bansa

Giingnan ako sa usa ka ulitawo nga gusto lamang niya akong mahimong higala, ug misugot ako. Apan siya nagpadayon sa pagtawag ug sa paghangyo nako sa pakigdeyt. Sa dihang sa ulahi iya akong gipangutana kon malantaw ko siya nga umaabot nga kapikas sa kaminyoon, ako nalipay! Apan sa milabay ang usa ka tuig iya akong giingnan nga siya wala gayoy tinguhang magminyo. Siya miingon nga dili ako angay mag-emosyonal niining mga butanga sanglit iya akong gisultihan sa sinugdan nga siya dili pa andam magminyo. Unya aron sa “pagdepensa” sa iyang kaugalingon, siya miingon nga buot gihapon siyang makigminyo kanako​—⁠apan ngadto na sa bag-o sistema. Ako nasakitan pa, apan ang artikulo nagatabang kanako sa pag-atubang sa situwasyon.

S. Y., Tinipong Bansa

Mga Pamilya Makigsuod Usa ako sa mga amahan nga wala gayod mopakitag interes sa iyang mga anak. Wala ko maamgohi ang taas-ug-abot nga mga sangpotanan niini. Sa nagbasa sa inyong mga artikulo bahin sa “Mga Pamilya​—Makigsuod sa Dili pa Ulahi ang Tanan” (Septiyembre 22, 1991) kalit nga nakapukaw sa akong kasingkasing! Misaad akong magbag-o ug buhaton ang akong maarangan nga pakitaan ang akong mga anak ug dugang pagmahal.

J. B. M., Gabon

Ang mga artikulo naghisgot mahitungod sa pagsanong sa paghilak sa bata. Kini ba nagpasabot nga kinahanglang mosanong kita sa matag hilak? Kon mao, dili ba kini magtugot sa bata nga maniobrahon ang iyang mga ginikanan​—nga makadaot kaniya sa ulahi?

S. H., Tinipong Bansa

Kami walay gihimong espisipikong lagda apan naghatag ug katibuk-ang pagdasig sa mga inahan nga magmasanongon sa ilang mga masuso. Ug samtang tingali dunay tinuod nga katarongan sa pagkabalaka sa paghimo sa gulang-gulang nga bata ug sa mga masuso nga pinatuyangan sa gusto, ang kadaghanang mga doktor nagtuo nga lisod mapatuyangan sa gusto ang gagmay pang mga masuso pinaagi sa pagsanong sa ilang mga paghilak.​—Tan-awa ang artikulong “Johnny, Hilom na Intawon!” diha sa Pebrero 8, 1983, nga isyu sa “Pagmata!”​—ED.

Panglimbong sa Siyensiya Ako naikag pag-ayo sa artikulong “Mga Panglimbong Diha sa mga Institusyon sa Panukiduki sa Siyensiya.” (Nobyembre 22, 1991) Membro ako sa usa sa mga institusyon nga gihisgotan sa artikulo, ug makakurat nga masayod nga ang maong talan-awon motungha diha sa kasaligang siyentipikanhong komunidad. Sa dihang ang pag-indigay ug pagpiit mangibabaw kay sa pagkamatinud-anon, ang maong butang mahitabo. Ako nakadayeg sa kaisog ug sa pagkamatinud-anon ni Dr. O’Toole​—nga nawad-an sa iyang trabaho tungod niini! Ang tinamdan daw ingon niini, ‘Kinsa ba si Dr. O’Toole nga motul-id kang Dr. Imanishi-Kari?’ Ang pagkabukas-ug-hunahuna ginaingong maoy kinaiya sa mga siyentipiko, apan usahay ang kasukwahi maoy tinuod.

O. O., Tinipong Bansa

Delana Buot kong pasalamatan kamo sa artikulong “Ang Katingalahang Delana.” (Septiyembre 22, 1991) Ako karon nagtuon nga mahimong sastre, ug natun-an namo ang bahin sa delana. Akong gihimo kining artikuloha nga basehanan sa akong proyekto sa tunghaan. Ako nabalakag diyutay sa pagbuhat niana sanglit ang akong mga kauban sa klase nagsulogsulog kanako tungod kay ako usa sa mga Saksi ni Jehova. Ang among prinsipal mihatag pa gani ug pakigpulong nga nagpasidaan sa mga estudyante mahitungod sa mga Saksi ni Jehova! Apan gibasa sa akong magtutudlo ang artikulo uban ang kaikag ug mihangyog usa ka personal nga kopya sa Pagmata!

P. A., Czechoslovakia