Gikan sa Among mga Magbabasa
Pandagit Salamat kaninyo alang sa artikulong “Ayaw Pagbinuang, kay Kondili Patyon Ti Ka.” (Nobyembre 22, 1991) Ako usab biktima sa pangawat diin ako binilanggong biktima diha sa akong kotse. Ang nagdagit nako nahibalo nga ako usa ka Saksi ni Jehova tungod kay kanunay akong mosangpit ug kusog sa ngalan ni Jehova. Ikalipay, wala akoy naagoman nga laing pisikal nga pag-abusar gawas lamang sa nanghubag nga mga pulso gumikan sa paggapos ug pipila ka mga ulat gikan sa pagkabalhog ngadto sa bodega sa kotse. Nagpabilin akong kalmado ug nakagawas pinaagi sa pagbuslot dapit sa luyong-lingkoranan sa akong kotse. Ang insidente ug ang bista nabalita sa lokal. Ang akong manlalaban, mga silingan, higala, ug pamilya nagpasidungog kang Jehova sa akong pagkalingkawas.
E. M., Tinipong Bansa
Ang Bibliya wala magsaad ug milagrosong panalipod alang sa katawhan sa Diyos karong adlawa. Bisan pa niana, haom lamang sa pagpahayag ug pagpasalamat sa Diyos sa dihang ang usa ka Kristohanon naluwas gikan sa usa ka nagahulga-sa-kinabuhi nga kahimtang. (1 Tesalonica 5:18)—ED.
Kape Ang inyong artikulo “Ang Suliran Maylabot sa Kape.” (Abril 22, 1991) nag-ingon nga ang tsa, kokwa, ug ilimnong kola may caffeine. Tingali tinuod kini sa tsa ug kola, apan dili sa kokwa. Ang kokwa may theobromine, nga lahi sa caffeine. Ang usa ka tasa sa kokwa mahimong mohatag nimo ug enerhiya, apan kana tungod sa asukal dinha niana.
E. B., Israel
Ang theobromine usa ka kemikal nga may pisiyolohikal nga mga kinaiya susama sa caffeine. Sumala sa “The Encyclopedia Americana,” ang mga lugas sa kokwa ‘may theobromine kutob sa 3% ug diyutay nga gidaghanon sa caffeine.’ Ang “Compton’s Encyclopedia” nag-ingon nga “sa pila ka sensitibong tawo ang theobromine [sa tsokolate] makapatunghag samang epekto sa caffeine.”—ED.
Pasidaan sa Lawas Ang akong doktor nagbakasyon sa dihang mibati ako ug butang akong gihunahuna gamay lang suliran sa medikal. Gipakamaayo nako nga pasagdahan lang ang mga pasidaang sinyales sa dihang nadawat ko ang artikulong “Pagpaminaw sa mga Pasidaan sa Lawas.” (Oktubre 8, 1991) Sama sa gisugyot, midangop ako sa medikal nga tabang, ug ang dayagnosis maoy kanser. Tungod kay gipaminawan ko ang pasidaan sa akong lawas, nasayran kinig sayo ug natambalan.
S. S., Tinipong Bansa
Kriket Daghang salamat alang sa maayong pagkahubit sa dula nga kriket diha sa artikulong “Kriket o Besbol—Unsay Kalainan?” (Nobyembre 8, 1991) Maayo kadtong kausaban gikan sa paagi nga ang kriket sa subsob gihimong kataw-anan sa mga handumanan gikan ning nasora. Alang sa kaayohan sa mga Britaniko, tingali kami sa usa ka adlaw makabaton ug artikulo nga mohatag sa samang tin-aw nga paghubit sa dula nga besbol. Dili sama sa Amerikanhong potbol, ang dula dili uso dinhi.
A. E., Inglatera
Pamomba sa Terorista Natapos nakog basa ang artikulong “Kami Wala Mamatay sa Bomba sa Mamumuno.” (Enero 8, 1992) Sa pagkamatuod, wala ako masayod kon unsay akong ibungat! Usa gayod kadto ka pananglitan sa pag-antos. Ang pagtuo ug determinasyon ni Sue Schulz bahin sa isyu sa pag-abunog dugo hinungdanon kaayo; mao usab ang paagi sa iyang bana, si Peter, sa pagpahayag sa iyang gugma alang kang Sue bisan pa sa pisikal nga kadaot nga gipahinabo sa pagbuto. Segurado, dili lamang ako ang napaukyab niining artikuloha!
G. J. S., Brazil
Radon Sanglit kay ako propesyonal nga nagtrabaho sa pagsukod sa radon sa mga balay, ang artikulong “Radon—Usa ka Hulga sa Inyong Panimalay?” (Oktubre 22, 1991) sa partikular madanihon kanako. Nahisgotan ninyo nga ang radon mas nagaapektar sa mga baga sa hinabako kaysa wala magtabako. Takos usab nga lakbitan nga ang aso sa sigarilyo nagpausbaw sa gidaghanon sa mga partikulo sa abog nga ang mga produktong radyoaktibo, o “mga anak-babaye,” makatapot. Kini nagpausbaw sa mga riyesgo sa panglawas alang sa wala magpanabako diha sa punog-aso nga dapit.
O. B., Alemanya