Gikan sa Among mga Magbabasa
Mga Pagtambal sa Kanser Nagtuo ako nga ang mubong artikulo sa balita “Mga Pagtambal Gitandi” nga migula sa seksiyon sa “Pagpaniid sa Kalibotan” (Septiyembre 22, 1991) naghatag ug dili hustong impormasyon. Ginapadayag niini nga ang mga tawong nag-antos gumikan sa kanser makabenepisyo sa dili-naandan nga terapiya sama sa ilang makuha gikan sa pagtambal sa establisadong ospital. Ang artikulo sa The New England Journal of Medicine nga maoy inyong gibasehan sa inyong mubong artikulo sa balita lahi gikan sa inyong artikulo sa balita.
A. R., M.D., Tinipong Bansa
Ang among mubong artikulo sa balita husto, apan napakyas kami sa pagtaho sa usa ka yawing kaplag sa maong pagtuon, nga mao, ang himalatyong mga pasyente nga gitambalan sa naandang paagi mitaho ug “dakong sukod sa maayong kalidad sa kinabuhi” kay sa niadtong gitambalan sa dili-naandang paagi. Bisan pa niana, ingon sa gipakita sa among artikulo, walay mausa sa mga pagtambal ang napamatud-ang epektibo sa pagpalugway sa kinabuhi sa pasyente. Mao nga ang pagtuon misugyot nga ang “walay-tambal nga kapilian” alang sa pila ka himalatyong pasyente angay pagatagdon. Ang mga magbabasa usab kinahanglang mahibalo, nga sumala sa mga tigdukiduki mismo, kining mga kaplag “dili mapadapat sa tanang pasyente nga dili pa kaayo grabe ang [kanser].” Ang mga awtor sa pagtuon mihinapos nga ang pila ka dili naandang mga pagtambal “takos sa nahiangay nga pagsusi” sa mga tigdukiduki sa medisina.—ED.
Mga Kombensiyon sa Sidlakang Uropa Nakaplagan nako ang seryal sa “Mga Mahigugmaon sa Diyosnong Kagawasan Nagmaya sa Sidlakang Uropa” nga makatandog kaayo. (Disyembre 22, 1991) Sama kadtog nadunggan nako ang mga hugyaw sa kalipay ug ang palakpak sa atong Kristohanong mga igsoon didto nga nakadawat sa bag-ong mga publikasyon sa Bibliya sa ilang kaugalingong pinulongan. Sanglit imposible alang kanako sa pagtambong sa maong mga kombensiyon, ako mapasalamaton nga inyong gipatik kining mga artikuloha, nga nakapaarang kanamo, sa pila ka paagi, sa pagpakig-ambit sa ilang kangaya ug labaw nga makaapresyar sa kagawasan nga atong ginatagamtam.
M. M., Italya
Kiniat Gibasa nako ang artikulo nga “Mga Batan-on Nangutana . . . Sa Unsang Paagi Makalikay Ako sa Kaguol sa Pagkiniat?” (Disyembre 8, 1991) Natandog ang akong kasingkasing niadto, sanglit ako may kasinatian susama nianang gibatbat sa artikulo. Ang usa ka sub-ulohan mabasa “Ayaw Pagpasakit sa Usa ka Kiat!” Lisod kaayo kana tungod kay sa panahon nga imong maamgohan ikaw biktima na diay sa kiniat, lagmit ikaw nasakit na. Apan sama sa giingon sa artikulo, tingali kita kinahanglang makadawat ug pipila ka pangos ug garas sa dalan sa tinuod nga gugma. Salamat kaninyo alang sa maong bililhong mga artikulo.
S. C. S. M., Brazil
Kontrobersiya Bahin sa Dugo Natapos lang gayod nako ug basa ang artikulong “Ayaw Pag-ingon ug Dili!” (Septiyembre 22, 1991), ug ako naghilak samtang gisulat ko kini. Ako nagpuyo sa usa ka nabahin sa relihiyon nga panimalay ug may anak nga batang babaye. Bisan tuod ang akong bana wala na mosupak sa akong pagtuo karon, kon ang kahimtang moabot labot sa among anak babaye diin ang pag-abuno sa dugo mahimong isyu, hayan mosupak siya. Kining artikuloha nagsilsil sa akong hunahuna sa panginahanglan sa pagbansay sa among mga anak aron sila sa ilang kaugalingon makabarog alang sa mga prinsipyo sa Bibliya sa linghod nga edad.
L. W., Tinipong Bansa
Delana ug mga Anunugba Sa inyong artikulo “Ang Katingalahang Delana” (Septiyembre 22, 1991), kamo nag-ingon: “Tingali dili ka kinahanglang pahinumdoman nga ang mga anunugba gusto kaayog delana. Mangitlog sila aron ang bag-ong napusa nga ulod daghag makaon.” Apan, ang kadaghanang sa anunugba dili magadaot sa delana o sa bisan unsang panapton! Kanang pahayaga makapatuo sa mga tawo nga ang tanang anunugba peligro ug angayng patyon.
T. K., Inglaterra
Ang artikulo wala gayod mag-awhag alang sa pagpuo sa tanang anunugba apan yanong nagtanyag ug praktikal nga mga sugyot sa pagsanta sa pagdagsang sa anunugba. Makaiikag, sumala sa “Grzimek’s Animal Life Encyclopedia,” ang mga klase sa anunugba nga nagakaon ug delana “magpanuko gayod sa paglupad. Ang kadaghanan sa mga anunugba nga molupadlupad sulod sa mga balay maoy sakop sa lain, dili-makadaot nga mga pamilya.”—ED.