Nagkasugat nga Rota sa Paglupad

Ang 266 nga mga pasahero sa Conair mamauli na sa Denmark pagkatapos sa bakasyon sa isla sa Ibiza sa Espanya. Ang ilang duhag-makina nga Airbus bag-o rang mibiya sa tugpahanan sa dihang may mingbuto sa wala nga makina. Ang nabarda nga ayroplano, nga may usa na lamang ka makina nga nag-andar, naningkamot sa pagkayab. Salamat sa kahanas sa piloto, pagkatapos sa kuyaw 24 minutos nga lupad, ang ayroplano milampos sa emerhensiya nga paglandig.

Nasanta ang usa ka trahedya. Bisan pa, ang mga opisyal sa luwas-kahanginan o air-safety matinguhaon kaayo nga mahibalo kon unsay hinungdan sa pagbuto sa makina sa maong delikadong yugto sa pagkayab. Ang malagmit hinungdan sa pagbuto? Usa ka kanaway o sea-gull.

Mga tuig kanhi solo sa mga langgam ang kalangitan. Ugaling, sa kataposang bahin niining sigloha, ang ilang luna sa kahanginan nahimong dugang ug dugang nga naghuot tungod sa gidaghanon sa biyahe sa kahanginan. Dili ikatingala, kini misangpot sa tagsaong pag-​usbaw sa gidaghanon sa mga hasmagay tali sa mga langgam ug mga ayroplano. Ang kapeligrohan sa mga pasahero labing dako sa dihang ang mga langgam masuyop ngadto sa makina, ingon sa morag nahitabo sa Ibiza.

Tungod kay kadaghanan sa mga hasmag-langgam mahitabo duol sa mga tugpahanan, ang mga tinugyanan sa tugpahanan migugol ug daghang salapi sa kadaiyang mga paagi sa pag-abog sa mga langgam. Sa usa ka tugpahanan sa Vigo, sa amihan-kasadpan nga baybayon sa Espanya, usa ka lahi nga sulbad ang gisulayan. Naglangkit kini sa paggamit sa mga mandadagit nga langgam, kadaghanan mga goshawk, sa pagpatrolya sa mga tugpahanan. Sa pagdugang sa epekto niining paagiha, gisibya ang rekord sa mga siyaok sa pasidaan sa mga kanaway samtang ang mga goshawk naglupad sa ibabaw. Ang mahulgaong paglupad sa mga banog sa ibabaw dugangan sa makatuhop nga siyaok sa pasidaan makakombinsir sa mga kanaway sa pagpangita ug mas luwas nga dalangpanan sa laing dapit.

Hangtod karon, ang mga goshawk may mamatikdang kalamposan sa pag-abog sa mga kanaway. Gilaoman nga pinaagi niining mamugnaong sistema, ang mga ayroplano makalupad nga libre ug ang mga kanaway mao usab. Total, ang mga langgam mao may nakauna sa kahanginan.