Nahibulong sa Ilang Nakita

SA MIAGING ting-init sa daghang dapit sa Sidlakang Uropa maingon usab sa halayong Kazakhstan ug Siberia, ang mga Saksi ni Jehova namatikdan sa mga paagi nga kanhi wala makita. Ang lokal nga mga molupyo ug mga bisita sa mga kombensiyon sa maong mga dapit nakadayeg, oo, ngani nahibulong, sa ilang nakita.

Ang mga delegado sa Zagreb masubsob nga gisultihan: “Kami wala magtuo nga kamo makaabot!” Gikanselar sa kadaghanan sa ubang mga turista ang ilang mga plano sa pagbiyahe​—apan dili ang mga Saksi ni Jehova. Ang The Times sa London mitaho labot sa kombensiyon: “Kini, sa pagkamatuod, ang una nga naorganisar sa mga Saksi ni Jehova diha sa estado nga nakiggubat sa kaugalingon.”

Ang mga polis ilabinang nahibulong. Ang usa didto sa Zagreb nag-ingon: “Maayong ipakita ngadto sa palumagian sa balita sa masa kon unsay nagakahitabo sulod niining istadyoma, dinhi mismo, atong makita ang mga Serbiano, mga Croatiano, mga Sloveniano, mga Montenegrino, ug uban pa nga nanaglingkod tapad sa usag usa diha sa pakigdait.”

Sa Budapest usa ka polis gihangyo sa pagtandi sa mga Saksi nga nanagtigom diha sa dakong istadyom uban sa kasagarang mga tumatan-aw sa soccer. Siya mipahiyom, mihangad sa itaas, ug miingon: “Ang kalainan maoy sama nianang tali sa langit ug yuta.”

“Unsay buot nimong ipasabot?”

“Aw,” tubag niya, “tan-awa ra god. Walay bisan usa ang nanabako, walay sagbot bisag asa, ug ang mga tawo matinahuron. Buhaton nila ang imong isugo kanila.”

Sa Kiev, ang kaulohan sa Ukraine, 14,654 ang nagtigom sa Dynamo Stadium, ang pipila kanila makita diha sa hapin niining magasina. Usa ka Saksi didto nangutana sa usa sa mga kapitan sa polis kon nalisdan ba ang iyang mga sakop sa ilang trabaho sa panahon sa kombensiyon. “Wala, sa sunod higayon mopadala lang kami ninyo ug duha ka polis.”

“Nganong duha ra man?” siya gisukna.

“Sa dihang makatulog ang usa,” kinomedya niyang tubag, “ang lain makabantay kaniya.”

Ang Publiko Natingala

Ang Pesti Hírlap, usa ka mantalaan sa Budapest, nagtaho: “Gigugol sa kapin sa 40,000 kining hinapos nga semana diha sa Népstadion. Wala gayoy pirasong papel, walay dugmok sa tinapay, ni upos sa sigarilyo ang gibiyaan.” Ang Fehérvár Hírlap, laing mantalaan sa siyudad, nag-asoy: “Kadtong sulagmang nasaag sa Népstadion sa Hulyo 26 ug 28 piho nga nakurat gayod. . . . Ilang makita ang talagsa rang masinatiang panig-ingnan sa Kristohanong panggawi ug paagi sa pagkinabuhi.”

Sa hinapos sa semana mibunok ang ulan nga nakapabaha sa Budapest; kapin sa singko sentimetros ang tubig. Apan kana wala makapugong sa mga Saksi. “Katingalahan kini! Makapakutaw sa hunahuna!” usa ka polis nadunggang misulti. “Sila padayong nagaabot ug nagaabot . . . Walay makapugong kanila.” Pagka Lunes ang usa ka mantalaan sa iyang artikulo may ulohang “Pag-ampo Diha sa Ulan” ug mikutlo sa mga delegado: “Kami gidigo lamang sa ulan, wala mabanlas!”

Sa Lvov, diin 17,531 ang nagtigom sa Central Ukraine Stadium, gisultihan sa usa ka polis ang usa sa mga Saksi: “Alang sa bisan unsang publikong okasyon nga may ingon ka daghang tumatambong, kami magkinahanglag gatosan ka mga polis. Alang sa inyong kombensiyon kami dunay napulo, ug sila sa tinuod dili gayod kinahanglan.”

Unya, gipadayag ang dako niyang pagdayeg sa kombensiyon, ang polis miingon: “Kamo nanghawod sa pagtudlo sa uban kon unsay maayo, mahitungod sa Diyos ang inyong ginahisgotan, ug kamo wala mag-apil-apil sa kapintasan. Kamo among gihisgotan kon nganong among gilutos kamo kaniadto, ug nakahinapos kami nga kami wala maminaw kaninyo ug wala gayoy nahibaloan mahitungod ninyo.”

Human sa iyang pagbisita sa kombensiyon sa Usolye-Sibirskoye, sa Siberia, usa ka reporter sa mantalaang Sobyet Leninskiy Put’ nagsulat: “Kahibulongang makita ang kamatinahuron, ingon man ang katakos sa pagsabot ug pagsanong sa panginahanglan sa uban, nga gipakita sa mga alagad ni Jehova sa usag usa. Dili gayod nako makalimtan ang mga pulong nga gilitok didto sa kombensiyon: ‘Kili gayod kamo mangawat! Dili gayod kamo magbakak! Ayaw kamo pag-inom ug sobra! Magmakugihon kamo! Tabangi ang inyong silingan!’ Gawas pa, kini mao ang mga prinsipyo nga angay kab-oton sa katawhan sa katibuk-an. Apan kita makalimot kanunay kanila.

“Makadani, usab, ang inigsoong tinamdan nga gipakita ngadto sa uban, ang kaandam sa pagtabang. Gihatagan kami sa usa ka babaye ug mantalaan aron kami dili makalingkod sa abogon nga bangko. Sa dihang misugod pag-ulan, ang batan-ong babaye nga naglingkod tapad nako mapahiyomong mitunol kanako sa iyang payong, ug gikuha sa usa ka lalaki ang usa ka nahumod nga bata aron mapayongan. . . .

“Ang atmospera sa kombensiyon sa usa ka paagi makapabuotan ug diyutay sa usa ka tawo, maedukado ug diyutay, halangdon ug diyutay. Imposibleng dili ka makabalos ug pahiyom sa kaayo nga ginapasundayag sa mga dili kaila. . . . Kami mibiya sa istadyom nga mibating nahinloan, mibating kami nakadapat sa usa ka butang nga maanindot.”

Alang sa kombensiyon sa Kiev, kapin sa 2,000 ang miabot gikan sa Moscow ug mga 4,500 gikan sa Caucasus. Usa ka lamesa sa impormasyon ang gibutang diha sa airport, ug gidispley ang mga literatura sa Bibliya. Daghan ang nangutana nga mahigalaong gitubag. Usa ka gabii usa ka lalaki miduol ug miingon: “Ako dugay nang naniid kanimo. Ako nahibulong sa kalulot sa imong pagpakigsulti sa mga tawo mahitungod sa Gingharian. Palihog tugoti ako sa paghatag kanimo ning mga bulaka ingong gasa tungod sa imong maayong buhat.”

Sa panahon sa bawtismo sa kombensiyon sa Usolye-Sibirskoye, usa ka reporter nadakayeg sa dihang iyang nakita ang pipila ka Russo nga migakos ug mipahalipay sa usa ka tawong gikan sa Buryat nga tribo. Bisan tuod walay nasodnong pagpihig ang Siberia sa katibuk-an, ang tinuod nga panaghigalaay sa mga Russo ug sa tribonhong mga tawo sa Asia maoy tagsaon. “Sa unsang paagi ninyo nabuntog kining nasodnong mga kababagan?” ang reporter nangutana.

“Pinaagi sa pagpadapat sa prinsipyo sa Bibliya ‘kinahanglang higugmaon mo ang imong silingan sama sa imong kaugalingon,’” siya gisultihan.

Usa ka Internasyonal nga Panagsoonay

Kon unsa ang makapainit sa pagbati ilabina diha sa tulo ka internasyonal nga mga kombensiyon mao ang mahigugmaong pagbinayloay sa mga delegado nga gikan sa tibuok sa kalibotan. Ang Budapest may mga bisita gikan sa 35 ka nasod, ang kadaghanan kanila maoy gikan sa Polandia ug Alemanya, apan dako-dakong representasyon usab maoy gikan sa uban pang mga dapit, lakip sa mga 500 gikan sa Unyon Sobyet. Ang Prague may mga delegado gikan sa 39 ka nasod, lakip ang kapig 26,000 gikan sa Alemanya, hapit 13,000 gikan sa Polandia, kapig 900 gikan sa Italya, 819 gikan sa Netherlands, 746 gikan sa Sweden, ug 743 gikan sa Hapon. Ang Zagreb dunay mga bisita gikan sa 15 ka nasod, bisan pa sa hulga sa sibil nga gubat.

Diha sa matag usa ka internasyonal nga kombensiyon, tulo ka plataporma ang gitukod diha sa natad nga nag-atubang sa lainlaing bahin sa istadyom. Gikan niining mga platapormaha ang tibuok programa dungang gipasundayag diha sa tulo ka pinulongan. Sa Budapest ang pinulongang Hungariano, Polako, ug Aleman; sa Prague kini maoy Czech/Slovako, Polako, ug Aleman; ug sa Zagreb dihay Croatiano/Serbiano, Sloveniano, ug Italyano. Sa panahon sa matudloon nga drama sa Bibliya, nga gikuha gikan sa mga kasinatian sa karaang si Ezra ug sa iyang mga kauban, ang mga delegado nga nagasulti ug lainlaing pinulongan makatan-aw sa drama bisag hain niining tulo ka pinulongang-mga-seksiyon diin sila mopili sa paglingkod.

Ang kadaghanan sa pangunang mga pakigpulong sa mga kombensiyon dungang gihatag sa Ininglis sa naglainlaing sakop sa Nagamandong Lawas sa mga Saksi ni Jehova. Ang matag usa kanila nagsulti gikan sa usa sa tulo ka plataporma. Kining mga pakigpulonga, dayag lamang, gihubad alang sa kaayohan sa tulo ka dagkong grupo sa pinulongan, ug didto sa Budapest ug Prague, kini gihubad usab sa daghan pang ubang mga pinulongan.

Ang nagkalainlaing mga maghuhubad alang ning mga seksiyona sa pinulongan nagbarog sa atubangan gayod sa ilang grupo sa pinulongan. Ang mga trompa gitunong diha sa partikular nga seksiyon sa pinulongan aron ang usa makapaminaw sa iyang kaugalingong pinulongan nga dili mabalda sa mga paghubad nga ginahimo sa ubang mga seksiyon sa pinulongan. Sa Budapest, pananglitan, ang mga pakigpulong sa mga sakop sa Nagamandong Lawas gihubad sa Olandes, Pinlandes, Pranses, Grego, Italyano, Hapones, Norwegian, Kinatsila, ug Sweko, ingong dugang sa pangunang mga pinulongang Hungariano, Polako, ug Aleman.

Diha sa matag internasyonal nga kombensiyon, ang makapadasig kataposang pakigpulong gihatag sa tulo ka sakop sa Nagamandong Lawas. Ang ilang hagit mao ang dungan nga pagtapos kon mahimo. Human niana, ang mga tingog sa daghang nasyonalidad miduyog sa pagkanta, ug sa kataposan ang mga kasingkasing nahiusa diha sa mainitong pag-ampo sa pagpasalamat kang Jehova nga Diyos tungod sa pagpanalangin ning kahibulongang mga panagkatigom ug kalamposan.

Sa dihang ang paniklop nga “Amen!” nalitok, walay usa ang gustong mobiya. Ang mga luha midagayday sa kaliboang mga aping. Sa tabok sa dakong mga istadyom, mga panyo, mga bandana, ug mga payong giwarawara sa pagpanamilit ingong paghatag ug katahoran sa minahal nga mga higala kinsa nagpabiling maunongon sa Diyos ubos sa pagbando ug sa pagkabilanggo sa hataas nga mga katuigan. Sa Prague daghang managhigala nagpabilig kapin sa usa ka oras, nanag-awit ug nanaglipay sa panag-ubanay.

Ang kahibulongang kalamposan ning mga kombensiyona wala modangat nga walay paningkamot. Sa tinuoray gatosan ka libo ka oras ang gigugol sa mga Saksi ni Jehova dili lamang sa pagpangandam aron makatambong kondili sa pag-atiman usab sa ginatos ka detalye nga gikinahanglan sa pagpalampos niining mga kombensiyon.

Pag-andam sa mga Pasilidad

Ang dako kaayong Strahov Stadium sa Prague, nga dugay nang wala gamita alang sa dakong mga tigom, ayohonon kaayo. Aduna lamay mga 55,000 ka magamit nga lingkoranan, dili paigo sa gidaghanong gidahom alang sa ting-init kinadak-ang kombensiyon diha sa Sidlakang Uropa. Busa usa ka daot nga makina sa sipelya ang nakit-an, giayo, ug gigamit sa paggama ug kapin sa 18 kilometros mga bangko aron kalingkoran ug dugang 30,000 ka tawo.

Ang paggama ug pag-instalar sa mga bangko, natural, maoy bahin lamang sa trabaho. Ang pagpintal, paghinlo, paglampas sa mga sagbot, ug ang katibuk-ang pag-ayo gikinahanglan usab. Sa kataposan, ang istadyom gidekorasyonan ug 8,300 ka kaang nga may mga 33,200 ka bulak ug 1,357 nga mga kahoyng-pino. May mga panahong libolibong mga trabahante ang moabot. Tanan-tanan kapin sa 66,000 ka oras ang nagugol sa mga mibuluntaryo gikan sa 260 ka kongregasyon sa mga Saksi ni Jehova.

Ang susama nga trabaho maoy gihimo sa pag-andam sa mga istadyom sa Budapest, Zagreb, ug sa ubang mga siyudad. Mga 4,000 ka buluntaryo nakagugol ug kapin sa 40,000 ka oras sa pagtrabaho sa nataran sa kombensiyon sa Lvov. Ang ilang nahimong trabaho gidawat ingong bayad sa abang sa mga pasilidad. Ang tanang mga bangko sa istadyom giayo ug gipintalan, ug ang tanang mga kasilyas gihinloan ug giayo. Usab, usa ka trayentay-tres metros nga tisang tinukod ang gitukod alang sa dugang kasilyas. Sa susama, diha sa Khimik Stadium sa Usolye-Sibirskoye, 52 ka dugang mga kasilyas gitukod aron gamiton sa panahon sa kombensiyon.

Ang hepe-enhinyero sa istadyom sa Lvov miingon: “Sa tibuok nakong kinabuhi, wala pa ako sukad makakitag sama ka tagsaong mga tawo. Kamo nagtrabaho ingong usa ka dakong pamilya. Dili nako kini masabtan, apan ang pagtrabaho uban ninyo makapahimuot kaayo.” Ang nagadumala sa istadyom nag-andam ug pahayag diin ilang gipasalamatan ang mga Saksi “tungod sa ilang kugi nga pagtrabaho ug tungod sa maayong mga kinaiya ug paglantaw sa kaakohan.” Ang pahayag naghinapos: “Kami nanghinaot sa kalamposan sa inyong kombensiyon sa Lvov.”

Sa Kiev ang salog sa lawak nga pagabutangan sa kapeteriya kinahanglang ayohon. Sulod sa duha ka adlaw ang trabaho natapos. Duha ka trabahante sa istadyom miadto aron sa pagtan-aw sa “milagro,” ang usa miingon sa iyang kauban: “Sulod sa duha ka adlaw ilang gihuman ang trabaho nga tunga sa tuig taposon sa atong mga tawo.” Ang presidente sa klab alang sa mga isports sa tubig miingon sa magtatan-aw sa kombensiyon: “Dako kaayong kausaban ang inyong nahimo sa istadyom nga dili na gani kami makaila niini.”

Ang trabahante sa istadyom sa Kiev misulat agig apresasyon: “Kami nalipay sa kinasingkasing sa pagkaorganisar sa kombensiyon sa mga Saksi ni Jehova. . . . Maingon nga ang tubod sa mga sapa nagkaabot sa pagpormag usa ka nagaawas nga sulog, mao usab ang agos sa mga Saksi ni Jehova gikan sa gamay ngadto sa dako nga duyog nga nanag-agos ngadto sa ilang kombira. Kini takos sa pagdayeg. Kami nakakita niini sa unang higayon. Kami nagpasalamat kaninyo kay kamo nakatudlo kanamog usa ka butang pinaagi sa inyong panig-ingnan.”

Pag-atiman sa mga Delegado

Ang usa sa labing dakong trabaho mao ang paghikay sa mga sak-anan alang sa linibong mga bisita. Gibuksan sa lokal nga mga Saksi ang ilang mga puloy-anan sa mga delegado. Alang sa kombensiyon sa Prague, ang mga Saksing Czech nagpasaka sa ilang kaugalingong mga balay ug 6,280 gikan sa Polandia. Sa Budapest, 2,203 ka delegado ang miabot sa pribadong mga balay. Ug ang 278 ka mga Saksi sa Kiev nagpasaka ug mga 750 ngadto 800 ka bisita.

Dugang pa, daghang eskuylahan ug mga gimnasiyom sa Budapest ug Prague ang nagsilbing puy-anan. Kapin sa 40 ka eskuylahan gigamit sa Budapest aron makaabot ang 7,930 ka tawo. Sa Prague, 12,530 natulog diha sa mga eskuylahan ug mga gimnasiyom. Linibo ka kutsong gipaburotag hangin ang nabatonan aron magamit niining mga pasilidara. Kapin sa 29,000 ka tumatambong sa kombensiyon sa Prague miabot sa mga dormitoryo sa estudyante ug sa mga abtanan alang sa batan-on, ug dugang linibo pa ang misaka diha sa regular nga mga hotel.

Diha sa pila ka kombensiyon, gihimo ang mga kahikayan aron ang mga delegado makatulog sa mga tren nga nagdala kanila. Gigamit sa duolan sa duha ka libong Saksi gikan sa Zakarpartskaya Oblast ang coaches sa tren ingong ilang sak-anan sa Kiev. Mao usab kini ang gihimo sa ubang gikan sa Caucasus nga miadto sa Kiev. Ug, ang mga Saksi sa Lithuania nga mibiyahe ngadto sa kombensiyon sa Tallinn, Estonia, natulog diha sa tren nga nagdala kanila.

Bisan human sa ilang pag-abot, ang mga delegado giatiman sa daghang paagi sa ilang mahunahunaong mga tig-abiabi. Pananglitan, dihay mga kahikayang gihimo sa Prague sa pagpadagan sa 40 ka bus aron may biyahe kanunay nga sa naandan usa lamang ka bus ang tigbiyahe. Dugang pa, tungod sa abante nga bayad, ang mga delegado makahimo sa pagbiyahe nga libre diha sa publikong mga transportasyon ngadto sa kombensiyon sa buntag ug sa pagpauli sa pagkagabii pinaagi sa pagpakita sa ilang mga badge sa kombensiyon. Sa Unyon Sobyet, 11 ka bus padulong sa kombensiyon sa Usolye-Sibirskoye gikan sa kasikbit nga Angarsk malulutong giabayan sa duha ka kotse sa polis sa trapiko, usa sa unahan ug ang usa sa luyo!

Mga Panlimbasog sa Pagtambong

Ang mga delgado ilabina ngadto sa pila ka kombensiyon sa Sobyet mibiyahe ug layo kaayo ug mogasto ug dako sa personal. Ang pipila nagtigom sa tibuok tuig aron makabayad alang sa ilang biyahe. Ang usa ka delegasyon nga gikan pa gayod sa Dagat Pasipiko sa pantalan sa Vladivostok, mibiyaheg kapin sa 3,200 kilometros ngadto sa Usolye-Sibirskoye. Laing napulog duha ka delegado maoy gikan sa isla sa Sakhalin sa Dagat Pasipiko sa amihanan sa Hapon. Ang usa maoy 20-anyos nga batan-on nga gikuyogan ug laing tulo ka batan-ong iyang gidumalahan ug pagtuon sa Bibliya.

Usa ka drayber sa bus gikan sa Sayanogorsk, nga nagtinguha nga magpabawtismo sa Usolye, sa walay puas mihangyo sa iyang amo alang sa pila ka adlaw nga bakasyon aron makatambong sa kombensiyon, apan ang iyang amo dili motugot sa pagpalakaw kaniya. Busa ang lalaki nagmaneho ngadto sa siyudad sa Abakan ug mikuhag kopya sa Sobyet nga dokumento sa miaging Marso 27 nga opisyal nga nagaila sa mga Saksi ni Jehova ingong usa ka relihiyosong organisasyon. Bisan pag nakakita sa dokumento, ang iyang amo dili motugot kaniya sa paglakaw. Sayo sa adlaw nga siya mogikan, human sa mainitong pag-ampo, ang lalaki mihangyo na usab ug sa kataposan nakadawat ug permiso sa paglakaw.

Bawtismo ug Bag-ong mga Publikasyon

Ang bawtismo maoy usa ka makapaukyab nga bahin sa tanang kombensiyon sa Sidlakang Uropa. Pinaagi sa simbolikong buhat sa pagtuslob sa tubig, 18,293 ka tawong mitambong niining mga kombensiyona nagpanghimatuod atubangan sa mga saksi nga sila sa bug-os nagapahinungod sa ilang mga kinabuhi sa pag-alagad kang Jehova nga Diyos. Usa ka batan-ong kandidato sa bawtismo sa Prague, nga bag-o pang nakadawat ug maayong tanyag sa trabaho, miingon: “Gibati ko nga may kapilian ako tali sa trinitaryanhong diyos nga mao ang dolyar sa U.S., mark sa Alemanya, ug sa Austrianong shilling sa laing kamot ug si Jehova sa pikas kamot. Ako midesider alang kang Jehova ug gisalikway ang tanyag.”

Ang bawtismo sa Tallinn gihimo diha sa gawas nga linaw duol sa Baltic Sea diin ang karaang mga kota nga kanhi gigamit ingong bilanggoan makita diha sa likod. Dinhi daghang mga Saksi nga taga Estonia gipriso sa wala pa ipadala sa mga kampo sa pinugos nga pagtrabaho didto sa Russia sa sayo sa katuigang 1950. Makapaukyab gayod, ilabina alang sa mga gulang-gulang na, sa pagkakita sa 447 ka bag-ong mga magtutuo nga nagpasimbolo sa ilang pagpahinungod kang Jehova diha sa publikong seremonya!

Laing makapahinam nga bahin sa mga kombensiyon mao ang pagluwat sa bag-ong mga publikasyon. Ang mga higala nga taga Lithuania sa Tallinn sa literal milukso gikan sa ilang mga lingkoranan ug nanghilak sa dihang sila giingnan nga ang brosyur “Tan-awa! Ginabag-o Ko ang Tanang Butang” karon mabatonan na sa ilang pinulongan. Sa susama, usa ka dakong punto sa mga kombensiyon sa Romania mao ang pagluwat diha sa Romaniano sa librong Pinadayag​—Hingpit nga Sangkoanan Niini Haduol Na!, ug alang sa mga Czech ug mga Slovak sa Prague, mao ang pagkadawat sa New World Translation of the Holy Scriptures diha sa ilang kaugalingong pinulongan.

Hinoon, diha sa kadaghanan sa mga kombensiyon, ang luwat nga nagdalag hilabihang kalipay mao ang bag-ong librong Ang Labing Bantogang Tawo nga Nabuhi Sukad. Sa pagkakaron napulo ka milyong mga kopya na ang napatik diha sa 59 ka pinulongan.

Hustong Paggamit sa Kagawasan

Karong adlawa, ang literatura sa Bibliya ginadawat na sa Sidlakang Uropa, lakip sa Unyon Sobyet. Ang mga trak nga gikargahan sa Ang Bantayanang Torre ug Pagmata! mogawas sa dakong imprentahanan sa mga Saksi ni Jehova sa Selters/Taunus, Alemanya, ug mobiyahe tabok sa mga utlanan ngadto sa mga nasod sa Sidlakang Uropa. Pagkadako sa kalainan sa mga panahon kini dihang, sa risgong mabilanggo, ipayuhot sa mga Saksi ang literatura ngadto niining mga nasora!

Sa pag-ilustrar sa katingalahang kausaban, ang mosunod nga kabildohay nahitabo tali sa usa ka opisyal sa aduwana ug usa sa mga Saksi ni Jehova sa talisugod na ang kombensiyon sa Tallinn:

“Unsa may sulod nianang gamayng kahon?”

“Mga magasin.”

“Unsang mga magasina? Mga magasin ba sa Diyos?”

“Aw, oo, mao gayod.”

“Kang Jehova nga Diyos ba nga mga magasin?”

“Oo!”

“Jaa’a, maayo kana. Hala makalarga ka na.”

Human sa kombensiyon sa Budapest, si Arpad Goncz, presidente sa Hungaria, midapit sa usa ka Saksi nga iyang kauban sa selda sa panahon sa paglupig sa Komunista. Usa ka oras silang nag-estoryahay ni Gn. Goncz ug pagkatapos mihangyo sa iyang kauban kanhi sa selda sa pagpaabot sa iyang panghinaot sa mga Saksi ni Jehova. Ang mga mahigugmaon sa diyosnong kagawasan sa tanang dapit mapasalamaton kaayo nga ang presenteng mga opisyales, sama ni Gn. Goncz, karon nagatugot sa kagawasan sa pagsimba diha sa Sidlakang Uropa.

Sa pagpakita nga gigamit sa katawhan ni Jehova sa hustong paagi ang ilang kagawasan, gihubit sa The New York Times karong Septiyembre ang usa ka talan-awon sa St. Petersburg (kaniadto Leningrad), nga nag-ingon: “Ang mananoyng honi nga ‘Summertime’ ni Gershwin gipadpad tabok sa River Neva . . . Ang honi mituhop sa hangin nga miagi sa mga tawong nagpabulad sa adlaw, sa mga bata nga nanaggukod sa mga iro, mga magbabaligya nga namaligyag mga mapa sa karaang St. Petersburg ug mga Saksi ni Jehova nga nagpangitag mga kabig.”

Oo, gigamit nga masiboton sa mga Saksi ang ilang kagawasan sa pagwali sa maayong balita! Buot ba nimong masayod ug dugang mahitungod sa ilang mensahe? Ang Sobyet nga mantalaang Vostochno-Sibirskaya Pravda nagpahayag: “Ang detalyadong impormasyon mahitungod sa ilang mga kalihokan mahimong mabatonan sa mga dapit sa edukasyon sa Bibliya sa mga Saksi ni Jehova sa bisan asang siyudad.” Bisag hain ka mang dapita sa kalibotan nagpuyo, ayaw pagpanuko sa pagpakisayod.

[Chart sa panid 13]

MGA KOMBENSIYON SA SIDLAKANG UROPA UG SA UNYON SOBYET

Nasod Labing Daghang Tumatambong Gibawtismohan

Czechoslovakia (Prague) 74,587 2,337

Hungaria (Budapest) 40,601 1,134

Polandia (12 ka siyudad) 131,554 4,250

Romania (8 ka siyudad) 34,808 2,260

Unyon Sobyet (7 ka siyudad) 74,252 7,820

Yugoslavia (Zagreb) 14,684 492

Total 30 ka kombensiyon: 370,486 18,293

[Mga hulagway sa panid 8, 9]

Tuo: Naghubad alang sa nagkalainlaing grupo sa pinulongan sa Prague

Ubos: Ang Strahov Staduim sa Prague napuno sa kapin sa 74,000 ka delegado

[Mga hulagway sa panid 10]

Ibabaw: Kombensiyon sa Tallinn, Estonia

Kombensiyon sa Budapest, diin, ulan o init, nalipay ang 40,000 ka delegado sa programa

[Mga hulagway sa panid 15]

Ibabaw: Ang pipila ka kasilyas gitukod aron magamit sa kombensiyon sa Usolye-Sibirskoye, Siberia

Namintal sa istadyom ug naghimog mga bangko aron may dugang kalingkoran sa Prague

[Mga hulagway sa panid 16]

Ang drama sa Bibliya ug bawtismo sa Zagreb

[Mga hulagway sa panid 17]

Ibabaw: Dedikasyon sa Hunyo 1991 sa unang Kingdom Hall nga gitukod sa mga Saksi sa Hungaria

Tunga: Kapin sa 20,000 ang nangatulog sa mga eskuylahan ug mga gimnasyom sa Budapest ug sa Prague

Ubos: Pag-apod-apod sa librong “Ang Labing Bantogang Tawo nga Nabuhi Sukad” sa Usolye-Sibirskoye, Siberia