Sila Nagmaya sa Sidlakang Uropa
SA MIAGING ting-init tinagpulo ka libong mga tawo nagpanon sa dagkong mga siyudad sa Sidlakang Uropa. Ang mga karsada sa matahom nga Budapest, Prague, Zagreb, ug kapin sa 20 pa ka siyudad gipunsisokan sa mga tawong nagsul-ob ug asul ug puti nga mga tarheta. Kini mopaila kanila ingong mga mahigugmaon sa diyosnong kagawasan nga nagtambong sa mga kombensiyon sa mga Saksi ni Jehova.
Sukad sa unang higayon, ang mga kombensiyon libreng ginahimo sa mga republika sa Uropa sa Unyon Sobyet, ug sa halayong Siberia ug sa republika sa Sobyet Asia nga Kazakhstan. Tanan-tanan, gitagamtam sa kapin sa 370,000 ka kombensiyonista ang mainit nga pag-ubanay sa Czechoslovakia, Hungaria, Yugoslavia, Polandia, Romania, ug sa Unyon Sobyet.
Alang niadtong wala makatambong, malisod handurawon ang pagmaya dihang 74,252 ang nagtigom sa Unyon Sobyet aron simbahon si Jehova nga Diyos nga bukas ug walay kahadlok. Bisan pa, ang ilang tugob nga kalipay managsama uban sa 74,587 sa Prague ug 40,601 sa Budapest nga nagtigom sa labing dakong mga istadyom sa Czechoslovakia ug Hungaria, o sa 14,684 nga nagtigom sa Zagreb, Yugoslavia.
Talagsaon kaayo kini tungod kay sa pipila pa lamang ka tuig sa miagi, ang mga Saksi ni Jehova gidili diha sa kadaghanang mga nasod sa Sidlakang Uropa. Sila naputol gikan sa Kasadpan sa panahon sa Bugnawng Gubat. Bisan ang pagtigom diha sa gagmayng grupo aron sa pagsimba sa Diyos supak sa balaod. Dili ikahibulong nga dihay dakong pagmaya nga nakahimo sa pagtigom nga may kagawasan diha sa dagkong mga kombensiyon!
Usa ka 59-anyos nga Saksi nga Czech, nga nakagugol ug walo ka bulan sa pagkapriso nga nag-inusara hapit 40 ka tuig kanhi tungod sa iyang pagtuo sa Diyos, miingon: “Ang kadaghanan kanato nga nagpuyo sa Prague nagdamgo bahin sa usa ka dakong kombensiyon nga mahikay dinhi niining istadyoma, apan wala gayod kita magtuo nga matuman kining damgoha sa katingalahang paagi.”
Duha ka semana sa wala pa magsugod ang kombensiyon sa Prague, sa Agosto 9 ngadto sa 11, usa ka mantalaan sa siyudad, Večerník Praha, miingon: “Gisumbong nga nagbudhi sa nasod ug nagbungkag sa sosyalismo, ang mga Saksi ni Jehova nabanlod sa Komunistang mga bilanggoan sa daghang tuig.” Human misaysay nga ang siyudad mahimong tig-abiabi sa dili madugay sa tinagpulo ka libong mga Saksi, ang artikulo mihinapos: “Walay purohang makasugat ka ug hilabihan ka daghang maluluton ug mapahiyomong mga tawo sa Prague sa bisan unsang panahon gawas sa ikaduhang hinapos sa semana sa Agosto.”
Apan, tingali ikaw mangutana: ‘Ang mga Saksi ni Jehova ba niadto gilutos nga may maayong katarongan? Sila ba tinuod nga hulga sa politikal nga mga awtoridad sa mga nasod nga ilang gipuy-an? Diin gikan ang ginatos ka libong mga delegado sa kombensiyon sa Sidlakang Uropa? Gipiotan ug nalain sulod sa 40 o kapin pang mga katuigan nga walay kontak sa Kasadpang kalibotan, sa unsang paagi midaghan kaayo sila?’